နူကဵုဝန်ဇၞော်ပရေင်ဂီုကၠီု ကေုာံ ပယျဵု ဂကောံကံင်ဇြဳပၞာန် တွဵုရးဍုင်မန် သ္ကိုပ်ဗိုလ်ဇၞော် ကျဝ်ဇြဲမျေအ် ကဵုစၞောန်အမိင်တုဲ အခိင်မလုပ်ရပ် ညးက္ဍိုပ် ဒပ်စဵုဒၞါၜိုဟ်လလမ်ဂကူမန် နာဲအဗျေန် မၞုံကွာန်ကြုင်ဝါန် ပွိုင်ဍုင်ကျာ်မြဟ်ဂှ် သီုဖံက်ပန်လွဟ်ကြာန်န်ဂှ်ရ ညးဍုင်ကွာန် ချိုတ် ၁ တၠ၊ ဒးဝပ် ၁ တၠနွံရောင် ဂွံတီကေတ်ရ။

ပ္ဍဲဂိတုအေဗရဴ စၟတ်တ္ရဲ ၃၀ အခိင်ဗ္တံ ၜိုတ် ၁၀ နာဍဳဂှ် ဟွံထေင်လဝ်မွဲသာ် နူကဵုဒပ်ကံင်ဇြဳပၞာန်တအ် လုပ်စၟဳစၟတ် ဒၞါဲမပံက်လဝ်ဝိုင်ဝေင် ပ္ဍဲကွာန်ကျာအေန် မၞုံအကြာဗွိုင်ကမၠောန်ရုင်စက်မတ်မလီု (မော်လမြိုင် စက်မှုဇုံ) ကဵု ကွာန်ကြုင်မၞင်ဂှ် သီုဖံက်ပန်လွဟ်ဂှ်ရ မၞိဟ်တြုံ မၞုံအာယုက် ၄၀ သၞာံမွဲတၠ ချိုတ်အာတုဲ မၞိဟ်ဗြဴမွဲတၠ ဒးအာလဝ်ဝပ်နွံရ။

“ပံက်လဝ်ဝိုင်ဝေင် ပ္ဍဲကျာအေန်ဂှ် က္ဍိုပ်အဗျေန်တအ် ကေတ်မံင်ကဵုဂီုကၠီု၊ တုဲတှ်ေ သီုသွံတြးမံင် ဂဥုဲၜူမာဲ ညးတီ အဲတီမံင်ရ၊ ပံက်လဝ်ဝိုင်ဝေင်ဂှ်လေဝ် နူကဵု (အရှေ့တောင်တိုင်း) ရ ကဵုလဝ် အခေါင်၊ ဆဂး ဗီုလဵုဟွံတီ၊ နူကဵု (နယ်လုံ) ကဵုအမိင်တုဲ ကဵုကၠုင်ရပ်က္ဍိုပ်အဗျေန်တအ်၊ အခိင်ဂှ်ရလေဝ် တြုံကဵုဗြဴညးၜါ မိင်ဟရုလွဟ်ဟာ ဆဵုကောန်ပၞာန်ဟာ ကေတ်ဟွံဒး ဒဳတိတ်ကၠုင်ကဵု ကွဳလိုန်ဓါတ်ဂှ် ပၞာန်ဗၟာ ပန် ချိုတ်အာ၊ ဗြဴဂှ် ဒးအာဝပ်ရ၊ တြုံဂှ် ရဲကြုင်ဝါန်၊ ဣဗြဴဂှ် ရဲကျာ်ပရင် မိင်လဝ်ဗီုဂှ်ရ” သာ်ဝွံ ညးဒေသမွဲတၠ ဟီုထ္ၜးကၠုင်ရ။

ပ္ဍဲကဵုဒၞါဲကျာအေန်ဂှ်ဝွံ အတိုင်စၞောန်နူကဵုဌာန်ဂအုပ်ပၞာန်ရးအဂၞဲ ဍုင်မတ်မလီုတေံ ဒပ်စဵုဒၞါၜိုဟ်လလမ်ဂကူမန် နာဲအဗျေန် က္ဍိုက်ပ်တအ် ဒးမင်ကေတ်ကဵုဂီုကၠီုတုဲ ပၠောပ်ပေါဲဇာတ် ပံက်ဗဒှ်လဝ်ဝိုင်ဝေင်ဂမၠိုင် ဗၞတ်ပါ်ဂိတုဒှ်ရဏောင်ဂှ်လေဝ် ညးဒေသဂှ် ဆက်ဟီုပၠန်ရ။

နူကဵုဒၞါဲမပံက်လဝ်ဝိုင်ဝေင် ကျာအေန်ဂှ်မွဲအဆံင် ဂကောံဒပ်ကံင်ဇြဳပၞာန်တအ် ဇက်လုပ် စိုပ်ကွာန်ကြုင်ဝါန် နကဵုကွဳစက် ဗၞတ် ၂၀ ဖ္ဍိုက်တုဲ ရပ်ကော်ဏာ နာဲအဗျေန်ကီု သီုညးမဒှ်သမ္ဘာတအ်ဖ္အိုတ်ရောင် ဂွံတီကေတ်ရ။

“က္ဍိုပ်အဗျေန်တအ်ဂှ် ဗမာတအ် ဖျေံလဝ်ကဵုဒၞါဲ လ္ပာ်ကျာ်ပရင် သွက်ဂွံဂီုကၠီု (စက်မှုဇုံ) ရ၊ ညးတေံ ပံက်လဝ်ဝိုင်ဝေင်ကီု ကၠောန်မံင်သီုၜူမာဲကီု တၟာလအ်ရဏောင်၊ ပြဟ်ဟ်ဏအ် သီုအဗျေန် သီုဂကောံကောန်ရဲညးတေံဖအိုတ် ၜိုတ်နွံဂှ် ဗမာကော်သီဏာလဝ်ဖ္အိုတ်ရ” သာ်ဝွံ တမ်ရိုဟ်ပရိုင်နူဒေသမွဲတၠ ဟီုထ္ၜးရ။

ပြဟ်ဟ်ဏအ် နူကဵုဒပ်ကံင်ဇြဳပၞာန်တအ် ရပ်ကော်ဏာ ညးက္ဍိုပ် ဒပ်စဵုဒၞါၜိုဟ်လလမ်ဂကူမန် နာဲအဗျေန် ကေုာံ ကောန်ဂကောံတအ်ဂှ်တုဲ ထိင်စွံလဝ်ဒၞါဲအလဵု တီကေတ်ဟွံမာန်ဏီရ။

ဒပ်စဵုဒၞါၜိုဟ်လလမ်ဂကူမန် နာဲအဗျေန် က္ဍိုက်ပ်ဏအ်ဂှ် စွံပ္တန်လဝ်ရုင်ပါ် ဒၞါဲပါင်ဂၠံင်ကွာန်ကံကြိက် ပွိုင်ဍုင်ကျာ်မြဟ် မၞုံသ္ကဲဍာန်ဇၞော်မတ်မလီု – ဖါအင်တုဲ  ပံက်သၞေဟ်ကင် ဗက်ဒၟံင်အကံက်သြန် ပ္ဍဲပါင်ဂၠံင်ဒဵုခရီုရ။

“အဗျေန်ဏအ်ဂှ် မၞိဟ်ဍေံလွဳစလဝ်ရတှ်ေ ရပ်တုဲလေဝ် ကဵုသြန် ဍေံကလေင်ဗလးကဵုပၠန်ရ” သာ်ဝွံလေဝ် ညးတီမံင်ပရူဒဒှ်နာဲအဗျေန်မွဲတၠဂှ် ဟီုပၠန်ရ။

လက္ကရဴနူပေါဲဗ္တိုက်ဒေသၜဳဂြာင် ကအ်ဗိန်၊ ဓမ္မသ က္တဵုဒှ် နူသၞာံ ၂၀၂၄ တေံတုဲဂှ် လ္ပာ်ဒပ်ကံင်ဇြဳ ပၞာန်တအ် လုပ်စိုပ်ဖျေံသ္ဇိုင်ဒပ် အဆံင်ဗျူဟာ ပ္ဍဲကွာန်ကြေဝ်ဏာတုဲ ဒပ်စဵုဒၞါၜိုဟ်လလမ်ဂကူမန် နာဲအဗျေန် က္ဍိုက်ပ်တအ်ဂှ် ဒးဒုင်ပြံင်ပဆုဲဏာ သွက်ဂွံကေတ်ဂီုကၠီု ဂၠံင်ပၞော်လုပ်မတ်လီု မွဲဒမြိပ်ဂၠံင်ဍာန် ဗွိုင်ကမၠောန်ရုင်စက်မတ်မလီု (မော်လမြိုင်စက်မှုဇုံ) – ကျာ်ပရင် ပွိုင်ဍုင်ကျာ်မြဟ်ဂှ်ရ။

ဒပ်စဵုဒၞါၜိုဟ်လလမ်ဂကူမန်ဝွံ မဒှ်ဂကောံနွံသၟဝ်ကောပ်ကာဲ ဌာန်ဂအုပ်ပၞာန်ရးအဂၞဲ (ရတခ) တုဲ ချဳဒရာင်ဒၟံင် ပ္ဍဲဒေသကအ်ကြိက်၊ ကျာ်မြဟ်၊ ဇြပ်ဗု ကေုာံ ရေဝ်တအ်နွံရောင် ဂွံတီကေတ်ရ။