သၞာံတုဲကၠုၚ်တေံ ကံင်ဇြဳပၞာန်မသီလဝ်အဝဵုတံ ပတိတ်ကၠုင်လဝ် သၞောဝ်ဥပဒေညးဍုင်ကွာန် ဒးယိုက်ဂၠေင်ပၞာန်တုဲ ပ္ဍဲစၟတ်တ္ၚဲဂျာန်နဝါရဳ ၂၃ ဂှ် ထပ်ပ္တိတ်ကၠုင် ဥပဒေလၟေင်ကမၠောန် (နည်းဥပဒေ) ပၠန်ရ။

စၠတ်ထဝ်ဟၟဲမွဲသာ် ပွမသ္ပဒတန်လလောင်ပတိတ်မံင် သၞောဝ်ဥပဒေ မွဲတုဲမွဲ သာ်ဏံဂှ် ပတဝ်အာဒၟံင်လက္ချန်ဍုင်လီုရောင် ညးရေင်တၠုင်ဂဗုတ် (ရှေ့နေ) မန် ဝှ်ကြံၚ်မွဲတၠ ဟီုပါ်ပါဲ သာ်ဝွံရ။

“သၞောဝ်ဥပဒေမွဲမွဲ ဂွံသဳကၠဳဂွံ ဂွံသ္ပဒတန်ဂွံ ဂွံလလောင်တြးဂွံဟီုဂှ် ဒးနွံကဵုဂကောံအလဵုအသဳညးဍုင်ကွာန်ကဵုလဝ်မာဲဏောင်၊ ဒးနွံကဵုစၠတ်ထဝ်ဏောင် စၠတ်ထဝ်ဟွံမွဲ-မွဲသာ် ပတိတ်မံင်သၞောဝ်ဥပဒေ မွဲတုဲမွဲဗီုဏံဂှ် ပတဝ်အာဒၟံင် လက္ချန်ဍုင်လီုလီုဏောင်” ညးရေင်တၠုၚ်ဂဗုတ် (ရှေ့နေ) မန်ဂှ် ပါ်ပါဲရ။

သၞောဝ်ဥပဒေညးဍုင်ကွာန်တံ ဒးယိုက်ဂၠေင်ပၞာန်ပတိတ်ကၠုင်နူသၞာံတုဲတေံကၠုင်ဂှ် ဥပဒေလၟေင်ကမၠောန်ဟွံဂွံပတိတ်လဝ်မွဲသာ်ဂှ် နူစပတိတ်သၞောဝ်ဥပဒေဗက် တၠအဝဵုဒပ်ပၞာန်ဗၟာတံ စဗမံက်ကၠုင်ဒၟံင်ရုပ်ရဴမွဲဒမြိပ်အဆက်ဆက်တုဲ လၟုဟ်မ္ဂး ပံက်ကၠုင်ဘာပၞာန် စိုပ်ကၠုင်လၟေင် (၉) ဝါတုဲဒှ်အာရ။

နကဵုဆန္ဒညးဍုင်ကွာန်ဟွံသေင်မွဲသာ် ကၠောန်စုတ်ဏာအတေင်ဗီုဏံဂှ် တုပ်ညံင်ရဴထပ်ဗဂဵုပတိုန်ပၟတ်ပၞာန်ရောင် ညးရေင်တၠုင်ဂဗုတ်(ရှေ့နေ)မန်ဂှ် ဆက်ပါ်ပါဲရ။

“ကၠောန်ဟွံထေက်မွဲသာ် ကၠောန်စုတ်ဏာ ဗီုကဵုဥပဒေ ဒးယိုက်ဂၠေင်ပၞာန်ဏံဂှ် ညးဍုင်ကွာန်အလုံဍုင်တံ ဒှ်ခက်ခုဲ၊ ဒှ်ဒဒိုက် ဒးဂြိပ်ပါဲဒဴစိုပ်မံင်ဍုၚ်နာနာ၊ လ္ၚဵုပၠန်ဂှ် ဒၟာနူဒးလုပ်ပၞာန်ဗၟာ ဂှ်တှ်ေ ညးလုပ်ပၞာန်ဂကူညး ဂကူညး ဍေံဒှ်ကၠုင်၊ ဂကူဗၟာပၠန်လေဝ် ဒၟာနူဒးလုပ်ပၞာန်ဗၟာဂှ် ဍေံလုပ်ပၞာန်ပၠန်ဂတးဂကူဗၟာ ဗီုဏံဍေံဒှ်ကၠုင်၊ ဥပဒေ ဒးသ္ပကောန်ပၞာန်ဏံဂှ် တုပ်ပၟာ ညံင်ရဴထပ်ဗဂဵုပတိုန်ပၞာန် ညံင်ဂွံဒှ်သ္ကာတ်တိုန်ပၠန် ဒှ်အာဗီုဂှ်” သာ်ဝွံ ညးဆက်သ္ဂးရ။

ပ္ဍဲကဵုလၟေင်ကမၠောန်ဥပဒေ ညးဍုင်ကွာန်ဒးယိုက်ဂၠေင်ပၞာန်ဂှ်ဇၟာပ်ညးဍုင်ကွာန်အာယုက်ပေင် မၞိဟ်တြုံ စနူ ၁၈ သၞာံ အကြာ ၃၅ သၞာံ၊ ဇၟာပ်မၞိဟ်ဗြဴ စနူအာယုက် ၁၈ သၞာံ အကြာ ၂၇ သၞာံ ဒးယိုက်ဂၠေင်ပၞာန်တုဲ ကာလကာမံက်တိုန် ကတဵုဒှ်မ္ဂး အခိင်ဟွံရုဲ အခေါၚ်ဒပ်ပၞာန်ဗမာတအ် ကော်သ္ပကောန်ပၞာန်နွံတုဲ စဵုကဵုပွိုၚ် ၅ သၞာံ ဒးယိုက်ဂၠေင်တာလျိုင်ပၞာန်ရောင် ဗမံက်ထ္ၜးလဝ်ရ။

ယဝ်ခါရ အ္စာဂဥုဲသဝ်ဝန်၊ အေန်ဂျေန်နဳယာ၊ ညးလေပ်လဝ် ကွတ်ပညာကွတ်တဲကွက်စက်ဂမၠိုင် ဟွံသေၚ်မ္ဂး လေပ်လဝ်ကွတ်ပညာဂယိုင်လမျီုမွဲမွဲသာ်မ္ဂး မၞိဟ်တြုံ အကြာအယုက် ၁၈ သၞာံ ကဵု ၄၅ သၞာံ၊ မၞိဟ်ဗြဴမ္ဂး အကြာ ၁၈ သၞာံ ကဵု ၃၅ သၞာံ လုပ်အဝေါင်ဒးယိုက်ဂၠေင်ပၞာန်ကီုရောင် ချူလဝ်ရ။

အလုံမွဲကၟိန်ဍုင်ဗၟာဂှ် မၞိဟ်တြံအဝဲဒးယိုက်ဂၠေင်ပၞာန် လၟိဟ်နွံဗၞတ် ၆၃ ကိုဋ် ကေုာံ မၞိဟ်ဗြဴ လၟိဟ်နွံဗၞတ် ၇၇ ကိုဋ်ဒှ်တုဲ ပ္ဍဲကဵုဖအိုတ်လၟိဟ်မၞိဟ်တြုံ၊ ဗြဴ ၁၄ ကိုဋ်ပြင်င်ဂှ် ဟွံဂွံအခေါင်မွဲသာ် အခေါင်တိတ်အာဍုင်သ္အာင်ဟွံမွဲရောင် ပ္ဍဲကဵုလၟေင်ကမၠောန် (နည်းဥပဒေ) ညးဍုင်ကွာန်ဒးယိုက်ဂၠေင်ပၞာန် မလလောင်တြးကၠုင် နူဂျာန္နဝါရဳ စၟတ်တ္ရဲ  ၂၃ ဂှ် ချူဓမံက်လဝ်ရ။

“သၞောဝ်ဥပဒေပၞာန် ဒပ်ပၞာန်ဗၟာတံ ပတိတ်ဏံဂှ် ကအ်ဍေံ ဍေံရေက်စကေတ်ကေတ်ရ အဲညာတ်၊ မုဒှ်ရောတှ်ေ ညးဍုင်ကွာန်တံ ဒးသ္ပကောန်ပၞာန်ဏောင်ဟီုဂှ် နကဵုအလဵုဆန္ဒညးဍုင်ကွာန်တံ ဟွံစှ်ေစိုတ်မွဲသာ် ပတိတ်ကေတ်ဥပဒေ အတေင်ဏံဂှ်တှ်ေ ညးဍုင်ကွာန်တံ နကဵုကျအမိင်တုဲတှ်ေ ဒေါံဟွံဂွိုအ်တုဲမှ ဒးယိုက်ဂၠေင်ပၞာန်ဂှ် မွဲတ္ၚဲ ဂွံအခေါင်ခိုဟ်ညိဗက် ဍေံကလေင်ပလန်ကဵု ဒပ်ဗၟာ တံပၠန်ရ အဵုဇှ်ရ ဥပဒေဏံဂှ် ကအ်ဍေံ ဍေံရေက်ကေတ်ကေတ်ရ” သာ်ဝွံ ညးဍုင်ကွာန်ဟွံ စှ်ေစိုတ်ကဵု ဥပဒေယိုက်ဂၠေင်ပၞာန် နူဒေသကျာ်မြဟ် မွဲတၠ ဟီုရ။

သၞောဝ်ဥပဒေညးဍုင်ကွာန် ဒးယိုက်ဂၠေင်ပၞာန်(ဗၟာ)ဝွံ စနူလက်ထက်အလဵုအသဳ သမ္မတဥူတိင်သိင် ၂၀၁၀ ဂိတုနဝ်ဝေမ်ဗာ ၄ တေံ ချူဓဇက်လဝ်ဂှ် သဳကၠဳပတိုန်ထ္ၜးကၠုင် ပ္ဍဲစၠတ်ထဝ်အဆက်ဆက်ကီုလေဝ် ညးစၞးစၠတ်ထဝ်ဗွဲမဂၠိုင် ဟွံစှ်ေစိုတ်တုဲ ကာလစိုပ်လက်ထက် ပၞာန်သီအဝဵုဏအ် သၞာံ ၂၀၂၄ ဂိတုဖေဖဝ်ဝါရဳ ၁၀ ဂှ် ဂကောံကံင်ဇြဳပၞာန် မေန်အံင်လှာင်တအ် က္လေင်ရပ်စကာကၠုၚ် ဥပဒေဂှ်ရ။

လလောင်တြးပတိတ်ကၠုင် သၞောဝ်ဥပဒေလအ်ကြပ်ပွိုၚ်ကဵုသၞာံတုဲမှ တုဲကၠုင်ဂျာန်နဝါရဳ ၂၃ ဂှ် ထပ်ပတိတ်ကၠုင်ဥပဒေလၟေၚ်ကမၠောန် (နည်းဥပဒေ) ဖအိုတ် ၁၀ အခန် ကဵု ပိုဒ်ဖအိုတ် ၅၉ ပိုဒ်ပါလုပ်ရောင် ဂွံတီကေတ်ရ။