ဟိုတ်နူဗၞိက်ဗွဝ်ဖျာနာနာ က္ဍၚ်တိုန်အာဂှ် ၚုဟ်ထ္ၜိုတ်လေဝ် သၠုၚ်တိုန်ကီုတုဲ မတၞံထ္ၜိုတ်ဆက်မတ် သၞာံဏံလေဝ် ၚုဟ်က္ဍၚ်တိုန်အာကဝက်ဒှ်ရောၚ် ဂွံတီကေတ်ရ။

မတၞံထ္ၜိုတ်ဆက်မတ်မွဲတၞံဂှ် ၚုဟ်သၞာံတုဲကၠုၚ်တေံ (၁၀၀၀) ပြၚ်ဂှ် သၞာံဏံ ဒှ်အာ (၂၀၀၀) ပြၚ်တုဲ သွံဂြိပ်ဒၟံၚ် အတိုၚ်သၞောတ်တြေံဖိုဟ်ရရောၚ် တၠကမၠောန်ကၠောန်ပလောမ်မထ္ၜိုတ်ဆက်မတ် နူဍုၚ်မုဟ်ဍုၚ်မွဲတၠ ဟီုထ္ၜးရ။

“သၞာံဏံ မထ္ၜိုတ်ဆက်မတ်မွဲတၞံ ဒှ်အာ (၂၅၀၀) ၊ သၞာံတုဲကၠုၚ်တေံတှေ် အကြာ ၁၅၀၀ ဓဝ်ရ၊ သၞာံဏံဂှ် ဟိုတ်နူၚုဟ်ဖျာနာနာက္ဍၚ်တိုန်ကီု၊ ၚုဟ်ထ္ၜိုတ်လေဝ် သၠုၚ်တိုန်အာကဝက်ကီုတှေ် ဟိုတ်နူဂှ်ရ မတၞံထ္ၜိုတ်လေဝ် က္ဍၚ်တိုန်အာ” သာ်ဝွံ နာဲ မန်ကျဳ ဟီုရ။

ပ္ဍဲဒေသဍုၚ်မန်ဝွံ ဂကူတၞံမထ္ၜိုတ် BPM (24) = 1700 / RRIT (251) ၜါဂကူဏံဂှ် မၞိဟ်တဵုဂၠိုၚ်တုဲ ၚုဟ်လေဝ် သၠုၚ်နူကဵု တၞံမဓမ္မတာညိညနွံရ။

“ဒေသပိုဲဏံ မတၞံထ္ၜိုတ်သွံဂြိပ်အိုတ်ဂှ်တှ်ေ ဂကူ (၂၄) ကဵု (၂၅၁) ၜါဂကူဏံ လၟုဟ် မၞိဟ်တဵုဂၠိုၚ်အိုတ်ရ၊ ၚုဟ်ဍေံဂှ်တှ်ေ သၠုၚ်နူကဵု ဂကူတၞဟ်တၞဟ်ဓမ္မတာညိ၊ ၚုဟ်သၠုၚ်ညိလေဝ် (၂၄) ဂှ် မၞိဟ်ဒးစိုတ်ဂၠိုၚ်၊ လၟုဟ်ပၠန်ဂှ် (၂၅၁) ဒးစိုတ်ဂၠိုၚ်” သာ်ဝွံ တၠ ပလောမ်သွံမတၞံထ္ၜိုတ်ဆက်မတ်ဂှ် ဆက်ဟီုရ။

ပ္ဍဲဒေသဍုၚ်မန် တဵုလဝ်တၞံထ္ၜိုတ်မအရိုၚ်ကၠာကၠာတေံဂှ် ကုတ်ဓဗိုၚ်ထောံအိုတ်တုဲ လၟုဟ်မ္ဂး ကုတ်ဓဗိုၚ်တုဲ ထပ်တဵုလဝ် မဆက်မတ် ဂကူနာနာအိုတ်ရ။

အလုံမွဲကၟိန်ဍုၚ်ဗၟာဂှ်ဝွံ တွဵုရးဍုၚ်မန်ဂှ် ထ္ၜိုတ်တိတ်ဂၠိုၚ်အိုတ်မွဲတုဲ နကဵုစရၚ်ဌာန ပရေၚ်တဵုလွဳတအ်မ္ဂး  လၟိဟ်မသုန်ကိုဋ် (၅၀၀၀၀၀) ဨက တဵုကၠောန်လဝ်နွံတုဲ အပ္ဍဲဂှ်မ္ဂး ပွိုၚ်ဍုၚ်ဇြပ်ဗုကဵု ပွိုၚ်ဍုၚ်မုဟ်ဍုၚ် တဵုလဝ်ဂၠိုၚ်အိုတ်ဂှ် ဂွံတီကေတ်ရ။