ပရေၚ်ပညာကၟိန်ဍုၚ်ဗၟာဂှ် ၜိုန်ရစၟတ်လဝ် ပရေၚ်ပညာသက္ကုၚုဟ် (သၟးသၟး) ကီုလေဝ် ကွးဘာတန်သၠုၚ်မွဲမွဲတၠ ပွိုၚ်မွဲမွဲသၞာံဂှ် အိုတ်မံၚ် ဗဒဲါကၠံကိုဋ်ရောၚ် မိမကွးဘာတအ် ဟီုလဴထ္ၜးရ။
ကွးဘာတန်သၠုၚ် စပ္တံနူ (၁၀) တန်၊ (၁၁) တန်၊ (၁၂) တန် (Grade 10,11,12) မ္ဂး ပရေၚ်ဗ္တောန်လိက်ပ္ဍဲဘာဂှ် ဒှ်မံၚ်သာမညတုဲ ပရေၚ်ဗ္တောန်လိက်မ္ၚးဂှ် ဒးသ္ပဒၟံၚ်အဓိကဂှ်ရ ဘာဂွံတုဲပွိုၚ်မွဲမွဲသၞာံဂှ် အိုတ်မံၚ်ဗဒဲါကၠံကိုဋ်ရောၚ် မိမကွးဘာ (၁၂) တန် နူပွိုၚ်ဍုၚ်မုဟ်ဍုၚ်မွဲတၠဂှ် ဟီုဗီုဏံရ။
“ကွးဘာတန်သၠုၚ် ဗီုပ္ဍဲသ္ၚိပိုဲဏံ (၁၂) တန် မွဲမွဲတၠတှေ် စရိတ်ဒၟံၚ်ဗဒမ်သၟးဂှ် မွဲမွဲသၞာံ (၄၀) ကိုဋ်ပြၚ်၊ (၅၀) ကိုဋ် အိုတ်မံၚ်၊ ပဲါနူဂှ် စရိတ်ကယျိုၚ်ဍေံ၊ စရိတ်ဍေံရပ်စပ်၊ စရိတ်ဘာတၞဟ်တၞဟ် ပံၚ်ထောံဖအိုတ်တှေ် အိုတ်ဗဒဲါကဵုကၠံကိုဋ်ဏောၚ်” သ္ဂးရ။
ဘာတန်အလဵုအသဳ (ကံၚ်သဳပၞာန်) ခေတ်အဆက်ဆက်ဂှ် ၜိုန်ရဖျေံလဝ်သၞောတ် သက္ကုၚုဟ်မး (သၟးသၟး) ကီုလေဝ် ဟွံကတ်လ္ၚတ်လိက်မ္ၚးဘာဟွံတုဲ ဗွဲတၟေၚ် ဒးစွံပ္ဍဲဗဒမ်တုဲ ဒးကတ်လ္ၚတ်လိက်မ္ၚးဘာ ဒးတိုန်ဂျူယှေန်အိုတ်ရ။
ဟိုတ်နူဒးကတ်လ္ၚတ်လိက်မ္ၚးဘာဂှ်တုဲ စရိတ်ကွးဘာမွဲမွဲတၠ ပွိုၚ်မွဲသၞာံဂှ် အိုတ်ဂၠိုၚ်ကဵုစှော်ကိုဋ်ရောၚ် မိမကွးဘာတၞဟ်မွဲတၠပၠန်ဂှ် ဟီုသာ်ဝွံပၠန်ရ။
“ကွးဘာဂွံတုဲမွဲမွဲသၞာံဏံဂှ် အိုတ်ဟွံသာပုဟ်၊ စရိတ်ဒၟံၚ်ဗဒမ်လေဝ် က္ဍၚ်တိုန်၊ စရိတ် ဗ္တောန်လိက်ဂျူယှေန်လေဝ် က္ဍၚ်တိုန်၊ စရိတ်ကယျိုၚ်၊ စရိတ်လိက်လေဝ် ၚုဟ်က္ဍၚ်တိုန်မံၚ်ဖအိုတ်တှေ် ကွးဘာမွဲတၠ အိုတ်အောန်အိုတ်ရဟီုဂှ် (၅၀) ကိုဋ်ပြၚ်တွဵုရ” သာ်ဝွံ မိမကွးဘာ နူပွိုၚ်ဍုၚ်ဇြပ်ဗုဂှ် ဟီုရ။
ပ္ဍဲသၞာံဗ္တောန်ပညာ (၂၀၂၅-၂၀၂၆) သၞာံဏံဂှ် ဟိုတ်နူဗၞိက်ဗွဝ်ဖျာ က္ဍၚ်သၠုၚ်တိုန်ဒၟံၚ်ဖအိုတ်တုဲ စရိတ်ဒၟံၚ်ဗဒမ် (အဆောၚ်) ကီု၊ စရိတ်ဂျူယှေန်ကီု၊ စရိတ်လိက်နာနာဂှ်ကီု ၚုဟ်က္ဍၚ်တိုန်အာ နူသၞာံတုဲကၠုၚ်တေံ ၜါဆဖအိုတ်ရ။
ဟိုတ်နူၚုဟ်က္ဍၚ်သၠုၚ်တိုန်ဂၠိုၚ်ဂှ်တုဲ မိမကွးဘာ စသုၚ်ဗုၚ်ဂၞဴ ဟွံပြေပြံၚ်လ္ၚဵုတအ်မ္ဂး သွက်ဂွံပ်ပအပ်စွံဘာကဵု ကောန်ဇာတ်တအ်ဂှ် ဒှ်ဒၟံၚ်တၚ်ကော်ဆဴကဵု ပရေၚ်စွံဘာ ဇၞော်ဇၞော်မွဲရောၚ်ဂှ်လေဝ် ဂွံတီကေတ်ရ။
