ဝဏ္ဏမာန်၊ ဂိတုဂျူလာၚ် ၁၄၊ ၂၀၂၂

တၠပညာအ္စာလိက်တၟအ်မန် နာဲဗယှေန် စိုတ်ထတ်ကဵု ပရေၚ်သိုၚ်နန်တုဲ ဇၟာပ်ဆဵု ခမဳသၚ် က္ဍိုပ်သ္ကိုပ်တအ် ဆဝ်မ္ၚုဟ် ဟီုဖ္တိုက်ဖၟောဝ်ကၠုၚ် ပရေၚ်သိုၚ်နန်လၟိုန်ရ။
ဟိုတ်နူအ္စာနာဲဗယှေန် စိုတ်ထတ်ကဵု ပရေၚ်သိုၚ်နန်ဂှ်တုဲ တန်ဗ္တောန်လိက်တၟအ်တုဲဂှ် အာဆဵုဂဗသဳကၠဳကဵု တၠဂုဏ်အ္စာပုပ္ဖရမ္မ (ထပိုဲဍောတ်) ပ္ဍဲကျာ်ဒဵုတၟံဗြာတ်ရ။
“သိုၚ်နန်ဏံဂှ် မုပရောတှေ် ပိုဲဨကရာဇ်ဟွံမွဲပုဟ်ဟီုတှေ် ကောန်မန်ပိုဲ ယဝ်ရနန်နွံတှေ် စၞးဨကရာဇ်ဟွံမွဲကီုလေဝ် ညာတ်နန်ဏံတှေ် စိုတ်ဓာတ်ခိုၚ် ဂကူစရာဲနွံညိ ဇြဟတ်မုက်မတ်ဟွံဒးဍောတ်၊ ဟိုတ်နူဂှ်ရ အာဆဵုကဵု ထပိုဲဍောတ် (ကျာ်ဒဵုတၟံဗြာတ်) တေံတုဲတှေ် အဲဟီုကဵု ကျာ်ဇၞော် (ထပိုဲဍောတ်) ကျာ်ဇၞော်ရ ဇြဟတ်နွံ အခိၚ်ခိုဟ်ဏံ လိက်တၟအ်လေဝ် သွက်ဂွံသိုၚ်နန်ဂှ် လိက်တၟအ်လေဝ် ပြာကတ်မံၚ် ယၟုနန်လေဝ်ပြာကတ်မံၚ်၊ ဒၟာနူဍိုက်ပေၚ်မံၚ်ဗီုဏံဂှ်ရ မိက်ဂွံဗၟံက်ပ္တိုန် မိက်ဂွံစွံပ္တန်ကျာ်” ဗီုအ္စာဗယှေန် ဟီုပ္တိုန်ထ္ၜးလဝ်ကဵု ကျာ်ဇၞော်အ္စာပုပ္ဖရမ္မဂှ် ညးဟီုထ္ၜးရ။
အ္စာဗယှေန်ဝွံ ဒှ်ညးစိုန်သကီု ပ္ဍဲကဵုလိက်တၟအ်မန်တုဲ ယဝ်ရဂွံသိုၚ်ပ္တန်ဝၚ်နန် တုပ်တဴကဵု နန်ဨကရာဇ်သၟိၚ်မန်မ္ဂး ဂကူမန်ဂှ် သာတုဲသက်သဳကၠဳခိုၚ်ကၠိုက်ကၠုၚ်ကီု၊ လက်သန်စရာဲဂကူ သာတုဲ ဍိုက်ပေၚ်ရောၚ် ညးဒုၚ်ဂိုၚ်ကေတ်လဝ်ရ။
ဟိုတ်နူအ္စာဗယှေန် စိုတ်ထတ်ဒၟံၚ်ကဵု ပရေၚ်သိုၚ်ပ္တန်ဝၚ်နန်ဂှ်တုဲ ဇၟာပ်ဆဵုကျာ်ဇၞော်အ္စာတအ်ကီု၊ ဇၟာပ်ညးဆဵုကဵု က္ဍိုပ်သ္ကိုပ်သွာၚ်လိက်ပတ် ကေုာံ က္ဍိုပ်သ္ကိုပ်ပရေၚ်ဍုၚ်ကွာန်တအ်ကီု ညးဟီုဆဝ်မ္ၚုဟ် ပရေၚ်သိုၚ်ပ္တန်ဝၚ်နန်ဂှ်လၟိုန်ရ။
“ယဝ်ရသိုၚ်နန်မန်တှေ် ပ္ဍဲကဵုဗကာံတေံ နွံတၟာဂလိုၚ်ဏီ၊ ဟွံလီုလာ်ဏီပုဟ် ပြသာဒ်တဂှ် ဝၚ်နန်တဂှ် သ္ၚိစၠတ်တဂှ် သှေ်မံၚ်အတိုၚ်ဂှ်ဏီ၊ နဲကဲဂွံသိုၚ်ပ္တန်နန်ဂှ် နွံမံၚ်ပေၚ်ပေၚ်၊ ဆဂး ကၠာတေံ ကၠောန်လဝ်ကဵုဆု၊ လၟုဟ်တှေ် ကၠောန်ကဵုတိဗဳလာတ် ကၠောန်ကဆံၚ်စိုပ်စိုပ်ဂွံမံၚ်” အ္စာနာဲဗယှေန် ထပ်ဟီုပရော ဗီုပြၚ်ဂွံသိုၚ်ပ္တန်နန်ဂှ်ရ။
အ္စာဗယှေန်ဝွံ ၜိုန်ရညးအဝဲဇၞော်ဗျုကီုလေဝ် စပ်ကဵုဝၚ်နန်မန်ကီု၊ စပ်ဝၚ်လိက်တၟအ်မန်ကီု စိုတ်ဓာတ်က တိုၚ်ကၟိုဟ် ကၠောန်သ္ပရေၚ်တၠုၚ်ဒၟံၚ်တုဲ လိက်တၟံဝၚ်ကျာ်လ္ဂုၚ် နူလ္ဂုၚ်ကီု၊ လိက်တၟံဝၚ်မန် နူဍုၚ်ဗကာံကီု၊ လိက်တၟံဝၚ်မန် ဍုၚ်(ကျောက်ဆည်း) ဗီုမှာထေရ်အရဟံ ပတန်သာသာနာ ပ္ဍဲဍုၚ်ဗကာံကီု လိက်တၟံအိုတ်သီုဂှ် ဍာပ်ပတုပ်လဝ်တုဲ ကလေၚ်ပုတ်ပတုပ်လဝ် လိက်တၟံဝၚ်မန် အတိုၚ်နူလိက်တၟံဝၚ်မန် နူတံပကတိတေံတုဲ စွံပ္တန်လဝ် ပ္ဍဲအရှာံဘာကျာ်ဒေါဝ်သာသနာ (၂၅၀၀) ဍုၚ်မတ်မလီုရ။