စတမ်နူဂိတုဂျောန်မံက်တုဲကၠုၚ်ဏံ အလုံမွဲကၟိန်ဍုၚ်ဂှ် စရပ်အာကွဳစက်ယာန် လိုၚ်ဇြေန်ဟွံမွဲ (without) ဂှ်တုဲ ပ္ဍဲကဵုကိုန်စဳဇန် စၟဳစၟတ် ရပ်စပ်ကွဳစက်ယာန်ဂှ် ပရေၚ်ကၠးဖ္ဍးဟွံမွဲရောၚ် ညးဍုၚ်ကွာန်မၚ်ရံၚ်အခါတ်အကာဲဂမၠိုၚ် ဟီုအိုတ်ရ။

ကိုန်စဳဇန် ရပ်စပ်စၟဳစၟတ်ကွဳစက်ယာန်ဂှ် အခိၚ်ဗၞတ်ဗ္ၜတ်ကာလလဵု ဟွံစၟတ်လဝ်ကီု၊ ပ္ဍဲကဵုစၟဳစၟတ်ရပ်စပ်ဂှ် ကေတ်အရေဝ် ကဵုဒုဟ်ဒဏ် ပရေၚ်ဗဗွဲဓဝ်ဟွံမွဲကီု၊ ထ္ၜးဟိုတ်ကဵု ပရေၚ်ရပ်စပ်ကွဳစက်ယာန်တုဲ ပရေၚ်စလာပ်ပူဂဵု ကတဵုဒှ်ကၠုၚ်ကီု အရာနာနာသာ်ဂှ် ပရေၚ်ကၠးဖ္ဍးဟွံမွဲရောၚ် နာဲခိုၚ်တာန် ညးစပေန်ဇြေန် ဌာနပရေၚ်တဵုလွဳ ဟီုပါ်ပါဲသာ်ဝွံရ။

“ကိုန်စဳဇန်ဍေံရပ်ကွဳလိုန်ဓာတ် ကွဳစက်ကာဏံဂှ် ဍေံရပ်ဒဵုကဵုအခိၚ်ကာလလဵု ဟွံဟီုပတိတ်လဝ်ချိုတ်ချိုတ်ပၠိုတ်ပၠိုတ်ပုဟ်၊ တုဲတှ်ေ ပ္ဍဲကဵုရပ်စပ်ကေတ်အရေဝ်ဂှ်လေဝ် မၞိဟ်လုက်စုက်ဆက်စၠောံကဵုဍေံတအ် နွံညိတှ်ေ ဟွံဒှ်ဒုဟ်၊ မၞိဟ်ဟွံ ဆက်ဆောံလဝ်ကဵုဍေံတအ်တှ်ေ ဗီုဒးစိုတ် တက်ဒုဟ်တုဲ ကေတ်ဩန်၊ ပ္ဍဲကဵုကေတ်ဩန်ပၠန်ဂှ် မၞိဟ်လ္ၚဵုဂှ်တှ်ေ သီဂြပ်ညး ကေတ်ဩန်တုဲ ဗလးနွံ၊ မၞိဟ်လ္ၚဵုပၠန်ဂှ်တှ်ေ သီထောံသီုဂြပ်ညး မၞိဟ်ဂှ်လေဝ် စုတ်ထံၚ်နွံ ဗီုဂှ်ဣနွံ၊ မွဲပၠန်ဂှ်တှ်ေ ဍေံတအ်ဂွံအာအခေါၚ်စၟဳစၟတ်ရပ်ကွဳလိုန်ဓာတ် ရပ်ကာတုဲတှ်ေ စှ်ေအာအကြာကွာန်သၟဝ်တေံလေဝ် ဗက်ရပ်ကွဳလိုန်ဓာတ်အကြာကွာန်တဂှ် ဗက်တပ်ဒါန်အကြာညးဍုၚ်ကွာန်တဂှ် အကြာဒေသကွာန်တဂှ်တှ်ေ ဗက်ကၠောန်မံၚ်ဆဆဵု၊ ပရေၚ်ကၠးဖ္ဍးညိလေဝ်ဟွံမွဲပုဟ်” သာ်ဝွံ ညးဟီုရ။

ပ္ဍဲကဵုအစဳဇန် စၟဳစၟတ်ရပ်စပ်ကွဳလိုန်ဓာတ် ကွဳစက်ယာန် လိုၚ်ဇြေန်ဟွံမွဲ (without) ဂှ် မွဲဒေသကဵုမွဲဒေသ ဟွံတုပ်တုဲ ပရေၚ်တက်ဒုဟ်ဒဏ်လေဝ် ဟွံတုပ်ရ။ ရပ်တုဲ သီုကွဳစက်ယာန် သီုမၞိဟ်ဂှ် ဗလးကဵုနွံ၊ ရပ်ဂွံ တက်ဒန်ဩန်တုဲ ဗလးကဵုနွံ၊ ရပ်ဂွံတုဲ သီဂြပ် သီုစုတ်ဒုဟ်ဒဏ်ထံၚ်လေဝ်နွံတုဲ ပါ်ခြာလဝ်သာ်လဵုဂှ် သောၚ်ကလးလဝ်ဟွံမွဲရ။

အခိၚ်ညးဍုၚ်ကွာန် ဒးဒုၚ်ဒၟံၚ် ဘဲပရေၚ်ဍုၚ်ကွာန် ပရေၚ်ပၞာန်တုဲ ဂြေပ်ဂြတ်ဒၟံၚ်ဏံဂှ် ကွဳစက်ယာန်တအ် စၞးဒးရပ်စပ် ကေတ်အရေဝ်ဂှ် ပံက်ကၠောန်ကဵု လာၚ်ဇြေန်မွဲမွဲသာ်မ္ဂး သာခိုဟ်ရောၚ် သၞာဲဒဴ ဌာနပရေၚ်ပညာ လစှ်ေကံၚ်သဳပၞာန် ပွိုၚ်ဍုၚ်မတ်မလီုမွဲတၠ ဟီုသာ်ဝွံပၠန်ရ။

“အခိၚ်ညးဍုၚ်ကွာန်ကြေပ်ဂြတ်မံၚ်ဗီုတ္ၚဲဏံဂှ် စၞးဒးရပ်ကွဳစက် ကွဳလိုန်ဓာတ် တေၚ်တေၚ်ဂြတ်ဂြတ်ဗီုလၟုဟ်ဏံဂှ် ယဝ် ပံက်ကၠောန်ကဵု လိုၚ်ဇြေန် မွဲမွဲဗီုတှ်ေ ညးဍုၚ်ကွာန်လေဝ် သက်သာ၊ ပရေၚ်က္ဍုဟ်မၠေံ အကြာညးဍုၚ်ကွာန်ကဵု ကံၚ်သဳ ပၞာန်ဂှ်လေဝ် သက်သာစှ်ေမာန်၊ ဗီုကၠောန်မံၚ်လၟုဟ်ဏံဂှ်တှ်ေ သာက္ဍုဟ်မၠေံတုဲ ပရေၚ်ဒစဵုဒစးညးဍုၚ်ကွာန်ဂှ် ဆက်တုဲ သ္ကာတ်မြဟ်ကၠုၚ်မာန်ဏောၚ်” သာ်ဝွံ သ္ဂးရ။

ပ္ဍဲဍုၚ်မန်ဂှ် စတမ်နူဂိတုမေ (၃၀) တုဲကၠုၚ်တေံ စစၟဳစၟတ်ရပ်စပ်ဒၟံၚ်ကွဳစက်ယာန် ဗွဲမတေၚ်ဂြတ်နွံတုဲ ဒဵုကာလလဵု ရပ်စပ်အာရောဂှ် ဟီုလလောၚ်လဝ်ဟွံမွဲရ။