မိလတိုပ်၊ ဂျာန္နဝါရဳ ၁၄၊ ၂၀၂၂
အသေအဟာန် တ္ၚဲကောန်ဂကူမန် မရနုက်ကဵု (၇၅) ဝါ သဘၚ်ရတ်ဗိုတ် (ဗဟဵု) ဂှ် ကိုပ်ကၠာတေံ ကမ္မတဳကၠောန်ဗဒှ်တံ ရန်လဝ် သွက်ဂွံကၠောန်ဗဒှ်အာ ပ္ဍဲၝောံခန် တွဵုရးဍုၚ်မန် (ဍုၚ်မတ်မလီု) ဂှ် ဟိုတ်နူဟိုတ်နွံနာနာသာ် ထေက်ကဵုဒးပြံၚ်ထေက်ရောၚ်ဂးတုဲ ပြံၚ်ပဆုဲအာ ပ္ဍဲဘာရာမညရဋ္ဌဗုဒ္ဓတက္ကသိုလ်၊ ဍုၚ်မတ်မလီုရောၚ် ဒုဥက္ကဌ လၟေၚ် (၁) ကမ္မတဳကၠောန်ဗဒှ် နာဲဗညာမန် (နာဲအံၚ်ထူ) ဟီုရ။
“တ္ၚဲကောန်ဂကူမန် (ဗဟဵု) ဂှ် ဆေၚ်ကဵုအလုံကောန်ဂကူပိုဲဖအိုတ်ဏောၚ်၊ လဆောဝ်လဆောဝ်တှေ် ပ္ဍဲပိုဲလေဝ် လညာတ်ဍေံဟွံတုပ်ဍေံနွံ၊ လ္ၚဵုဂှ်တှေ် ဂွိၚ်ကဵုပရေၚ်ဂီုကၠီုကီု၊ ဟီုစလေဝ် ဗီုကဵုၝောံခန်တွဵုရးတေံ ဖျေံလဝ်သ္ဂုတ်သွာတ်ဍေံနွံ၊ အဵုဏံလေဝ် ဠပိုဲဒးသ္ၚဳဂၠိပ်ဟဏံလေဝ် ရမျာၚ်ညးဍုၚ်ကွာန် ကောန်ဂကူမန်ပိုဲကီု အကာဲအရာ လၟေၚ်ကမၠောန်လ္ပာ်ပိုဲကီု ဟိုတ်ဍေံနွံတၟာဂလိုၚ်လေဝ်၊ မွဲဟိုတ် ၜါဟိုတ်ဓဝ်ဟွံသေၚ်၊ လတူဏံ ပိုဲသ္ၚဳဂၠိပ်တုဲတှေ် ထေက်ကဵုဒပြံၚ်ဟီုဂှ်တုဲတှေ် ပိုဲပြံၚ်အာ ဒၞာဲရာမညရဋ္ဌတေံ” နာဲဗညာမန် ဟီုထ္ၜးရ။
အသေအဟာန် တ္ၚဲကောန်ဂကူမန် မရနုက်ကဵု (၇၅) ဝါ သဘၚ်ရတ်ဗိုတ် (ဗဟဵု) ဂှ် နူကဵုကောံဓရီုကမ္မတဳကၠောန်ဗဒှ် လၟေၚ် (၁၀/၂၀၂၁) တေံ သွက်ဂွံကၠောန်အာ ပ္ဍဲကဵုဒၞာဲၝောံခန် တွဵုရးဍုၚ်မန် လတူဍုၚ်မတ်မလီုရောၚ် ဖျေံလဝ်နွံရ။
ဆဂးဂှ် ဟိုတ်နူဟိုတ်နာနာသာ် သ္ၚဳဂၠိပ်တုဲ မ္ဒးပြံၚ်ပဆုဲဏာ ပ္ဍဲကဵုဘာရာမညရဋ္ဌဗုဒ္ဓတက္ကသိုလ် ဍုၚ်မတ်လီုဂှ်ရ၊ “ပ္ဍဲကဵုဝၚ်ကၠောန်တ္ၚဲကောန်ဂကူမန် ဗဟဵု ဂွံပြံၚ်ပဆုဲဒၞာဲဟီုဂှ် နွံအောန်မံၚ်၊ မၞိဟ်လ္ၚဵု ဟိုတ်နူဖျေံလဝ်သ္ဂုတ်သွာတ်တုဲ ဟွံမိက်ပြံၚ်လဝ်နွံ၊ ဆဂး အိုတ်ကၞောတ် ပိုဲသ္ၚဳဂၠဳပ်မွဲတၚ်တုဲ မွဲတၚ်တုဲတှေ် ထေက်ကဵုပိုဲဒးပြံၚ်” နာဲဗညာမန် ဆက်ဟီုရ။
စပ်ကဵုပရေၚ်ပဆုဲပြံၚ် ဒၞာဲကၠောန်ဗဒှ် အသေအဟာန် တ္ၚဲကောန်ဂကူမန်ဗဟဵုဂှ် ဂိတုပုဟ် (၈) မံက်၊ ဂျာန္နဝါရဳ (၉) ဂှ် ဒဒှ်ရ ပြံၚ်ပဆုဲအာ ပ္ဍဲဘာရာမညရဋ္ဌဗုဒ္ဓတက္ကသိုလ်ရောၚ်ဂှ် ကမ္မတဳကၠောန်ဗဒှ်တံ လလောၚ်တြးပတိတ်လဝ် လိက်နွံရ။
အသေအဟာန် တ္ၚဲကောန်ဂကူမန်ဗဟဵုဂှ် နကဵုကြက်ရှ်သာ မနွံဍိုက်ပေၚ်ဗွဲမသၠဲလးကီု၊ ဒၞာဲရေၚ်တၠုၚ်ဖန်ဇန် လောဲသွာကီုတုဲ ဌာနကၠောန်ဗဒှ် အသေအဟာန်ဂှ် ပြံၚ်လှာဲထေက်ရောၚ် ကလေၚ်သ္ၚဳဂၠိပ်ကၠုၚ် ပ္ဍဲကောံဓရီုလၟေၚ် (၁၂/၂၀၂၂) စၟတ်တ္ၚဲ (၂-၁-၂၀၂၂) တုဲ သ္ဂုတ်သွာတ်လဝ်ရ။
