သၞေဟ်ကင် သွက်ဂွံတတ်ပယျဵု တွဵုရးဍုင်မန် ကဵု ကရေင် ပါင်ဒပ်အမၠံက် ၃၀၈ မၞုံဗမံက်ကွာန်အၜေတ် ပွိုင်ဍုင်မုဟ်ဍုင်ဂှ် ကြဴနူပတေင်ဂရတ်ပတိုန်လဝ် ပရေင်အာကၠုင်တုဲ ညးအာတရဴတအ် ဒှ်ခက်ခုဲတၟာဂလိုင်ရောင် ညးဒေသတအ် ဟီုရ။
သၞေဟ်ကင်ဝွံ ပ္ဍဲဂိတုအဝ်ဂေတ်ဏံ သီုကဵုဂလိုင်ပတေင်လဝ်ဇြဟတ်ဂီုကၠီုတုဲ ကွဳစက်ဒမြိပ်လိုင်ကီု၊ ကွဳစက်ဖ္ဍိုက် ကပေါတ်တအ်ကီု၊ မၞိဟ်အာတရဴတအ်ကီု စၟဳစၟတ်ဂရတ်ပတေင်တိုန် တေင်တေင်ဂြတ်ဂြတ်နွံရ။
“သၞေဟ်ကင် ဗမံက်အၜေတ် ဂၠံင်အာကျာ်ပိဂှ် ကွဳစက်ဒမြိပ်လိုင်ကျာ်ပိတအ် ဟွံဂံင်တတ်အိုတ်ရ၊ ဒးခပဝ်အာဂၠံင်တၞဟ် ရ သၞေဟ်ကင်ဂှ်တှ်ေ မၞိဟ်လေဝ် ဒးစှ်ေကွာ်ဖအိုတ်ဏောင်၊ စၟဳစၟတ်တေင်ဂြတ်တိုန်ကွေံကွေံ၊ ဠ တေံတှ်ေ ကွဳစက်တတ် တှ်ေ ကဵုဩန်ဍေံကေတ်မံင်၊ လၟုဟ်တှ်ေ ကဵုဩန်လေဝ်ဟွံဂွံရ ဗၠေတ်အခိုက်တှ်ေ ဍေံရပ်သီကေတ်ဖအိုတ်ရ” တၠကွဳစက် ဒမြိပ်လိုင် ကျာ်ပိ မွဲတၠ ဟီုထ္ၜးရ။
ယဝ်ရကပေါတ်မ္ဂး သွက်ရပ်စပ်စသုင်အရင်သ္ၚိရ ဇက်ဖ္ဍိုက်ဂွံတုဲ ယဝ်ရမၞိဟ်မ္ဂး ရပ်လဝ်ကာတ်ကောန်ဍုင် မဂၞန် ၁၀ (မန်)ရ ကဵုအခေါင်တတ်ရ။ ယဝ်ရ မၞိဟ်ရပ်လဝ်ကာတ်ကောန်ဍုင် မဂၞန် ၁၀ (မန်)ဟွံသေင်မ္ဂး ၁ တၠမ္ဂး အောန်အိုတ် ၃ ကိုဋ် ဒဵုကဵု ၅ ကိုဋ် ဒးကဵုနွံရောင် ဂးရ။
“ယဝ်ရ(မှတ်ပုံတင်)မန် တှ်ေ ညးမွဲ ၅၀၀၀၊ ၁၀၀၀၀ ရ၊ မၞိဟ်နူသ္ၚောဲတှ်ေ ဒးဒုင်စၟဳစၟတ်ဂၠိုင်ကွေံကွေံ အောန်အိုတ်တှ်ေ ၃ ကိုဋ် ဒဵုကဵုမၞိဟ်မွဲ ၅ ကိုဋ်ဒးကဵုနွံမံင်၊ လက္ကရဴဏံတှ်ေ မၞိဟ်နူသ္ၚောဲသ္ၚောဲအာဟွံဂွံရ၊ ကပေါတ်ပၠန်လေဝ် ၜိုတ်ဆ အရင်သုင်စောဲသ္ၚိရ ဇက်ဖ္ဍိုက်ဂွံ၊ ကပေါတ်သေံတှ်ေ မုလေဝ် ဇက်ဖ္ဍိုက်ဟွံဂွံရ ခက်ကွေံကွေံ” တၠကွဳစက်ဂှ် ဆက်ဟီုရ။
ဟိုတ်နူပတေင်ဂရတ်ပတိုန်ကၠုင် ပရေင်အာကၠုင်ကီု၊ ကၟာတ်လဒဵုကၠုင် ပရေင်ဇက်ဖ္ဍိုက်ကပေါတ်ဂှ်တုဲ ညးဒေသတအ် ကီု၊ သွက်ရဲသွံဖျာရာန်ကပေါတ်တအ်ကီု ဒှ်ကၠုင်ခက်ခုဲဖအိုတ်ရ။
ဂၠံင်တတ်ကဵုပယျဵု အကြာတွဵုရးဍုင်မန် ကဵု ကရေင် ပါင်ဂၠံင်ကွာန်အၜေတ်(ပွိုင်ဍုင်မုဟ်ဍုင်)ဂှ် ကြဴနူကဵု ဂၠံင်ဇြပ်ဗု (သက္ကအ်)-ကျာ်ပိ ကၟာတ်အာဟိုတ်နူပေါဲဗတိုက်ဂှ်တုဲ ကွဳစက်ဒမြိပ်လိုင်ကီု၊ ကွဳစက်ဇက်ဖ္ဍိုက်ကပေါတ် ပယျဵုသေံဂှ် ဒးသ္ပအဓိကကဵု ဂၠံင်ဝွံရ။
ကြဴနူကဵု ဒပ်ဂီုကၠီုသၞေဟ်ကင် ဒပ်မၠံက်ဇၞော်(၃၀၈) ဗမံက်ကွာန်အၜေတ်ဂှ် ပတေင်ဂရတ်ပတိုန် ပရေင်ဂီုကၠီု၊ ပရေင်စၟဳ စၟတ်ဂှ်တုဲ ကွဳစက်ဒမြိပ်လိုင်ပယျဵုကျာ်ပိတအ်ကီု၊ ကွဳစက်ညးဍုင်ကွာန် အာရာန်ကပေါတ်ဖျာ အကြာတွဵုရးဍုင်မန် ကဵု ကရေင်တအ်ကီု ဒှ်အာပရေင်ခက်ခုဲဖအိုတ်ရောင် ဂွံတီကေတ်ရ။
