ပ္ဍဲဂိတုအံက်ဒဝ်ဗာ စၟတ်တ္ရဲ(၂၉)ဂှ် ပ္ဍဲတွဵုရးဍုၚ်ချေၚ်၊ ဍုၚ်ဌာန်တလာန်ဝွံ နူကဵုဂံၚ်ဇဳပၞာန်တအ် နကဵုလွတ်ဇၞော်ဇၞော် ပန်ပှော်လဝ်ဂှ်ရ သ္ရိဌာန်ကီု သီုကဵုဘာလိကျာ်ၜါဘာ ဒးအာဘဲပၟတ်ဂးတုဲ နူကဵုဌာနပရိုၚ်လုပ်ကဵုသၞောဝ်တအ် ပတိုန်လဝ်ဂှ်ဂွံဆဵုကေတ်ရ။
ပရိုၚ်ဂှ် အဃောသ္ကုတ်မြဟ်ဒၟံၚ် လ္တူSocial Mediaဂှ်ရ ပ္ဍဲကဵုဂိတုအံက်ဒဝ်ဗာ(၃၀)အခိၚ်နူဂယးဂှ် ကေတ်လဝ်ဗီုရုပ် ညးဒးလဝ်ဘဲပၞာန်တအ် ဆုတ်ပြံၚ်မံၚ်တအ်ဂှ်တုဲ ပ္တေံာလဝ်ဗီု ညံၚ်ကဵုညးဍုၚ်ကွာန်ဌာန်တလာန်တအ် ဒးလဝ်ဘဲပၞာန်တုဲ ဒးဆုဲပြံၚ်လဝ်ကီုစုတ်ပပ္တောံလဝ်ဗီုပတောံတုဲ နကဵုက္ဍိုပ်လိက်”ထန်တလန်မြို့ကို စွန့်ခွာနေကြရတဲ့ ကျတော်တို့ အသွေးအသားများ”ဂးတုဲ တြးပတိတ်ကၠုၚ်ပရိုၚ်ပတောံရ။
“ဗီုရုပ်ပတောံ အတိုၚ်ပါမံၚ်ပ္ဍဲပရိုၚ်ဂှ်တှေ် ဗီုရုပ်မၞိဟ်ဒးလဝ်ဘဲပၞာန်တုဲ ဒးဆုဲပြံၚ်မံၚ်တအ်ဂှ် နူကဵုဍုၚ်ဌာန်တလာန်တေံ ဟွံသေၚ်မွဲရ။ ဗီုပတောံဏံဝွံ နူကဵုသၞာံ(၂၀၁၈)တေံ ပ္ဍဲတွဵုရးဍုၚ်ကချေၚ်ဂှ် ဂံၚ်ဇဳပၞာန်ကဵုKIAတအ် ဒှ်လဝ်ပေါဲဗတိုက်ညးသ္ကအ်တုဲ ဒှ်မံၚ်ဗီုရုပ်ညးဍုၚ်ကွာန်ကချေၚ်တအ် အဃောဒးဆုဲပြံၚ်လဝ်ဟေၚ်ရ။” သာ်ဝွံ နူကဵုဌာနပရိုၚ် pageတွေးပြီးမှယုံ တအ် စၟဳစၟတ်ပတိုန်ထ္ၜးလဝ်ရ။
ကေတ်နၚ်လဝ်ဗီုနူပရိုၚ်ဒးဒးဇဂှ်တုဲ ကလေၚ်ပတိုန်မံၚ်ပ္ဍဲပရိုၚ်ဗၠေတ်တ်ဂှ် သိက္ခာပရိုၚ်ဒးဒးတအ်ဇှေ်အာမာန်ရ။ ပတိုန်ထ္ၜးဒၟံၚ်ပရိုၚ်ဗၠေတ်တ်ကီု၊ ကေတ်လဝ်ဗီုရုပ် နူကဵုဌာန်ပရိုၚ်မွဲမွဲဒၞာဲကီု ပတိုန်ထ္ၜးမံၚ် ပရိုၚ်ပတောံညးသ္ကအ်ဂှ် ဒှ်အခက်ခုဲကဵုပုရိသာဒ် ညးမဗှ်မံၚ်ပရိုၚ်တအ်ရ။ တုဲပၠန် ဒှ်အန္တရာယ်ကဵု ညးဗက်ကၠာဲပရိုၚ်၊ စၟဳစၟတ်မံၚ်ပရိုၚ်တံရ။
ချူပတိုန်ထ္ၜးမံၚ်ပရိုၚ်ပတောံ လ္တူSocial Mediaတအ်ဂှ် တုပ်ညံၚ်ရဴကဵုအန္တရာယ်ကဵုမၞိဟ် ပ္ဍဲလိုက်ပိုဲကီုရ။ ဟိုတ်ဒှ်သာ်ဂှ်ရ ပုရိသာဒ်ညးမဗှ်မံၚ်ပရိုၚ်တအ်ညးဂမၠိုၚ်လေဝ် ဆဵုတမ်ရိုဟ်ပရိုၚ်မွဲမွဲမ္ဂး လ္ပဇှေ်စိုတ်၊ လ္ပပတှေ်ပြဟ်ဏီညိ။ ဗက်အာကၠာဲဗှ်ရံၚ် ပ္ဍဲဌာနပရိုၚ် လုပ်မံၚ်ကဵုသၞောဝ်တအ်ကၠာညိဂှ် မိက်ဂွံဗတိုက်ဖအာဝ်ဏာကဵုရ။
