ဝဏ္ဏမာန်၊ ဖေဖဝ်ဝါရဳ ၁၂၊ ၂၀၂၁

ဟိုတ်နူဗော်ညဳသၟဟ်မန် (MUP) ဒုၚ်တဲပါလုပ်ကေတ်လျိုၚ် ပ္ဍဲကံၚ်ဇြဳအုပ်ဓုပ်ကၟိန်ဍုၚ် ‘နိုၚ်ၚံတော်စီမံအုပ်ချုပ်ရေးကောၚ်စီ’ ဂှ်တုဲ အကြာပ္ဍဲဗော်ကီု၊ အကြာညးဍုၚ်ကွာန်ဂကူမန်တံကီု ဟီုဂးပါ်ပဲါကၠုၚ်တုဲ ပါလုပ်ကေတ်လျိုၚ် ပ္ဍဲကံၚ်ဇြဳဂှ်ဂှ် ရန်တၟံမိက်ဂွံပညဳပညပ် သှ်ကလး ပရေၚ်ဍုၚ်ကွာန်ရောၚ် ဖက်ဆောညးအုပ်ကာ ဗော်ညဳသၟဟ်မန် ဟီုကလးရ။
“ပိုဲပါလုပ်ဒုၚ်တဲ ပ္ဍဲ‘နိုၚ်ၚံတော်စီမံအုပ်ချုပ်ရေးကောၚ်စီ’ဟီုဂှ် ပိုဲလုပ်ဂၠောန် သၟဝ်ဂၠံၚ်တရဴဒပ်ပၞာန် (တပ်မတော်) ဟွံသေၚ်ပုဟ်၊ ပရေၚ်ဍုၚ်ကွာန်ဍုၚ်ပိုဲဂှ် ပံၚ်ကောံသဳကၠဳညးသ္ကံတုဲတှေ် ဂၠာဲသွဟ်ပရေၚ်ဍုၚ်ကွာန် လတူခုၚ်ဏောၚ်၊ အဓိကတၚ်ရန်တၟံ ပတဝ်အာဂၠံၚ် အရၚ်ဂွံဒက်ပတန် ကၟိန်ဍုၚ်ဖေဝ်ဒရေဝ်ဏောၚ်” သာ်ဝွံ နာဲလျးတၟး ဟီုရ။
ဂိတုဖေဖဝ်ဝါရဳ (၁) ဂှ် ဒပ်ပၞာန်တံ ထိၚ်ကၠေံအဝဵုဍုၚ်တုဲ လၟိၚ်လၟဟ်ကၠုၚ် ကုဗော်ညဳသၟဟ်မန် သွက်ဂွံပါလုပ်ကေတ် လျိုၚ် ပ္ဍဲကဵု‘ကံၚ်ဇြဳအုပ်ဓုပ်ကၟိန်ဍုၚ်’ (နိုၚ်ၚံတော်စီမံအုပ်ချုပ်ရေးကောၚ်စီ) မွဲတၠတုဲ ဖေဖဝ်ဝါရဳ (၆) ဂှ် ကမ္မတဳ ကေၚ်ကာဗော်ညဳသၟဟ်မန် ကော်ကောံဓရီုကာတၟေၚ်၊ သ္ဂတ်သွာတ်ကေတ်လျိုၚ် သွက်ဂွံပါလုပ်ကေတ်လျိုၚ်၊ ဗလးညးစၞး ဒံက်တာဗညာအံၚ်မဵုရ။
ဗော်ညဳသၟဟ်မန် လလောၚ်ပတိတ် ပါလုပ်ဒုၚ်တဲ ပ္ဍဲကဵုအလဵုအသဳပၞာန် လၟိၚ်လၟဟ်လဝ်ဂှ်တုဲ အကြာပ္ဍဲဗွိုၚ်ဗော် (MUP) လ္ၚဵုကီု၊ အကြာညးဍုၚ်ကွာန်လ္ၚဵုတံကီု ဒစဵုဒစး ဟီုဂးပါ်ပဲါ ထံက်ထ္ၜးကၠုၚ်နာနာသာ် ကတဵုဒှ်ရ။
‘ဗော်ညဳသၟဟ်မန် ဂွံရုဲဏာ ဂၠံၚ်ဏံဂှ်တှေ် လတူညးဍုၚ်ကွာန်မွဲလ္ပာ်တံ တိတ်ဂၠံၚ်ထ္ၜးမံၚ်ဆန္ဒတ္ၚဲဏံဂှ် ဒဵုကဵုပေဲါတုဲအာ ဒှ်အာမာန်ဟွံသေၚ်ပုဟ်ဂှ် MUP ညာတ်ဗီုဂှ်ဏောၚ်၊ ယဝ်ရဒတူလာၚ် လ္ပာ်ရဲထ္ၜးဆန္ဒဏောၚ် ညးဒှ်ဂဝိၚ် ဖေက် ဒးဒုၚ်ဇီုကပိုက်ဂၠိုၚ်၊ ဇှ်ရ ညးဒးရုဲဂၠံၚ်ပါလုပ်ဏံ နကဵုအဲညာတ်’ နာဲဉာဏ်သိုက်ရာမာဉ် ဟီုရ။
နူဖေဖဝ်ဝါရဳ (၆) ဂှ် ဗော်ညဳသၟဟ်မန် ရုဲစှ်ဏာညးစၞး ကုဒံက်တာဗညာအံၚ်မဵုတုဲ ဖေဖဝ်ဝါရဳ (၇) ဂှ် ကမ္မတဳကေၚ်ကာဗဟဵု (၁၂) တၠတံ ချူလိက်ပတိုန်ထ္ၜး ညံၚ်ဂွံကော်ကဵု ကောံဓရီုကမ္မတဳဗဟဵု ကာတၟေၚ်ရ။ ဆဂး ဟိုတ်နူအကာဲအရာ ပရေၚ်ဍုၚ်ကွာန်တုဲ ကောံဓရီုကမ္မတဳဗဟဵု ချိၚ်ရန်လဝ် ဖေဖဝ်ဝါရဳ (၁၂) ဂှ် ပြံၚ်ပဆုဲလဝ်ရ။
“ပ္ဍဲကရောံအလဵုအသဳပၞာန်ဂှ် ယဝ်ဟွံဒှ်ဂုန်ဖဵု သွက်ဂကူမန်၊ ဟွံဒှ်ဒတုဲဖဵု ပရေၚ်ဍုၚ်ကွာန်ဂကူမန်မ္ဂးတှေ် ဗော်ပိုဲ ဂွံနုက်တိတ်ဂှ် ဟွံဇြိုၚ်စိုတ်ပုဟ်၊ အတိုၚ်ဟီုဂှ်ရ ဟွံဒှ်ဂုန်ဖဵုညးဍုၚ်ကွာန်ပုဟ် ဟွံဒှ်ဒတုဲဖဵု ပရေၚ်ဍုၚ်ကွာန်ဂကူမန်ပုဟ်တှေ် ပိုဲဖျေံလဝ်စိုတ်တုဲမံၚ်ရ သွက်ဂွံနုက်တိတ်” သာ်ဏံ ကမ္မတဳကေၚ်ကာဗဟဵု မွဲတၠ ဟီုရ။
ပြသၞာပရေၚ်ဍုၚ်ကွာန်ဂှ် ညံၚ်ဂွံသောၚ်ကလးအာ နနဲပရေၚ်ဍုၚ်ကွာန်တုဲ ပၠုပ်အာလမျီုယေန်သၞာၚ် ပရေၚ်ဍုၚ် ကွာန်ညိ။ သွက်ဂွံဒက်ပတန် ကၟိန်ဍုၚ်ဖေဝ်ဒရေဝ်ဒဳမဝ်ကရေဇြဳဂှ် စွံဇြိုဟ်နက်ကဵု ပရေၚ်ညဳသၟဟ်ကောန်ဂကူ ကောန်ဍုၚ်အရၚ်ကဵု ပရေၚ်ၜိုဟ်လလမ်ဍုၚ်တုဲ ဂကောံဆေၚ်စပ်ဂမၠိုၚ် ပံၚ်ကောံဂၠာဲအာသွဟ် ရေၚ်တၠုၚ်အိုတ်ညိဂှ် တုဲကၠုၚ်ဖေဖဝ်ဝါရဳ (၅) ဂှ် ဗော်ကောန်ဍုၚ်အရၚ် (၅) ဗော် (ကချၚ်ပြည်နယ်ပြည်သူ႕ပါတီ၊ ကယားပြည်နယ်ဒီမိုကရက်တစ်ပါတီ၊ ကရၚ်အမျိုးသားဒီမိုကရက်တစ်ပါတီ၊ ချၚ်းအမျိုးသားဒီမိုကရေစီအဖွဲ႕ချုပ်၊ မွန်ညီညွတ်ရေးပါတီ) တံ ပတိတ်ကၠုၚ် လိက်လစွံစိုတ်နွံရ။