မိလတိုပ် ဂျူလာၚ် ၂၈၊ ၂၀၂၁
ရုၚ်ဒါန်ဂဥုဲဇဳဝိတဒါန ဍုၚ်ဇြပ်ဗုဝွံ ဟိုတ်နူယဲကိုဝ်ဝေဒ် ကၠောံထၞာန်ဂၠိုၚ်ကၠုၚ်တုဲ မၞိဟ်ယဲတၟိဂှ် ဟွံဒုၚ်တဲရရောၚ် ဥက္ကဌဂကောံရုၚ်ဒါန်ဂဥုဲဇဳဝိတဂှ် ဟီုထ္ၜးရ။
ကြဴနူယဲကိုဝ်ဝေဒ် (၁၉) အသိၚ်အလိုန်တတိယဏံ ဂၠိုၚ်တိုန်တုဲ ရုၚ်ဒါန်ဂဥုဲဇဳဝိတဒါနဝွံ မၞိဟ်ယဲတြေံဂှ်ရ ဆက် ကဵုအာဂဥုဲ ကုမၞိဟ်ယဲရ။
“ယဲကဝ်ဗေတ် အသိၚ်တတိယဏံ ကြီုမံၚ်တုဲတှေ် ပိုဲအရိၚ်ထောံမၞိဟ်၊ မၞိဟ်ယဲတြေံဂှ်ရ ဟွံစမ်ရပုဟ် ထ္ၜးလိက်တုဲ ကဵုကေတ်ဂဥုဲရ၊ မၞိဟ်ယဲတၟိဂှ် ဟွံဂံၚ်ဒုၚ်တဲဏီပုဟ်” သာ်ဝွံ ဥက္ကဌဂကောံရုၚ်ဒါန်ဂဥုဲဇဳဝိတဒါန နာဲအံၚ်ယှိုဲ ဟီုရ။
ရုၚ်ဒါန်ဂဥုဲဇဳဝိတဒါနဝွံ စတံနူယဲဆီၜေတ် (သွေးတိုး)၊ ယဲခယျာဍာတ် (ဆီးချို) ကီု ပဲါနူဂှ် ယဲတၞဟ်ဟ်ကီု စမ်ၜတ်တုဲ ကဵုဒၟံၚ်ဂဥုဲ နကဵုသက္ကုၚုဟ် (မးမး) ရ။
“ပံက်လဝ် (၃) တ္ၚဲဂှ်ပၠန်ရ အတိုၚ်တြေံဂှ်ရ၊ မတ်ရ လ္ပါ်ကရေက်ဂှ် ဒေါံဇူလဝ် နူကဵုကဝ်ဗေတ် က္တဵုဒှ်တုဲဂှ်ရ ပိုဲဒေါံထောံ၊ ဆဂး တ္ၚဲညးကဵုညးတှေ် ကၠုၚ်မံၚ်ဒှ်ဗီုဂှ်၊ မွဲသတ္တဟတှေ် မၞိဟ်ဗၞတ်ၜိုတ် (၄၈၀/၅၀၀) တၠနွံရောၚ်” သာ်ဏံ နာဲအံၚ်ယှိုဲ ဆက်လဴထ္ၜးရ။
ရုၚ်ဒါန်ဂဥုဲဇဳဝိတဒါနဝွံ စတံနူသၞာံ (၂၀၀၉) ဂိတုဒဳဇြေမ်ဗာ (၁၂) ဂှ် စသိုၚ်ခၞံလဝ်တုဲ (၂၀၁၁) ဂိတုဂျာန္နဝါရဳ (၁၂) ဂှ် စဒုၚ်တဲ လွဳလွတ်ဒၟံၚ်မၞိဟ်ယဲ၊ ကဵုဒၟံၚ်ဒါန်ဂဥုဲ ကုမၞိဟ်ယဲဂမၠိုၚ် ဇၟာပ်တ္ၚဲစန်၊ တ္ၚဲဗုဒ္ဓဝါ၊ တ္ၚဲသ္ၚိသဝ် မွဲသတ္တဟမ္ဂး ပွိုၚ် (၃) တ္ၚဲ လွဳလွတ်ဒုၚ်တဲမၞိဟ်ယဲရ။
0 Comments