အခိင်ကာလပၠန်ဂတးတ္ၚဲဏံ အလုံဂကူမန် သွက်ဂွံလးမွဲဗျူဟာမာန်ဂှ် ဂကောံပံင်ကောံပရေင်ဂကူမန် MAU ပ္ဍဲဍုင် မ္ၚးဍုင် ဒးဒက်ပ္တန်အာထေက်ရောင် ညးသ္ရဳဂၠိပ်ပရေင်ဍုင်ကွာန်မွဲတၠ ဒံက်တာပညာမန် ဟီုရ။

ဟိုတ်နူပ္ၚံက်ပရေင်ဍုင်ကွာန်တုဲ ဂကောံပံင်ကောံပရေင်ဂကူမန် MAU မမံက်တိုန် ပ္ဍဲကာလတ္ရဲဏအ် နဗီုပြင်တၟိဂှ် နဒဒှ် ဗွိုင်အပ္ဍဲဍုင် ဟီုမာန်တုဲ တုပ်သာ်ဂှ်ကီု သွက်ဂွံလးအာဂၠံင်တရဴဂကူမန်ဂှ် ဂကောံပံင်ကောံပရေင်ဂကူမန် MAU ဗွိုင်မ္ၚးဍုင်လေဝ် ဒးဒက်ပ္တန်အာထေက်ကီုရောင် ညးဟီု ရ။

“လၟုဟ်ဒက်ပ္တန်လဝ်ဂှ် MAU ပ္ဍဲဍုင် ဂတဏံလေဝ် ဍေံခိုဟ်ဂှ်တှ်ေ MAU ဗွိုင်မ္ၚးဍုင် လ္ပာ်မ္ၚးဍုင်လေဝ် ဒးပကောံဂကူကီု ရောင်၊ ဥပမာ ဗော်ဍုင်မန်တၟိ(အေဒဳ)က္ဍိုက်ပ်တုဲတှ်ေ စန်ပကောံဇြဟတ်ဂကူသွာင်မ္ၚးဏံ မပ္တံကဵု ဇြဟတ်မန်ဍုင် သေံကီု၊ ဇြဟတ် မန်ဍုင်သ္အာင်ကီု ဇြဟတ်ပယျဵုကီု ဂကောံကဵုဇြဟတ်လ္ပာ်ရဲပၠန်လေဝ်ဂတးတအ်လေဝ် ဒးပကောံ စန်ပကောံတုဲတှ်ေ MAU မ္ၚးဍုင်၊ MAU ပ္ဍဲဍုင် မ္ၚးဍုင် ၜါဏံဂှ်တှ်ေ ပံင်တောဲကၠောန်ညးသ္ကအ်ဂွံဂှ်တှ်ေပံင်တောဲ ကၠောန်ညးသ္ကအ်၊ ပံင်တောဲကၠောန်ညးသ္ကအ်ဟွံဂွံဂှ်တှ်ေ ဂၠံင်ညးညးကၠောန်အာ” သာ်ဝွံ ဒံက်တာ ပညာမန် ဟီုရ။

ပ္ဍဲကဵုဒက်ပ္တန်ဏာ ဂကောံပံင်ကောံပရေင်ဂကူမန် MAU ဗီုပြင်တၟိလၟုဟ်ဏံဂှ် ဗွိုင်ပယျဵုကေုာံဍုင်သေံ ကဵု ဗွိုင်ဍုင်သ္အာင် ဟွံပါလုပ်ရတုဲ ညံင်ဂွံဆက်အာဂၠံင်တရဴဂကူ(ဗျူဟာဂကူ)မွဲစွံမာန်ဂှ် ဗွိုင်မ္ၚးဍုင်တအ်လေဝ် ဒးစန်ပကောံ ဇြဟတ်ထေက်ရောင် ဒံက်တာပညာမန် သ္ဂးလဝ်ရ။

“ဗျူဟာဂကူဒးနွံရောင် ဂၠံင်တရဴဍုင်မန်ဗၠးၜးကဵုဒှ် ဂၠံင်တရဴဖေဝ်ဒရာကဵုဒှ် ယဝ်လးလဝ်ဗီုဏံနွံဏောင်တှ်ေ ရဲပ္ဍဲ ကၠောန်လေဝ် ညံင်ဂွံပတဝ်ဏာ အဵုဂၠံင်ဂှ်၊ ရဲမ္ၚးဍုင်ဂှ်လေဝ် ညံင်ဂွံပတဝ်ဏာ ဂၠံင်ဂှ် အဵုဗျူဟာၜါဏံ ယဝ်ကၠိုဟ်မံင် ညးသ္ကအ်ဏောင်တှ်ေ ဍေံအာညးသ္ကအ်ဂွံ မွဲ ဗျူဟာ၊ ရံင်ကဵုအကာဲအရာပရေင်ဍုင်ကွာန်တုဲတှ်ေ မွဲဂှ် MAU ပ္ဍဲဍုင် လ္ပာ်ဏံတှ်ေ MAU မ္ၚးဍုင် လအ်ပရေင်ဍုင်ကွာန်ပ္ၚံက်ဂွံပြံင် သၠာဲ မွဲတ္ၚဲ ပံင်ကောံညးသ္ကအ်ဂွံတှ်ေ ဂကောံပံင်ကောံ ပရေင်ဂကူမန် MAU ဍေံဒှ်အာဗီုပြင် ပါလဳမာန်မန် မွဲရောင်” သာ်ဝွံ ညးထပ်ဟီု လညာတ်ညးရ။

ဇြဟတ်ဂကူမန် ပ္ဍဲပ္ၚံက်ကာလပၠန်ဂတးတ္ၚဲဏံဝွံ ဗွိုင်ပ္ဍဲဍုင်မ္ဂး ဗော်ပရေင်ဍုင်ကွာန်ရပ်လွဟ် ကွာ်ဂၠံင်တရဴ လိက်ကသုက်တုပ်စိုတ်ဒေါံပန်ပှော်အလုံဍုင် NCA ဗော်ဍုင်မန်တၟိ၊ ဗော်ပရေင်ဍုင်ကွာန် ပ္ဍဲဗွိုင်သၞောဝ်ကံင်ဇြဳပၞာန် ဗော်ညဳသၟဟ်မန် ကေုာံ ဇြဟတ်ဂကောံမှာဇန်မန်နာနာတအ်နွံတုဲ ဗွိုင်မ္ၚးမ္ဂး ဗော် ကေုာံ ဂကောံပရေင်ဍုင်ကွာန် လုပ်မံင်ပေါဲဗတိုက်ကု ကံင်ဇြဳပၞာန်၊ ဒပ်ရပ်လွဟ်ပၠန်ဂတးဂမၠိုင်၊ ဇြဟတ်ဒစဵုဒစးကုတၠအဝဵုပၞာန် ကံင်ဇြဳပၞာန်ဂမၠိုင် ဗီုပြင်ညးကဵုညး ရေင်တၠုင်ကၠောန်ၜိုတ်ဒၟံင်နွံရ။

ဒက်ပ္တန်ဏာဂကောံပံင်ကောံပရေင်ဂကူမန် MAU တၟိဏံဂှ် ဗွိုင်ဇြဟတ်ဂကူမန် ကေတ်လဝ်ဓဝ်ၜိုဟ်လလမ် ကေုာံ လုပ်ပေါဲဗတိုက်ဂကူ ပ္ဍဲဗွိုင်ကၠတ်ထဝ်တအ်ဟေင် ပါလုပ်ဂှ်တုဲ ဗွိုင်ဇြဟတ် လုပ်မံင်ပေါဲဗတိုက်ရပ်လွဟ် ဒစဵုဒစးတၠအဝဵုပၞာန်တအ် ဟွံပါဂှ်တုဲ ဗွိုင်မ္ၚးတအ်လေဝ် ဒးစန်ပကောံဇြဟတ်ဂကူ ဒးဒက်ပ္တန်အာ ဗီုပြင် ဂကောံပံင်ကောံပရေင်ဂကူမန် MAU ဗွိုင်မ္ၚးမွဲကီုထေက်ရောင်ဂှ် ဒံက်တာပညာမန် ဟီုကဵုလဝ်ကသပ်ရ။

ဂကောံပံင်ကောံပရေင်ဂကူမန် MAU တုဲကၠုင် (၂၀၀၈-၂၀၁၃) တေံမ္ဂး ဗွိုင်ဗော်ပရေင်ဍုင်ကွာန်ရပ်လွဟ်၊ ဗွိုင်ပယျဵု ကေုာံ ဍုင်သေံ၊ ဗွိုင်ဍုင်သ္အာင်၊ ဗွိုင်ပ္ဍဲဍုင် ၄ ဗွိုင်ပံင်ကောံတုဲ ဒက်ပ္တန်ကၠုင်လဝ်ဗီုပြင် ဂကောံဩဇာပရေင်ဂကူ သၠုင် အိုတ်မွဲရ။ ဟိုတ်နူဏံတုဲ ဗော်ပရေင်ဍုင်ကွာန်ဗွိုင်ပ္ဍဲဍုင်တအ် ဟွံစှ်ေစိုတ်ဂှ်ရ မ္ဒးရုပ်ပလီုကၠေံ ဂကောံပံင်ကောံပရေင်ဂ ကူမန် MAU (တြေံ)ရ။  

ရံင်ကဵုပ္ၚံက်အကာဲအရာပရေင်ဍုင်ကွာန်တ္ၚဲဏံတုဲ ဇြဟတ်ဂကူ သွာင်ပ္ဍဲ သွာင်မ္ၚး ၜိုန်ရပရေင်ကမၠောန်ဟွံတုပ်ကီုလေဝ် သွက်ဂွံဆက်အာနကဵုဂၠံင်တရဴပရေင်ဂကူ မဟာဗျူဟာဂကူနွံနွံ ဂွံဆက်စပ်အာညးသ္ကအ်မာန်ဂှ် ဂကောံပံင်ကောံပရေင် ဂကူမန် MAU ဗွိုင်ပ္ဍဲဍုင်၊ ဂကောံပံင်ကောံပရေင်ဂကူမန် MAU ဗွိုင်မ္ၚးဍုင် ဒးဒက်ပ္တန်အာထေက်ရောင်ဂှ်လေဝ် ဒံက် တာပညာမန် ဟီုသ္ဂးလဝ်ရ။