အသိၚ်ဒးလဗိုတ်ကျာထတ်လဝ် ဂိတုအေဗရဴတုဲကၠုၚ်ဏံဂှ်တုဲ ဒူရေန်ကြံၚ်ကြံၚ်ဂမၠိုၚ် ပြဟ်စှ်ေဂၠိုၚ်ကွေံကွေံရောၚ် တၠကၠအ်ဒူရေန် နူပွိုၚ်ဍုၚ်ရေဝ်မွဲတၠဂှ် ဟီုရ။
ဂိတုမေ ၁ မံက်ဗ္တံဂှ် လဗိုတ်ကျာထတ်ကီု သီုဗြဲဂူတရိုပ်ဖျေံကၠုၚ်တုဲ သတ်ဒူရေန် ၜတ်ၜတ် ကြံၚ်ကြံၚ်ဂမၠိုၚ် ပြဟ်စှေ်အာ ဇၟာပ်တၞံ ဇၟာပ်ကၠအ်တုဲ ဆောံလေၚ်အာ ဗွဲမဂၠိုၚ်ဂၠၚ်ရောၚ် သ္ဂးရ။
“ဒးအသိၚ်ဗြဲကျာထတ် မွဲၜါတ္ၚဲဏံ ဒူရေန် ဍောတ်ဍောတ် ဇၞော်ဍောတ် ၜတ်ၜတ် ကြံၚ်ကြံၚ် ကၠာဍုဟ်ကဵုဟွံဍုဟ်လေဝ်နွံ၊ ပြဟ်စှ်ေ ဇၟာပ်တၞံ ဇၟာပ်ကၠအ် ဂၠိုၚ်ကွေံကွေံ၊ တၠကၠအ်ဒူရေန်တံ အဃောကြပ်ဂွံစဂှ် ဒှ်ဆောံလေၚ်အာဂၠိုၚ်ကွေံကွေံ” သာ်ဝွံ တၠကၠအ်နူရေဝ်သၟဝ်ကျာ နာဲတိုၚ် ဟီုရ။
ဇၟာပ်စိုပ်အခိၚ်ဥတုမုတ်သုန် ကၠာဟွံလုပ်က္ဍၚ်မ္ဂး ကျာလပိုက်ထတ်၊ အသိၚ်ဗြဲဂူတရိုပ်၊ ဂဂဵုတးဂရိၚ် ဒှ်လေပ်တုဲ ဟိုတ်နူအသိၚ်ဗြဲကျာထတ်ဂှ် သတ်ဆုဂမၠိုၚ် ပြဟ်စှေ်ဂၠိုၚ်ရ။
“အခိၚ်ကၠာအကြာဗြဲကဵု ကညၚ်ဏံဂှ် ဒးဖေက်ကျာထတ်ရ၊ ကျာထတ်ကၠုၚ်တှ်ေ ဒူရေန်ပြဟ်တွဵုရ အောန်ကဵုဂၠိုၚ်၊ နဲဂွံစဵုဒၞာဍေံဂှ်ဟွံမွဲ၊ ဆဂး လ္ၚဵုဂှ်တှ်ေ သ္ပကမၠောန်တုဲ ဒက်ကွက်ကဵုဇုက် ဗီုဏံလေဝ်နွံ၊ ဒးကျာထတ်တှေ် ပြဟ်တွဵု အရိုဟ်သၞာံရ၊ သၞာံဏံလေဝ် ပြဟ်ၜိုတ်ဒးရး၊ ကၠအ်လ္ၚဵု ဒးဂၠိုၚ် ကၠအ်လ္ၚဵုဒး အောန် ဓမ္မတာရ” သာ်ဝွံ တၠကၠအ်ဒူရေန် ပွိုၚ်ဍုၚ်ဇြပ်ဗု နာဲခိုၚ်တာန် ဟီုရ။
အခိၚ်အကြာကညၚ်အိုတ်ကဵု အခိၚ်မုတ်သုန်ဗြဲကျာ စလုပ်တၟိတၟိဏံမ္ဂး သွက်ဂွံစဵုဒၞာ ဘဲလဗိုတ်ကျာတုဲ တၠကၠအ်ဒူရေန်လ္ၚဵုဂှ် ဗက်ဒက်ကွက်လဝ် သတ်ဒူရေန် နကဵုဇုက် ဇၟာပ်တၞံလေဝ် ဂွံဆဵုကေတ်ရ။
တုဲပၠန် ပ္ဍဲအခိၚ်ကၠာမုတ်သုန်ဟွံလုပ်ဏီမ္ဂး သတ်ဒူရေန် ၜတ်ၜတ် ကြံၚ်ကြံၚ်ဂှ် သွက်ဂွံဒုၚ်ဒဝ်ဘဲဗြဲကျာမာန်တုဲ နူကၠာဗြဲဟွံဂူဏီ ညံၚ်ဂွံကဵုလဝ်ဍာ်ဂၠိုၚ်ဂၠိုၚ်ညိဂှ် တၠ ပညာတဵုလွဳဒူရေန်တံ ကဵုလဝ်သတိနွံရ။
သတ်ဒူရေန်ဍုဟ်ဍုဟ် သၞာံဏံဂှ် ဒူရေန်အရိုၚ် ဓမ္မတာ အောန်အိုတ် မွဲမ အကြာ (၅၀၀၀) (၁၀၀၀၀) ဒ္ကေဝ်ပြၚ်နွံတုဲ ဒူရေန်ဆက်မတ် ဂကူခိုဟ် မွဲကဳလိုဝ်မ္ဂး အကြာ (၂၀၀၀၀) ဒကေဝ်နွံဂှ် ဂွံတီကေတ်ရ။
0 Comments