ဝဏ္ဏမာန်၊ နဝ်ဝေမ်ဗာ ၂၅၊ ၂၀၂၀
လတူလိက် ဗော်အေန်အေဝ်ဒဳတံ တြးပလံၚ်ဗစိုပ်လဝ် ဇရေၚ်ဗော်ပရေၚ်ဍုၚ်ကွာန် ကောန်ဍုၚ်အရၚ်ဂမၠိုၚ် (၄၈) ဗော် တုဲကၠုၚ်နဝ်ဝေမ်ဗာ (၁၂) ဂှ် လိက်ပ္ညဳပ္ညပ်သဳကၠဳ ဟွံသေၚ်ဏီတုဲ လစွံစိုတ်ဗော်ညဳသၟဟ်မန်လေဝ် ဟီုဟွံဒးဏီရောၚ် ဖက်ဆောညးအုပ်ကာ လၟိဟ် (၁) နာဲလျးတၟး ဟီုရ။
“လတူလိက် အေန်အေဝ်ဒဳတံ ပလံၚ်ဗစိုပ်နၚ်ဂှ် လိက်သွက်ဂွံချပ်စလေဝ် ဟွံသေၚ်ပုဟ်၊ လိက်ကဵုကၠုၚ်ရမျာၚ် (ကမ်းလှမ်းချက်) လေဝ် ဟွံသေၚ်ပုဟ်၊ လိက်အာတ်လစွံစိုတ်ဗော်ပိုဲလေဝ် ဟွံသေၚ်ဏီ တုဲတှေ် လတူဏံ သွက်ဂွံကလေၚ်ကဵု လစွံစိုတ်ဗော်ဂှ် ဟွံသေၚ်ပုဟ်၊ ဆဂး လတူလိက်ဂှ် နကဵုဗော်ပိုဲ သ္ပစၟတ်သမ္တီ ဒုၚ်တၠုၚ်” သာ်ဏံ ဟီုရ။
သွဟ်ပေဲါရုဲမာဲတိတ်တုဲဂှ် ညးစၞးဗော်အေန်အေဝ်ဒဳတံ ဇၞးအာ ဒဵုလာ်ပြၚ်လာ်တုဲ ဂိတုနဝ်ဝေမ်ဗာ (၁၂) ဂှ် ပ္ဍဲအရာဒက်ပတန် အလဵုအသဳတၟိဏံ စပ်ကဵုပရေၚ်ဒက်ပတန် ကၟိန်ဍုၚ်ဖေဝ်ဒရေဝ် သ္ဂးတုဲ ဗော်အေန်အေဝ်ဒဳတံ ချူတြးလိက် ကုဗော်ကောန်ဍုၚ်အရၚ်ဂမၠိုၚ်တံ မွဲတၞးရ။
လိက်ဝွံ “အကာဲအရာသာ်လဵုဒှ်ဒှ် နကဵုဗော်အေန်အေဝ်ဒဳဝွံ အနာဂတ် သွက်ဂွံဓမံက်ပတိုန် ဂၠံၚ်တရဴဒဳမဝ်က ရေဇြဳဖေဝ်ဒရေဝ်ဂှ် ဆက်ဂစာန်အာရောၚ်။ ဟိုတ်ဂှ်တုဲ တၚ်ရန်တၟံ ဗော်ကောန်ဍုၚ်အရၚ်ဂမၠိုၚ်ဂှ် ဒှ်ဒၟံၚ်မွဲထပ်ကဵု တၚ်ရန်တၟံ ဗော်အေန်အေဝ်ဒဳ မွဲစွံရဒှ်တုဲ နကဵုဗော်အေန်အေဝ်ဒဳဂှ် သွက်အနာဂတ် အတိုၚ်ဆန္ဒကောန်ဍုၚ် အရၚ်တံ စွံဇြိုဟ်နက်တုဲ နကဵုဗော်ကောန်ဍုၚ်အရၚ်တံလေဝ် အတိုၚ်ဗော်အေန်အေဝ်ဒဳ ရေၚ်တၠုၚ်ဓမံက်ရုပ်ရဴ ဒဳမဝ်ကရေဇြဳဖေဝ်ဒရေဝ်ဂှ် ကတိုၚ်ကတိုၚ်ကၟိုဟ်ကၟိုဟ် ပံၚ်တောဲကၠုၚ်ရောၚ် စၟဳညာတ်ကေတ်ရ” သာ်ဝွံ ချူလဝ်ရ။
လတူဗော်အေန်အေဝ်ဒဳတံ ပလေဝ်ပလေတ် သွက်ဂွံဒက်ပတန် အလဵုအသဳတၟိဂှ် ယဝ်ခါရ အလဵုအသဳတံ ကော် ဘိက်ကၠုၚ် ညးစၞးဗော်ကောန်ဍုၚ်အရၚ်တံမ္ဂး အတိုၚ်သ္ဂုတ်သွာတ်ဗော်ရောၚ် နာဲလျးတၟး ဆက်ဟီုသာ်ဝွံရ။
“လိက်ညးတံဂှ် ယဝ်ခါရ လုပ်သၞောဝ် ဠစိုပ်ကၠုၚ်တှေ် အဵုလတူဂှ် မုကိစ္စ၊ မုပရောပရာ ညးတံ မိက်ဂွံသဳကၠဳရောတီတုဲမှဟီုဒး၊ ပြဟ်ဟ်ဏံ လိက်လေဝ်ဟွံစိုပ်ဏီတှေ် ပိုဲဂှ် မုလေဝ်ဟီုဟွံဂွံဏီ၊ ယဝ်ရညးတံဘိက်ပၟိၚ် ကဵုကၠုၚ်အရေဝ် ကေတ်တာလျိုၚ် ပ္ဍဲအလဵုအသဳဂှ် ကေတ်ကီု၊ ဟွံကေတ်ကီု ကဵုတာလျိုၚ်ကီုဂှ် တန်တဴကဵုသ္ဂုတ်သွာတ် ပ္ဍဲကမ္မတဳကေၚ်ကာဗဟဵုရ၊ တၚ်ဏံဂှ် နူစအာတ်လိက်ဂရၚ်ပ္တီ အလံၚ်အ လံၚ်အမာတ်ဂှ်ရ တၚ်ဏံလေဝ် ပိုဲကဵုကေတ်လဝ် ဂတိပါၚ်တုဲတှေ် ထ္ပက်လဝ်စၟတ်တဲ တုဲဒှ်အိုတ်မံၚ်ရရ။ ဗီုပြၚ်ဍေံဂှ် ဗီုလဵုကၠုၚ်ကၠုၚ် ဗော်ပိုဲဂှ်တှေ် ပတိုန်ထ္ၜး အာတ်မိက် ကဵုသမ္တီကဵုဗော်တုဲတှေ် အတိုၚ်သ္ဂုတ်သွာတ်ဗော်ဟေၚ်ရ ဒှ်ဏောၚ်၊ အတိုၚ်ဂှ်ဟွံသေၚ်ပုဟ်တှေ် နကဵုဗော် ဟွံသ္ပသမ္တီပုဟ်” သ္ဂးရ။
သွဟ်ပေဲါရုဲမာဲ (၂၀၂၀) တုဲကၠုၚ်နဝ်ဝေမ်ဗာ (၈) ဂှ် နကဵုညးစၞးဗော်ညဳသၟဟ်မန်ဝွံ သွာၚ်ကၠတ်ထဝ်တွဵုရး (၆) တၠ၊ သွာၚ်ကၠတ်ထဝ်ကောန်ဂကူ (၃) တၠကဵု သွာၚ်ကၠတ်ထဝ်ညးဍုၚ်ကွာန် (၂) တၠကဵု ပ္ဍဲတွဵုရးဍုၚ်ကရေၚ် စၞးကောန်ဍုၚ်အရၚ် (၁) တၠ ပံၚ် (၁၂) တၠ ညးစၞးဗော်ညဳသၟဟ်မန် ဂွံဒုၚ်ရုဲစှ်လဝ်ရ။
တုဲကၠုၚ်ကာလအလဵုအသဳ ဗော်ခိုၚ်ကၠိုက်ဖေါအ်ဗြေဝ် (USDP) တိုန်ဒှ်အလဵုအသဳ တုဲကၠုၚ် (၂၀၁၀) ဂှ် နူဗော်ပရေၚ်ဍုၚ်ကွာန်မန်ဂှ် ဂွံဒုၚ်ခါန်ကၞက်လဝ် ဝန်ဇၞော် (၂) တၠ၊ ကာလအလဵုအသဳ အေန်အေဝ်ဒဳ တိုန်ဒှ်အလဵုအသဳ (၂၀၁၆) ဂှ် ဂွံဒုၚ်ခါန်ကၞက်လဝ် ဝန်ဇၞော် (၁) တၠကီုရ။
