သၟာကမၠောန်ဆုဲပြံၚ်တအ်တက်က္ဍိုပ်တုဲ ဗက်ကၠတ်ၜှ်ပလှ်သတ်ဆု အကြာကၠအ်ညးဍုၚ်ကွာန်တအ် က္တဵုဒှ်ဂၠိုၚ်တိုန်ကၠုၚ်ကွေံကွေံရောၚ် တၠကၠအ်သတ်ဆု နူပွိုၚ်ဍုၚ်ရေဝ်မွဲတၠ ဟီုရ။

“သၟာကမၠောန်ဆုဲပြံၚ်(ဗၟာ)တအ် မွဲၜါဓဝ်ဟွံသေၚ်ပုဟ် ကဵုသ္ကအ်ဏောၚ် (၅) တၠ (၆) တၠ မွဲမွဲက္ဍိုပ်၊ ဍေံတအ်ဗက်ကၠတ်ၜှ်ပလှ်စသတ်ဆု အကြာကၠအ် ဒှ်ဂၠိုၚ်တိုန်ကွေံကွေံ၊ အခိၚ်အခါလၟုဟ်ဏံ တၠကၠအ်ဂှ် အကာဲအရာ ပရိုၚ်ဟွံခိုဟ်တှ်ေ ဟွံဂွံအာကၠအ်၊ ကမၠတ်စဂှ် ဍေံတီမံၚ် တၠကၠအ်ဟွံမွဲတှေ် ဍေံတအ်တက်က္ဍိုပ်တုဲ ကၠတ်ၜှ်ပလှ်ထောံအိုတ်” သာ်ဝွံ တၠကၠအ်ဂှ် ဟီု ရ။

အခိၚ်ဏံမ္ဂး မပ္တံကဵုသတ်ၜတ်ၜတ်ကီု ဒူရေန်ကီု သတ်ဆုတၞဟ်နာနာသာ်ကီု တိတ်ဒၟံၚ်တုဲ ဒေသဍုၚ်မန်သ္ကုတ်သၠုၚ်ကျာ ပွိုၚ်ဍုၚ်ဗွဲမဂၠိုၚ်ဂှ် ဒှ်ဒၟံၚ်ဒေသ ဂကောံပၠန်ဂတးချဳဒရာၚ်တုဲ လဆောဝ်မ္ဂး ကံၚ်သဳပၞာန်တအ်လေဝ် ချဳဒရာၚ်ထ္ပက်ကၠုၚ်တုဲ တၠကၠအ်တအ် ဟွံဂံၚ်အာကၠအ်အိုတ်ရ။

“ကၠအ်လ္ၚဵုဂှ်တှ်ေ တၠကၠအ် ဟွံသေၚ်တှ်ေ လိၚ်ဗလးလဝ်ကောန်ရဲမၚ်ကၠအ်နွံမံၚ်၊ အဵုကၠအ်စဂှ်တှ်ေ သာညိ၊ ဒေသလ္ၚဵုဂှ်တှ်ေ တၠကၠအ်တအ် အခိၚ်ၜိုဟ်ဩိုဟ်ရ အာကၠအ်ဂွံ၊ ဗွဲမဂၠိုၚ်တှ်ေ တၠကၠအ်တအ် အာအာ စဴစဴ သၟးရဂၠိုၚ်၊ အဵုကၠအ်တဂှ်တှ်ေ အခိၚ်တၠကၠအ်ဟွံမွဲဂှ် ရဲမၚ်ကၠတ်ၜှ်ပလှ်တအ် ဍေံမၚ်ရံၚ်မံၚ်၊ တၠကၠအ်ဟွံမွဲဗက်ဂှ်တှ်ေ ဍေံတအ်ကဵုသ္ကအ် ကၠုၚ်ၜှ်ပ လှ်မံၚ်” သာ်ဝွံ တၠကၠအ်သတ် နူပွိုၚ်ဍုၚ်ဇြပ်ဗုမွဲတၠပၠန်ဂှ် ဟီုရ။

အခိၚ်သတ်ဆုနာနာသာ် တိတ်မံၚ်လၟုဟ်ဏံဂှ် ကၠအ်ဒေသဂကောံရပ်လွဟ်တအ် ချဳဒရာၚ်ဟွံစိုပ်ဂှ်မ္ဂး တၠကၠအ်တအ် ဖျေံစိုတ်ဂွံဂၠိုၚ်တုဲ ကၠအ်ဒေသဂကောံရပ်လွဟ်တအ် ချဳဒရာၚ်စိုပ်ဂှ်မ္ဂး ဟွံလအ်ဟွံလအ် က္တဵုဒှ်ပေဲါဗတိုက်တုဲ တၠကၠအ်တအ် ဂွံအာကၠအ်၊ ဂွံအာဒၟံၚ်ပ္ဍဲကၠအ်ဂှ် ဟွံဂံၚ်ဒၟံၚ်ရ။

ဟိုတ်နူတၠကၠအ်တအ် ဟွံဂွံဒၟံၚ်ပ္ဍဲကၠအ် အခိၚ်ပေၚ်ပေၚ်ဂှ်တုဲ သတ်ၜတ်ၜတ်ကီု သီုဒူရေန်၊ မၚ်ဂုတ်၊ ပၞး၊ ပၞဟ်၊ ပၞဴ နာနာသာ်ဂှ် သၟာကမၠောန်ဆုဲပြံၚ်တအ်တက်က္ဍိုပ်တုဲ ကၠတ်ၜှ်ပလှ် သွံရာန်ဒၟံၚ် ညံၚ်ရဴတၠကၠအ်ရောၚ် အတိုၚ်တၠကၠအ်တအ်ဟီုထ္ၜးလဝ်ဂှ် ဂွံတီကေတ်ရ။