မွဲကာလကံၚ်သဳပၞာန်ဏံ ရပ်ဒၟံၚ်ကွဳလိုန်ဓာတ်၊ ကွဳစက်လိုၚ်ဇြေန်ဟွံမွဲ တေၚ်တေၚ်ဂြတ်ဂြတ်ဗီုလၟုဟ်ဏံ ဟွံမွဲကၠုၚ်မွဲလှေ် ညးဒးဒုၚ်ရပ်လဝ်ကွဳလိုန်ဓာတ် နူပွိုၚ်ဍုၚ်မုဟ်ဍုၚ်မွဲတၠ ဟီုလဴထ္ၜးရ။
“ၜိုတ်ဍေံရပ်မံၚ်ကွဳလိုန်ဓာတ်၊ ကွဳစက်လိုၚ်ဇြေန်ဟွံမွဲဂှ်တှ်ေ အလန်ဏံ တေၚ်အိုတ်ရ၊ ဍေံရပ်ဂွံဏာတုဲတှေ် ကၠာဟွံစိုပ် ရုၚ်(ဗၠာဲသၟိၚ်) ဍေံဂှ် မၞိဟ်အဆက်ဇကုနွံတှ်ေ ပညဳဂွံတှ်ေ ဂွံ၊ ပညဳဟွံဂွံတှ်ေ စိုပ်ရုၚ်ဍေံဗက်ဂှ် ဍေံတက်ဗီု၊ ဍေံစုတ် စရၚ် ယၟု အာယုက် ချိုတ်ချိုတ်ပၠိုတ်ပၠိုတ်တုဲတှ်ေ ဍေံကော်ဏာ ဒၞာဲအချုက်ဟဂှ်ရ၊ ညးမွဲလေဝ် ဍေံဟွံကဵုဆဵုဟ ဂှ်ရ” သာ်ဝွံ နာဲဗုၚ် (ဗလေတ်လဝ်ယၟု) နူပွိုၚ်ဍုၚ်မုဟ်ဍုၚ်ဂှ် ဟီုရ။
အပ္ဍဲဍုၚ်မန်ဝွံ ပွိုၚ်ဍုၚ်လ္ၚဵုဂှ် စတမ်နူ မေ (၃၁) ဂှ်တုဲ စရပ်ဒၟံၚ်ကွဳလိုန်ဓာတ်၊ ကွဳစက်လိုၚ်ဇြေန်ဟွံမွဲ (Without) တေၚ်တေၚ် ဂြတ်ဂြတ်နွံတုဲ ယဝ်ရသၟတ်တြုံ၊ သၟတ်ဗြဴ သၟဝ်အာယုက် (၁၈) သၞာံ အဆက်စၠောံကဵု ညးတာလျိုၚ်ဗၠာဲသၟိၚ်တအ်နွံမ္ဂး ပညဳနုက်ပ္တိတ်နကဵုဩန်ဂွံနွံ၊ သၟတ်အာယုက် (၁၈) သၞာံလ္ပာ်လ္တူမ္ဂး စောဲပ္တိုန်ဒုဟ်ဂဗုတ် နကဵုပၠုပ်ကပေါတ် ဟွံလုပ်ကဵုသၞောဝ်ဥပဒေရ။
“ပ္ဍဲကဵုမၞိဟ်ကရောံပိုဲ ဒးဒုၚ်ရပ်လဝ်ဂလိုၚ်ဂှ်တှ်ေ သၟတ်ဗြဴဍောတ်ဍောတ် အာယုက်အကြာ (၁၆) သၞာံ၊ (၁၇) သၞာံလေဝ်နွံ၊ မၞိဟ်ဗြဴတၠကောန် ကောန်ဍောတ်ဍောတ်အကြာ (၄) သၞာံလေဝ်နွံ၊ မၞိဟ်တြုံပၠန်တှ်ေ မၞိဟ်ဍောတ်ဍောတ် မၞိဟ်ဇၞော်ဇၞော် ပေၚ်ထာတ်၊ လ္ၚဵုဂှ်တှ်ေ အာကၠအ် စဴကၠုၚ်နူကၠအ်ကဵု စက်ဗာ်ချောဲလေဝ်နွံ၊ နကဵုဝဲါလေဝ်နွံ၊ ထောံပရးလဝ် ပ္ဍဲရုၚ် (ဗၠာဲသၟိၚ်) ဂှ် ပြး၊ မၞိဟ်ကၠုၚ်ဗက်ဂတာပ်ပြဟ်ညိတှ်ေ နုက်တိတ်အာ၊ မၞိဟ်ကၠုၚ်ဗက်လဇုဲ ဂှ်တှေ် ဍေံကော်ဏာ ပ္ဍဲရုၚ်အချုက်တေံ ဍေံဟွံကဵုဆဵုရ၊ ဍေံဟီုလဝ်ဂှ် ဒးထံၚ် (၃) ဂိတု ဂးဗီုဂှ်” သာ်ဝွံ မၞိဟ်ဒးဒုၚ်ရပ်လဝ် နူဍုၚ်ကၟာဝက်မွဲတၠပၠန်ဂှ် ထပ်ဟီုရ။
ပ္ဍဲကဵုစၟဳစၟတ်ရပ်ကွဳလိုန်ဓာတ်၊ ကွဳစက်လိုၚ်ဇြေန်ဟွံမွဲ (Without) တအ်ဂှ် ရပ်စၟဳစၟတ်ဒၟံၚ်ဇၟာပ်ပွိုၚ်ဍုၚ်တုဲ ပါၚ်လုပ် တိတ်ဍုၚ်ကီု၊ ပ္ဍဲဍုၚ်ကီု၊ အကြာဂၠံၚ်ကီု မၚ်ရပ်ဒၟံၚ်ဇဳဒိုဟ်တုဲ ဗီုပြၚ်ရပ်စၟဳစၟတ်ပၠန်လေဝ် သီုဗၠာဲသၟိၚ် သီုပၞာန်တအ် ပရးရေၚ်လဝ်မၞိဟ်တုဲ မၚ်ပါမ် ရပ်ကေတ် ဗီုပဲါဓလေတ်ညံၚ်ဟွံဂွံဗၠးဂှ်ရောၚ် မၞိဟ်ဒးဒုၚ်ရပ်တအ် ဟီုရ။
ရပ်စၟဳစၟတ်ကွဳလိုန်ဓာတ်၊ ကွဳစက်လိုၚ်ဇြေန်ဟွံမွဲ (Without) အလန်ဏံဝွံ မွဲကာလကံၚ်သဳပၞာန်တအ် သီအဝဵုတုဲဂှ် တေၚ်ဂြတ်အိုတ်ဒှ်တုဲ သီုကဵုဒးဒုၚ်စောဲစပ် ဂဗုတ်ဇၞော်အိုတ်ကီု၊ ပညဳနုက်ကဵုဩန်ဂွံကီုလေဝ် ကွဳလိုန်ဓာတ်မွဲဖ္ဍိုက်မ္ဂး အောန်အိုတ် (၅) ကိုဋ် စဵုကဵု (၁၀) ကိုဋ်ကီု၊ ကွဳစက်မ္ဂး အောန်အိုတ် (၁၀) လ္ပာ်လ္တူ စဵုကဵု (၃၀) ကိုဋ်ကီု ဒးဒုၚ်တက်ဒန်ဩန်တုဲ ညးလ္ၚဵုဂှ် မၞိဟ်ဗက်လဇုဲတုဲ ဗီုလဵုစောဲလဝ်ဒုဟ်ဒန်၊ အလဵုကော်ဏာဟွံတီတုဲ ကၠေံဒၟံၚ်လေဝ်နွံရောၚ် မၞိဟ်ဒးဒုၚ်ရပ်လ္ၚဵု ဟီုထ္ၜးဂှ် ဂွံတီကေတ်ရ။
