ကိစ္စပေဲါရုဲမာဲဂှ် ဟွံဆေၚ်ကဵုကမၠောန် ဂကောံပံၚ်ကောံပရေၚ်ဂကူမန် (MAU) ရောၚ် ညးမၞုံအခေါၚ်ဟီုဂး နာဲသာန်တေန် (ညးအုပ်ကာနာနာ ဗော်ညဳသၟဟ်မန်) ဟီုရ။

“ကိစ္စပေဲါရုဲမာဲဂှ် မုဟွံချပ်လဝ်ပုဟ်၊ ဂကောံပံၚ်ကောံပရေၚ်ဂကူမန် (MAU) ကမၠောန်ဂှ်ဟွံသေၚ် ချပ်ကမၠောန်ပရေၚ်ကောန်ဂကူမန်ဏောၚ်၊ ပေဲါရုဲမာဲဂှ် ဆေၚ်ကဵုဗော်ဏောၚ်” သာ်ဝွံ ညးဟီုရ။

ဂိတုဂျောန် စၟတ်တ္ၚဲ (၆) တုဲကၠုၚ်ဏံဂှ် နကဵုညးစၞးဗွိုၚ်ဗော်ဍုၚ်မန်တၟိ (၅) တၠ၊ ညးစၞးဗွိုၚ်ဗော်ညဳသၟဟ်မန် (၅) တၠ၊ ညးစၞးဗွိုၚ်ဂကောံမှာဇန်မန်နာနာ (၉) တၠ၊ ပံၚ် (၁၉) တၠ သ္ပကောံဓရီုတုဲ ဒက်ပ္တန်ဏာ ဂကောံပံၚ်ကောံပရေၚ်ဂကူမန် Mon Affairs Union (MAU) နကဵုဗီုပြၚ်တၟိရ။

ပ္ဍဲကဵုဒက်ပ္တန်ဏာ ဂကောံပံၚ်ကောံပရေၚ်ဂကူမန် Mon Affairs Union (MAU) ဗီုပြၚ်တၟိဏံဂှ် ဟိုတ်နူဒုၚ်သ္ဇိုၚ် (၃) ဗွိုၚ်ဓဝ်တုဲ ဟွံဒှ်ဂကောံသ္ပစၞးအလုံဂကူမန် ရောၚ်ဂှ်လေဝ် မၞိဟ်လ္ၚဵု ထံက်ထ္ၜးနွံကၠုၚ်ရ။

“ဗီုပြၚ် (၃) ဗွိုၚ်ဏံဂှ် နူကဵုကောံဓရီုပရေၚ်ဂကူမန် ညဳသာ (၂၀၂၂) တေံဏောၚ် ဖျေံလဝ်၊ အတိုၚ်ညးဂမၠိုၚ်ဖျေံလဝ်ဂှ်ရ ဒက်ပ္တန်ဏာ ဗီုပြၚ်တၟိဏံ၊ ဂကောံပံၚ်ကောံပရေၚ်ဂကူမန် (MAU) ဏံဂှ် ဒှ်ဂကောံ ဒၞာဲပညဳပညပ် ပရေၚ်ကမၠောန်ဂကူမန်မွဲရ၊ လတူဂကောံလဵု လတူဗော်လဵုလေဝ် ဓလီုဟွံဂွံပုဟ်၊ ၜိုတ်ဆဒၞာဲကောံကလောံ ပညဳပညပ်ပရေၚ်ဂကူ ဆဂှ်ရ” သာ်ဝွံ ညးဆက်ဟီုရ။

ဂကောံပံၚ်ကောံပရေၚ်ဂကူမန် Mon Affairs Union (MAU) တုဲကၠုၚ် (၂၀၀၈-၂၀၁၃) တေံဂှ် ဒုၚ်သ္ဇိုၚ်ကဵု ဗွိုၚ်ဗော်ဍုၚ်မန်တၟိ၊ ဗွိုၚ်ပယျဵု ကေုာံ ဍုၚ်သေံ၊ ဗွိုၚ်ပ္ဍဲဍုၚ်၊ ဗွိုၚ်ဍုၚ်သၟာၚ် ပံၚ် (၄) ဗွိုၚ်တုဲ ဒက်ပ္တန်ကၠုၚ်လဝ်ရ။

လ္တူဒုၚ်သ္ဇိုၚ်ဗီုပြၚ် (၄) ဗွိုၚ်ဂှ် က္ဍိုပ်သ္ကိုပ်ဗော်ပရေၚ်ဍုၚ်ကွာန်ပ္ဍဲဍုၚ်တအ် ဟွံစှေ်စိုတ်တုဲ သွက်ဂွံကလေၚ်ဒက်ပ္တန်အာ ဂကောံပံၚ်ကောံပရေၚ်ဂကူမန် Mon Affairs Union (MAU) ဗီုပြၚ်တၟိဂှ် ပ္ဍဲကောံဓရီုဇၞော်ပရေၚ်ဂကူမန် ကအ်ပှ်လှ် (၂၀၁၆)တေံ စပညဳပညပ်ချူဓဇက်ကၠုၚ် ဗီုပြၚ်ဒက်ပ္တန်ဂကောံတၟိရ။

ပ္ဍဲကဵုဒက်ပ္တန် ဂကောံပံၚ်ကောံပရေၚ်ဂကူမန် ဗီုပြၚ်တၟိဏံ ညးစၞးဗွိုၚ်ဇဳ ညံၚ်ဂွံပါလုပ်မာန်ဂှ် ဥက္ကဌဗော်ဍုၚ်မန်တၟိ နာဲဟံသာ ပတိုန်ထ္ၜး ကဵုကၠုၚ်လညာတ် အဆက်ဆက်နွံကီုလေဝ် ဗွိုၚ်ပယျဵု ကေုာံ ဍုၚ်သေံကဵု ဗွိုၚ်ဍုၚ်သၟာၚ်တအ် ဟွံပါလုပ်ရ။