အံက်သာ၊ ဂိတုအေဗရဴ ၁၃၊ ၂၀၂၂

နူကဵုဌာနပရေၚ်ပညာကောန်ဂကူမန် ပံက်လဝ်ဂကောံထံက်ပၚ် ပရေၚ်ပညာကောန်ဂကူမန် နကဵုယၟု “ဂကောံညးဆာန်ပရေၚ်ပညာမန်” မွဲဂိတု (၁၀၀၀) ဒ္ကေဝ်တုဲ ညးဆာန်ဂကူ ဆာန်လိက်ပတ်တံ လုပ်ကၠုၚ်ဂကောံသေဲသေဲရ၊ လောန်ကၠုၚ်ခြာဟွံလအ်တေံ နူညးတၠဒါန် နာဲတၠမာန် (ကွာန်သာံလှေဝ်) ကေုာံ သမ္ဘာမိသူဇာ (ကွာန်ကအ်ခပုၚ်) အလုံမွဲဂြောဝ်ဂတာညးတံ ထံက်ပၚ်လဝ်သြန် သွက် (၁၀၀) သၞာံ လၟိဟ်ဩန်ဖအိုတ် (၄၈၀၀၀၀၀) ပန်စှော်ဒစါံကိုတ်ဒ္ကေဝ် မံက်ပြာကတ်ကၠုၚ်တုဲ ညးတၠဒါန်တံ ထပ်မံက်ကၠုၚ်သေဲသေဲရ။
ပ္ဍဲကဵုစၟတ်တ္ၚဲ (၅-၄-၂၀၂၂) ဂှ် တၠဂုဏ်အ္စာဥက္ကံသ (တၠဂုဏ်အဇ္ဇ-တရဴအအာ) ဂှ်လေဝ် ရန်ကဵုပရေၚ်ပညာကောန်ဂကူမန် ဂွံအာဍာ်ဇမၠိၚ်မာန်ကီု၊ ဂွံဒှ်အထံက်အပၚ်ကဵု သြန်ထံက်ပၚ်အာစာဘာမန်တအ်ကီုတုဲ လုပ်ဂကောံညးဆာန်ပရေၚ်ပညာမန်ကီုရ၊ ပ္ဍဲအစဳအဇန်သြန်ထံက်ပၚ်ဂကောံ မွဲဂိတု (၁၀၀၀) ဒ္ကေဝ်ဂှ် ညးစုတ်ကဵုသြန်ထံက်ပၚ် သွက် (၁၀၀) သၞာံ လၟိဟ်သြန်အပံၚ် (၁၂၀၀၀၀၀) စှ်ၜါကိုတ်ဒ္ကေဝ်ရ၊ သြန်ထံက်ပၚ်တံဂှ် တၠဂုဏ်အ္စာအဇ္ဇ က္လိဂွံနၚ်နူဒါန်တွံဓရ် ဍုၚ်ဖူကေတ် (ဍုၚ်သေံ) ရောၚ် ဂွံတီကေတ်ရ။
ပ္ဍဲကဵုစၟတ်တ္ၚဲ (၇-၄-၂၀၂၂) ဂှ်လေဝ် အ္စာသဝ် နာဲစောန်တၟး (Dr.မၚ်းစိုးလၚ်း) ကေုာံ သမ္ဘာ မိကောန်ထဝ်တံ ရန်ကဵုပရေၚ်ပညာကောန်ဂကူမန် ဂွံအာဍာ်ဇမၠိၚ်မာန်ကီု၊ ဂွံဒှ်အထံက်အပၚ်ကဵု သြန်ထံက်ပၚ်အာစာဘာမန်တအ်ကီုတုဲ လုပ်ဂကောံညးဆာန်ပရေၚ်ပညာမန် သ္ဒးစုတ်သြန်ထံက်ပၚ်ဂကောံ မွဲဂိတု (၁၀၀၀) ဒ္ကေဝ်ဂှ် စုတ်ကဵုသြန်ထံက်ပၚ် သွက် (၁၀) သၞာံ သွက်ညး (၂) တၠ လၟိဟ်သြန်အပံၚ် (၂၄၀,၀၀၀) ၜါကိုတ်ပန်ဠက်ဒ္ကေဝ်ကီုရ။
ပ္ဍဲကဵုစၟတ်တ္ၚဲ (၄-၄-၂၀၂၂) ဂှ်လေဝ် တၠဂုဏ်အ္စာခေမာသာရ (ရာမညရဌဗုဒ္ဓတက္ကသိုလ် – ဍုၚ်မတ်မလီု) ကဵုဒါန်ကမ္မဝတ္ထု ထံက်ပၚ်ပရေၚ်ပညာ သြန် (၂၀၀၀၀၀) ၜါကိုတ်ဒ္ကေဝ် ကုဌာနပရေၚ်ပညာကောန်ဂကူမန်ဂှ် ဒု -လျိုၚ်ဌာန မိကြက်နန် ဒုၚ်တဲရောၚ် ဂွံတီကေတ် အတိုၚ်မပတိုန်လဝ် လ္တူမုက်လိက်လပှ်ကျာ Mon National Education Committee ဂှ်ရ။ စိုတ်ဆာန်ဂကူ စိုတ်ဆာန်ပရေၚ်ပညာမန် ညးတၠဒါန်တံ နွံသာ်ဏအ်ဂှ် နူဌာနပရေၚ်ပညာကောန်ဂကူမန် (ဗဟဵု) တံလေဝ် သီုကေတ်ဂုဏ်စရာဲ သီုပတိုန်ဏာဂုဏ်စရာဲ ဗွဲမဇြိုဟ်နက်တုဲ မွဲကရောံဓဝ် သီုကဵုဆဝ်မ္ၚုဟ်လဝ် ညးမဆာန်ဂကူ ညးမဆာန်ပရေၚ်ပညာတအ် ညံၚ်သ္ဂောံ လုပ်ဂကောံညးဆာန်ပရေၚ်ပညာမန်တုဲ ဒက်ပတန်ပရေၚ်ပညာမန် မၞုံကဵုဍာ်ဒ္ကေဝ် သာ်ဏံ ဆဝ်မ္ၚုဟ်လဝ်ရောၚ်။