ပ္ဍဲဂိတု မေ စၟတ်တ္ၚဲ ၂၁ ဂှ် နူကဵုအကံၚ် Facebook မွဲတၠ ပ္တိုန်လဝ်ဂှ် “ဒပ်KNU တံဒပ်လၟိဟ် (၁) ဖျေံလဝ်သ္ဇိုၚ်ပ္ဍဲကဵုတိဍာ်တွဵုရးဍုၚ်မန်ဏံဂှ် နူကဵုဒပ်ပၞာန်ဗၟာ က္ဆံၚ်ဗိုလ်ဇၞော်လေဝ်ပါ သီုကဵုက္ဆံၚ်အကြပ်ဇၞော် ကဵု ကောန်သ္ဂံၚ် ဗၞတ် ၁၃၇ တၠတအ် ဖျေံထောံလွဟ်ကု ကေန်အေန်ယူ တံ ရောၚ်” ဂှ် ချူပ္တိုန်လဝ် သာ်ဝွံရ။

ပရိုၚ်ဏံဂှ် ပြးတိတ်အာ လ္တူလာၚ်တအ်တုဲ မၞိဟ်ကလေၚ်ပါ်တြးပ္တိတ်လဝ်ပၠန်ဂှ် နွံဗၞတ် ၃ လ္ၚီပြၚ်ရောၚ် ဂွံတီကေတ်ရ။

ပရိုၚ်ဏံဂှ် ပြးတိတ်အာ လ္တူ Facebook တအ်ဂှ် ဒဒှ်ရ တံဒပ်လၟိတ် စၟတ် (၉) က္ဆံၚ်ဗိုလ်ဇၞော် ကု အကြပ်ဇၞော် သီုကဵု ကောန်သ္ဂံၚ် ၁၃၇ တၠတအ် ဖျေံထောံလွဟ်တုဲ လုပ်ထောံလွဟ်တုဲ လုပ်ထောံ CDM ရောၚ် ပရိုၚ်ပ္တောံဗီုတအ်ဏံ မပြးတိတ်ဒၟံၚ်ဂှ် နူကဵုဌာန်ပရိုၚ် (ခေတ်သစ်မီဒီယာ) သၟာန်လဝ် နူကဵု KNU တံဒပ်လၟိဟ် (၁) မၞိဟ်အခေါၚ်ဟီုနွံမွဲတၠ (ပဒိုစိုးမြၚ့်) ဟီုဂး သ္ပဒတန်လဝ်နွံဒၟံၚ်ရ။

“ပရိုၚ်ဏံဂှ် ဒှ်ပရိုၚ်ပ္တောံဟေၚ်ရ၊ ပ္ဍဲကဵုပိုယ်ဂှ် ဗီုတအ်ဏံ ဟွံမွဲဏီပုဟ်၊ ဆ္ဂး ပ္ဍဲကဵုပိုယ်ဂှ် နူကဵုလ္ပာ်လ္တူ (ကျိုက်ကော်) ကဵု ပ္ဍဲကဵု တံဒပ် (ပိန္နဲတော) ဂှ် ကောန်သ္ဂံၚ် ၄ တၠတအ် ဆက်စၠောံနၚ်တုဲ လောန်ကၠုၚ်ဗ္ဒဲါ ၃ တ္ၚဲတေံဂှ် လုပ်ထောံ CDM တုဲ စိုပ်ကၠုၚ်လဝ်အဏံ နွံမံၚ်ရ။” သာ်ဝွံ (ပဒိုစိုးမြၚ့်) ဟီုသ္ပဒတန်လဝ်ရ။

ပ္ဍဲကဵုကာလအခိၚ်လၟုဟ်ဏံဏောၚ်ဟီုတှ်ေ အကြာပ်ဒပ်ပၞာန်ဗၟာကဵု ဒပ်ပၞာန်ကောန်ဍုၚ်အရၚ်တအ် ဒှ်ဒၟံၚ်ပေဲါဗတိုက်ဂှ် အသိၚ်ဇၞော်တိုန်ကၠုၚ်ဒၟံၚ်အရိုဟ်ဟ်တ္ၚဲရောၚ် ဂွံတီကေတ်ရ။ ဆေၚ်စပ်ကဵုပရိုၚ်ဗီုတအ်ဏံတှ်ေ ပ္ဍဲကဵုဌာန်ပရိုၚ်လုပ်သၞောဝ်ဂမၠိုၚ်တအ်ဂှ် အခိၚ်ညံၚ်ဟွံဂွံပိုတ်သ္ကုတ်အာဂှ် ပ္တိုန်ဒၟံၚ်ကဵုအရိုဟ်တ္ၚဲရ။

ပရိသာတ်မန်ညးမဗှ်လ္ၚတ်ဒၟံၚ်ပရိုၚ်တအ်ဂမၠိုၚ်လေဝ် မုက်လိက်နွံ လ္တူ Facebook ဂမၠိုၚ်တအ်ဂှ် မုက်လိက်ဗီုတအ်ဏံတအ် ယဝ်ခါရ ပ္တိုန်နၚ်တၚ်နၚ်ပရိုၚ်မွဲမွဲသာ်မ္ဂး လ္ပပတှ်ေပြဟ်ဏီညိဂှ် မိက်ဂွံဗတိုက်ဖအောဝ်ဏာရ။