ပ္ဍဲခရိုင်နန်ထၜူရဳ ကၟိန်ဍုင်သေံ ဒၞါဲကဵုဖျာတလာတ် (Bang Yai Market)အခိင်ဗ္တံဂှ် ညးတာလျိုင်ဗၠာဲသၟိင်သေံတအ် လုပ်စၟဳစၟတ်ရပ်ဂွံ သၟာကမၠောန်ဟွံလုပ်ကဵုသၞောဝ် လၟိဟ် (၂၀) တၠနွံရောင် ပရိုင်သေံတအ် ချူဓမံက်လဝ်ရ။
နူတနေံဏံ ဂိတုဇှ်ေ (၂) စွေက် ဒၞါဲကဵုဖျာတလာတ် (Bang Yai Market) အခိင်ဗ္တံ ပ္ဍဲခရိုင်နန်ထၜူရဳဂှ် မၞိဟ်ၜိုတ် (၅၀၀) တၠ သွံရာန်ဂေတ်ဒၟံင်ဖျာဂှ်နွံတုဲ မွဲအခိင်ဂှ်ရ နူကဵုညးတာလျိုင်ဗၠာဲသၟိင်သေံတအ် လုပ်စၟဳစၟတ်မၞိဟ်ဂှ် ရပ်ဂွံဏာ သၟာကမၠောန်ရဲညးဟွံမွဲကဵုတၞးလိက်သက်သဳ လၟိဟ် (၂၀) တၠနွံရောင် ဂွံတီကေတ်ရ။
အပ္ဍဲကဵုရပ်ဂွံလဝ် ရဲညးဟွံမွဲကဵုတၞးလိက်သက်သဳ (၂၀) ဏံဂှ်ဝွံ သၟာကမၠောန်ကောန်ဍုင်ဗၟာ ပါလုပ်မံင် (၁၅) တၠ၊ ကောန်ဍုင်လာအိုဝ် (၄) ကဵု ကောန်ဍုင်ဗဳယာတ်နာမ် (၁) တၠပါလုပ်မံင်နွံရောင် ဂွံတီကေတ်ရ။
ဒှ်သာ်ဂှ်ရ သၟာကမၠောန် ရဲညးဟွံမွဲကဵုတၞးလိက်သက်သဳ လၟိဟ် (၂၀) ဏံဂှ်ဝွံ ဟိုတ်နူဒၟံင်တန်တဴ ကၠောန်ကမၠောန်ဟွံလုပ်ကဵုသၞောဝ်သာ်ဏံဂှ်ရ ညးတာလျိုင်ဗၠာဲသၟိင်သေံ ခရိုင်နန်ထၜူရဳတအ် ရပ်ထိၚ်ကော် ဏာတုဲ သီုကဵုကၠောန်သ္ပစၟဳစၟတ်ကေတ်မံင်အရေဝ်နွံရ။
ပ္ဍဲကၟိန်ဍုင်သေံ တုဲကၠုင်သၞာံ ၂၀၂၄ တေံ ဗွဲကြဴနူအလဵုအသဳသေံတအ် လလောၚ်တြးပတိတ်ကၠုင်လဝ် သၞောဝ်ဥပဒေတၟိတုဲဂှ်တှ်ေ ညးမၞုံကဵုတာလျိုင်ဗၠာဲသၟိင်သေံ ဇၟာပ်ဒေသခရိုင် တွဵုရးဂှ် ပတေင်ကၠုင်လဝ် ပရေင်စၟဳစၟတ် အပ္ဍဲဍုင် ဒၞါဲဒေသပယျဵုနွံတုဲ စပ်ကဵုရပ်ဂွံမံင်သၟာကမၠောန်ဟွံလုပ်ကဵုသၞောဝ် ကောန်သ္အာင် သီုကဵုကောန်ဍုင်မန်ဗၟာပိုဲတအ် နွံကၠုင်မွဲနှေံမွဲနှေံကီုရောင် ဂွံတီကေတ်ရ။
