မိလတိုပ်၊ ဂျောန် ၂၄၊ ၂၀၂၁
ပ္ဍဲအခိၚ်အကာဲအရာ ပရေၚ်ဍုၚ်ကွာန် ဒှ်ရုသံၚ် ကသီုသၞာံဏံဂှ် တၠဝါဗ္ၚတံ ကေတ်ကောန်ကမၠောန်ဝါတ် ဒှ်ကၠုၚ်တုဲ ခက်ခုဲကဵု ပရေၚ်ကၠောန်ဗ္ၚကီု တၠဝါဗ္ၚတံ ဟီုရ။
“ရဲပ္တံမဂှ် ဗၟာစဂှ်လေဝ် ကေတ်ဟွံလောဲရတှေ် ဒှ်ခက်ခုဲတွဵုလေဝ်၊ ဂွံလိၚ်မၞိဟ်ဂှ် ကေတ်ဟွံဂွိုအ်တုဲတှေ် ကော်လဝ် ကောန်ကၟိန်ဇကု၊ မသဇကု၊ ဂၠာဲကပှ်ကေတ် မသဇကု ၜိုတ်ကော်ဂွံဂှ်လေဝ်” သာ်ဏံ တၠဝါဗ္ၚ နူကွာန်တံၚ်ပိုအ် ပွိုၚ်ဍုၚ်မုဟ်ဍုၚ် မိစောအ် ဟီုရ။
ပရေၚ်ကမၠောန်ဝါဗ္ၚဝွံ စတံနူဇိက်ဗ္ၚ၊ ပ္တံမ၊ ရတ်သြောံဂှ် ဒးကော်ကောန်ကမၠောန်အိုတ်သီုတုဲ ကာလအကာဲအရာယဲ ကိုဝ်ဝေဒ် တုဲကၠုၚ်တေံကီု၊ လၟုဟ်ကီု၊ အကာဲအရာ ပရေၚ်ဍုၚ်ကွာန် ကတဵုဒှ်တ္ၚဲဏံကီုတုဲ တၠကမၠောန်နာနာဂှ် ကော် ကောန်ကမၠောန်ဝါတ် ဒှ်ခက်ခုဲရ။
“စနူကဵုဂၠာဲကောန်ကမၠောန် ရဲပ္တံမ လိၚ်ကျာတ် ကေတ်ဟွံလောဲ ဒးကဵုၚုဟ်ဍၚ်၊ ခရိတ်ရာန်ဝဲါ ခရိတ်ကမၠောန် ဖအိုတ် ဒးစေက်မံၚ်တှေ် ကၞောတ်တဲ ရဲဝါဗ္ၚတံ မုဂွံသှေ် ကၠောန်အာ စအာရ ဣဂွံ” သာ်ဝွံ တၠဝါဗ္ၚ နူကွာန်တံၚ်ပိုအ် ပွိုၚ်တိုက်ကၠအ်သတ် ပွိုၚ်ဍုၚ်မုဟ်ဍုၚ် မိစောအ် ဆက်ဟီုရ။
သွက်တၠကမၠောန်ဝါဗ္ၚဂှ် လိက်ဂွံအခေါၚ်ကၠောန်ဝါဗ္ၚ (ပုံစံ ရ) နွံမ္ဂး နူကဵုအလဵုအသဳတံ ဒမၠေံကဵုသြန်ဗာဏ် (လယ်ယာစိုက်ပျိုးရေးဘဏ်) တၠဝါမွဲတၠ မွဲဧကမ္ဂး (၂) ကိုဋ် ဒမၠေံကဵုနွံကီုရ။
ၚုဟ်သြောံပြဟ်ဟ်ဏံဂှ် သြောံမောဝ် (ပေါ်ဆန်မေႊး) (၁၀၀) နမ္ဂး ၚုဟ်နွံအကြာ (၁၀) ကိုဋ်၊ သြောံဣဇၞော် (၁၀၀) နမ္ဂး ၚုဟ်နွံ (၉) ကိုဋ်ဘာ်၊ ဂကူသြောံဓမ္မတာဂှ်မ္ဂး ၚုဟ်အကြာ (၈) ကိုဋ်နွံရောၚ် ဂွံတီကေတ်ရ။
ပ္ဍဲတွဵုရးဍုၚ်မန်ဝွံ သၞာံ (၂၀၂၀) ဂှ် သၟာကၠောန်ဝါဗ္ၚကသီုဂှ် တိဝါနွံမံၚ် (၆၉၁,၇၀၀) ဧကတုဲ သၞာံ (၂၀၁၉) ဂှ်မ္ဂး တိဝါနွံ ၜိုတ် (၆၈၅,၀၀၀) ဧကရောၚ် ဂွံတီကေတ် နူကဵုစရၚ်ဌာနတဵုလွဳသြောံ (မြန်မာ့လယ်ယာစိုက်ပျိုးရေးဦးစီးဌာနစာရၚ်းအရ) ရ။
