သဘၚ်ကျာ်ဇၞး ပ္ဍဲပွိုၚ်ဍုၚ်ဇြပ်ဗုဂှ် သၞာံဏံ ဟွံကၠောန်သဘၚ်ကျာ်ရပုဟ်ဂှ် ဂွံတီကေတ် နူကဵုဂကောံဂေါပကတံရ။
ရံၚ်အာ လ္ပာ်ပရေၚ်ဍုၚ်ကွာန်ဟွံညိၚ်ဝတ်ကီု အကာဲအရာယဲကိုဝ်ဗေတ်ကီုတုဲ ဟွံကၠောန်သဘၚ်ကျာ်ဇၞးရပုဟ်ဂှ် ဂေါပကမွဲတၠ ဟီုကၠုၚ်လဝ်ဗီုဏံနွံရ။
အေန်တာဗျူ “နူကဵုဍေံဟွံၜိုဟ်သြိုဟ်ဏီလေဝ် ဒးဟီုစသောၚ်ၚ်၊ ဆ္ဂး ပိုဲဂှ် ထ္ၜးလဝ်ဟိုတ် ယဲကိုဝ်ဗေတ်တေံ ဟွံအိုတ်ဏီ၊ ဟိုတ်ဂှ်ရ ဟွံဒှ်ကၠောန်လေဝ်၊ ကၠောန်ပၠန်လေဝ် ကၠောန်ဗီုကဆံၚ်သၞာံအာတေံရလေဝ်၊ သၞာံတုဲကၠုၚ်တေံဂှ်တှေ် ဗဝ်သၟတ်ပ္ဍဲကျာ်တေံ ဖ္ဍောတ်ပဌာန် ၜိုတ်စဂှ်ရ” သာ်ဝွံ ဂးရ။
တုပ်သာ်ဂှ်ကီု တုဲကၠုၚ် ဂိတုအံက်တဝ်ဗာ ၃၁ ဂှ်လေဝ် နူကဵုဂကောံဂေါပကတအ် ပ္တိတ်လဝ် လိက်ဆဝ်မ္ၚုဟ်ဂှ်တှေ် “ပ္ဍဲသၞာံ ၁၃၈၅ ဏံ ရံၚ်ကဵုအကာဲအရာ ယဲကၠောံထၞာန်ဂၠးတိ မက္တဵူဒှ်ဒၟံၚ်ဂှ်တုဲ မဒှ်ဓဝိၚ် ဂွိၚ်ဖေက် မၞိဟ်ဂမၠိုၚ် ကောံကလောံကၠုၚ်ဇၞော်ကဵုဇြဟတ်ဂှ်တုဲ ပ္ဍဲသၞာံဏံ ကၠောန်ဗဒှ်အာ သဘၚ်ကျာ် ဟွံသေၚ်ရရောၚ်” သာ်ဝွံ ပ္ဍဲကဵုလိက်ဆဝ်မ္ၚုဟ်ဂှ် ချူဓမံက်လဝ်နွံကီုရ။
ၜိုန်ရဟွံကၠောန်သဘၚ်ကျာ်ဇၞးကီုလေဝ် ရံၚ်ကဵုလၟေၚ်အခိုက်ကၞာထိၚ်ဒဝ်ကၠုၚ်လဝ် လၟိဟ်ကဵုကၠံသၞာံတေံ ညံၚ်ဟွံဂွံကၠေံဗ္ဒန်အာဂှ်ရ ကၠောန်ဗဒှ်အာသဘၚ် “ဗုဒ္ဓပူဇနဳယ” အယာံမာတ် ဖ္ဍောတ်သ္ပပူဇဴဓရ်ပဌာန်ကဵု သ္ပပူဇဴရှေ်သှေ်ပိဏ္ဍပါတ်ကုကျာ်တြဲ ပ္ဍဲဂိတုကထိုန် (၁၄၊ ၁၅) မံက် ၜါတ္ၚဲရတုဲ ပေဲါသဘၚ်မိပ်ဇြိပ် လဟိၚ်စိုတ်တံ ဟွံမွဲပုဟ်ဂှ်လေဝ် ဂးလဝ်ဗီုဏံနွံရ။
အေန်တာဗျူ “ပိုဲဟီုဂှ်တှေ် နူလၟုဟ် သၞာံဏံရ ဟွံသေၚ်ပုဟ် သၞာံတုဲတုဲကၠုၚ်ဂှ်လေဝ် ပိုဲစွံလဝ် ကဆံၚ်ပရေၚ်ကမၠောန်သ္ပအဘၚ်ဟီုဂှ် ဟွံကဵုဂၠိုၚ်နူသၞာံတုဲတုဲကၠုၚ်တေံပုဟ်၊ သၞာံတုဲကၠုၚ်တေံလေဝ် ပိုဲသ္ပကၠုၚ်လဝ်သဘၚ် ညံၚ်ရဴတုဲတုဲကၠုၚ်တေံဂှ် ဟွံသေၚ်ပုဟ် ပိုဲဖအောန်ထောံဏောၚ်ဟီုတှေ် သ္ပအဓိကကဵု ပရေၚ်ယဲအန္တာရာယ်တအ်တုဲ ညံၚ်ဟွံဂွံပြံက်နှဴဂှ် ပိုဲသ္ပလဝ်တၚ်အဓိက” သာ်ဝွံ ဂးရ။
ကျာ်ဇၞးဂှ် မၞုံပ္ဍဲပွိုၚ်ဍုၚ်ဇြပ်ဗု အကြာကွာန်အၚ်ခေဝ်ကဵု ကွာန်ဝါဂၠံၚ်တုဲ သ္ၚောဲခြာနူ ပြၚ်ၜဳ ဗၞတ် (၁) တိုၚ်ကဵု (၆) ဖာလုၚ်ရ၊ စိုပ်ကွာန်အၚ်ခေဝ်ကီု၊ ကွာန်ဝါဂၠံၚ်ကီု တုဲတှေ် ထပ်စှေ်အာဒိုဟ်ပလိုတ်မ္ဂး စိုပ်ဝါဗ္ၚကၠာရ၊ နူကဵုဝါဗ္ၚဂှ် ထပ်စှေ်အာညိပၠန်ဂှ် ဂွံဆဵုကေတ် ပြၚ်ၜဳဗ္တဳမွဲဒမြိပ်တုဲ ရံၚ်စှေ်အာ လ္ပာ်ဗလးၜဳမှာသၟိတ်တေံမ္ဂး ဂွံဆဵုကေတ် ဗီုရုပ်က္ၜၚ် ကော်ခဴစ ကျာ်ဇၞး ရ။
တုဲကၠုၚ် သၞာံ (၂၀၂၁)ဂှ် သ္ပဟိုတ်ကဵု အကာဲအရာယဲကၠောံထၞာန် (ကဝ်ဗေတ် ၁၉) တုဲ ဂကောံဂေါပကတံ ၜိုန်လလောၚ်တြးလဝ် ဟွံကၠောန်တဴသဘၚ်ကီုလေဝ် တ္ၚဲကထိုန် ၃ စွေက် (နဝ်ဝေမ်ဗာ ၂၁) ဂယးဂှ် မၞိဟ်ကၠုၚ် လ္ၚောဝ်ကျာ်နူဌာန်သ္ၚောဲ ဌာန်ကြပ်ဂမၠိုၚ် ကောံဂၠောဲကၠုၚ် လ္ၚောဝ်ကျာ်ဇၞးတုဲ ဍာ်ၜဳတိုန်ထတ်သ္ကာတ်ဂှ် မၞိဟ် ၆၀-၇၀ တၠ ဒတုံစှေ်အာနူသၟဝ်ဂၠံၚ်ဒေဝတဴဂှ်တုဲ မၞိဟ်ဗၞတ် ၂၀ တၠပြၚ် ဒးအိုတ်အာလမျီုနွံဂှ် ဂွံတီကေတ်ရအဴ။
