အခိၚ်ကာလ ကိုန်စဳဇန်ရပ်စပ်ဒၟံၚ် ကွဳစက်ယာန်တ္ၚဲဏံဂှ် သၞာဲဒဴကံၚ်သဳပၞာန်ဌာနလ္ၚဵုတအ် ဗက်ရာန်ဒၟံၚ်ကွဳစက် without လိုၚ်ဇြေန်ဟွံမွဲဂှ်နွံရောၚ် မၞိဟ်ကြပ်ကဵု ညးတာလျိုၚ် ဂကောံကံၚ်သဳတွဵုရးဍုၚ်မန်မွဲတၠ ဟီုလဴထ္ၜးရ။

“ကွဳစက်ကာ without လိုၚ်ဇြေန်ဟွံမွဲဂှ်တှ်ေ ပရိုၚ်အကြာသၞာဲဒဴကံၚ်သဳပၞာန်တအ်ဟီုမံၚ်ဂှ် ရုၚ်ဌာနနာနာတအ်ဂှ်တှ်ေ သွက်ဍေံပံက်ကဵုအခေါၚ်ဍိုက်သုၚ်စောဲဏောၚ် မိၚ်ဟီုမံၚ်ဗီုဂှ်၊ မိၚ်ပရိုၚ်ဗီုဂှ်ရ အကြာသ္ၚိကၟိန်ကံၚ်သဳပၞာန်တတ်၊ အကြာသၞာဲဒဴဌာနလ္ၚဵုတအ်ကီု ဗက်ရာန်မံၚ် ကာ without လိုၚ်ဇြေန်ဟွံမွဲဂှ်နွံ” သာ်ဝွံ ညးဟီုရ။

ပ္ဍဲကဵုဂကောံပံၚ်ကောံလစှ်ေ နူကံၚ်သဳပၞာန်တအ် စၟဳစၟတ်ရပ်ဒၟံၚ်ကွဳစက်ယာန် without လိုၚ်ဇြေန်ဟွံမွဲလၟုဟ်ဏံဂှ် မၞိဟ်တာလျိုၚ်တအ် ဍိုက်သုၚ်စောဲဒၟံၚ် ကွဳစက် without လိုၚ်ဇြေန်ဟွံမွဲဂှ်တုဲ ညးဍုၚ်ကွာန်တအ် ဟီုဂးပါ်ပါဲမံၚ်ရ။

“ဠ ဍေံ (ကံၚ်သဳပၞာန်) တအ် ဍိုက်သုၚ်စောဲ ကာ without လိုၚ်ဇြေန်ဟွံမွဲ၊ ဠ ညးဍုၚ် ကွာန်ဍိုက်သုၚ်စောဲတှ်ေ ဗက်ရပ် ဟွံစှ်သေဘာဝလးလးရ၊ စၞးဒးရပ်ဂှ် ယဝ်ရပံက်ကဵု ကၠောန်လိုၚ်ဇြေန်တှ်ေ သာတုဲညးဍုၚ်ကွာန်တအ် သၠဲလးဏောၚ်” သာ်ဝွံ တၠကွဳစက် ပလံၚ်ဒၟံၚ်ကွးဘာ လတူဍုၚ်မတ်မလီုမွဲတၠဂှ် ဟီုရ။

အသိၚ်အလိုန်ရပ်ကွဳစက်ယာန် သ္ကာတ်မြဟ်ဒၟံၚ်ဂှ်တုဲ ကွဳစက်ယာန်လကျာ်၊ ဘာတိုက်လိက် လ္ၚဵုတအ် ပ္တိုန်ထ္ၜးကၠုၚ်နွံဂှ်တုဲ ရး ကေုာံ တွဵုရးလ္ၚဵုဂှ် နူကဵုသံဃနာယက ရး၊ တွဵုရးတအ်ဂှ် ပံက်ကဵုကၠုၚ်အခေါၚ်သုၚ်စောဲအာကၠုၚ်နွံရ။

ဟိုတ်နူပရိုၚ်တိတ်ကၠုၚ် ဗွိုၚ်လကျာ်ခၟဳသၚ်တအ် ပံက်ကဵုအခေါၚ်ဍိုက်သုၚ်စောဲ ကွဳစက် without ဂှ် နွံကၠုၚ်တုဲ ပ္ဍဲဗွိုၚ်သၞာဲဒဴ ဌာနနာနာတအ်လေဝ် သွက်ဂွံပံက်ကဵုအခေါၚ်နွံရောၚ်ဂှ် အကြာညးတာလျိုၚ်သွာၚ်ပၞာန် (ကံၚ်သဳပၞာန်)၊ သၞာဲဒဴဌာနလ္ၚဵုတအ် ဗက်ဂၠာဲရာန်ဒၟံၚ် ကွဳစက် without နွံကၠုၚ်ရ။

ကိုန်စဳဇန် ကာလရပ်စၟဳစၟတ် ကွဳစက် without လိုၚ်ဇြေန်ဟွံမွဲဏံဂှ် ဒဵုကာလလဵုဂှ် ကံၚ်သဳ ပၞာန်တအ် ဟီုဓမံက်လဝ် ချိုတ်ပၠိုတ်ဟွံမွဲတုဲ ကာလကိုန်စဳဇန်ၜက်အာတုဲမ္ဂး သွက်ဂကောံ သၞာဲဒဴဌာနနာနာတအ် သ္ဂောံပံက်ကဵုအခေါၚ်ဍိုက်သုၚ်စောဲနွံရောၚ်ဂှ် အကြာဗွိုၚ်သၞာဲဒဴ ကံၚ်သဳပၞာန်တအ် ဟီုမံၚ်ညးသ္ကအ်ရ။

ကွဳစက်ယာန် without ဂှ် ဒေသရးဍုၚ်မန် ကေုာံ ကရေၚ်ဂှ် ဂကောံသၞာဲဒဴလစှ်ေကံၚ်သဳ ပၞာန်ဂမၠိုၚ်၊ အကြာဂကောံရပ်လွဟ်ဂမၠိုၚ်၊ အကြာညးဍုၚ်ကွာန်ကွပ်နာနာတအ် ဍိုက်သုၚ် စောဲဒၟံၚ် ဂၠိုၚ်နူကွဳစက်ယာန် လိုၚ်ဇြေန်နွံဂှ်ဏီရောၚ် ဂွံတီကေတ်ရ။