ပ္ဍဲကဵုမွဲဒမြိပ်ဒေသမန်သကုတ်သၠုၚ်ဂှ်ဝွံ ကေတ်ဂီုကၠီုထိၚ်ဒဝ်တိဍာ်ခိုၚ်တုဲမ္ဂး ကၠောန်အာ ပေါဲရုဲမာဲရောၚ် ညးက္ဍိုက်ပ်ဒပ်မၚ်ကၚ်ကွာန် ပါလုပ်ပ္ဍဲဂကောံကမ္မယှေန်ပေါဲရုဲမာဲ ဍုၚ်မန်မွဲတၠဂှ် ဟီုရ။
“ပေါဲရုဲမာဲ သကုတ် (၁) ဂှ် ကၠောန်အာ ဒၞာဲပွိုၚ်ဍုၚ်ဂီုကၠီု ခိုဟ်ခိုဟ်ဂှ်ကၠာ၊ အခိၚ်ကၠောန်အာ ပေါဲရုဲမာဲသကုတ် (၁) ဂှ်တှ်ေ နကဵုဒပ်ပၞာန်တအ် ဂစာန်ထ္ပက်အာပၞာန် ဒေသ သွက်ဂွံကၠောန်အာ ပေါဲရုဲမာဲ သကုတ်လက္ကရဴဂှ်ဏောၚ်၊ ထ္ပက်ပၞာန်တုဲ ကေတ်ဂီုကၠီု ထိၚ်ဒဝ်တိဍာ်ခိုၚ်တုဲအိုတ်မှ သကုတ်သှ်ေဂှ် ဆက်ကၠောန်အာပၠန်” သာ်ဝွံ ညးက္ဍိုက်ပ် ဒပ်မၚ်ကၚ်ကွာန်ဂှ် ဟီုထ္ၜးရ။
ပ္ဍဲတွဵုရးဍုၚ်မန် အလုံ (၁၀) ပွိုၚ်ဍုၚ်ဂှ် ကၠောန်အာပေါဲရုဲမာဲရောၚ် ကမ္မယှေန်ပေါဲရုဲမာဲ လစှေ်နူကမ္မယှေန်ပၞာန်တအ် လလောၚ်လဝ်တုဲ နကဵုသကုတ် (၁) ဂှ်မ္ဂး ပွိုၚ်ဍုၚ်သဓီု၊ ပွိုၚ်ဍုၚ်ကျာ်ထဝ်၊ ပွိုၚ်ဍုၚ်ကျာ်မြဟ်၊ ပွိုၚ်ဍုၚ်တ္ကအ်ခၟိုၚ်ကဵု ပွိုၚ်ဍုၚ်မတ်မလီု (၅) ပွိုၚ်ဍုၚ်ဂှ် ကၠောန်အာ ပ္ဍဲဂိတုဒဳဇြေန်ဗာ (၂၈) ဂှ်ရောၚ် ဟီုလဝ်ရ။
“ကၠောန်အာပေါဲရုဲမာဲ အလန်ကၠာဏံဂှ် ပွိုၚ်ဍုၚ်ဂီုကၠီု ဂွံဖျေံစိုတ်ဂှ်ရ ကၠောန်အာ (၅) ပွိုၚ်ဍုၚ်ကၠာ၊ သှေ် (၅) ပွိုၚ်ဍုၚ်ဂှ်တှ်ေ ဂွံဖျေံစိုတ်ဂီုကၠီုတုဲမှ ဆက်ကၠောန်အာပၠန်” သာ်ဝွံ ညးဆက်ဟီုလဝ်ရ။
လၟုဟ်ပြဟ်ပြဟ်ဏံ သွက်ဂွံကေတ်ဂီုကၠီု လၟေၚ်ကမၠောန်ပေါဲရုဲမာဲတုဲ ကမ္မယှေန်ပၞာန်တအ် ပလေဝ်ပလေတ်ချဳဒရာၚ်ကၠုၚ်ပၞာန် လ္ပာ်ဒေသဍုၚ်မန် သကုတ်သၠုၚ်ကျာနွံတုဲ အစဳဇန်သွက်ဂွံထ္ပက်ပၞာန်နွံရောၚ်ဂှ်လေဝ် သ္ကိုပ်ဒပ်မၚ်ကၚ်ကွာန်ဂှ် ဆက်လဴလဝ်ရ။
လ္ပာ်ကမ္မယှေန်ပၞာန်တအ် ချဳဒရာၚ်ကၠုၚ် သွက်ဂွံစဵုဒၞာ လၟေၚ်ကမၠောန်ပေါဲရုဲမာဲနွံတုဲ လ္ပာ်ဂကောံပၠန်ဂတးဂမၠိုၚ်တအ်လေဝ် ပြုပြေၚ်ဖျေံလဝ်ပၞာန် သွက်ဂွံဒစဵုဒစး လၟေၚ်ကမၠောန်ပေါဲရုဲမာဲနွံရ။
ပ္ဍဲဒေသဍုၚ်မန်ဂှ် ဗော်ပရေၚ်ဍုၚ်ကွာန်လုပ်ပြိုၚ်ပေါဲရုဲမာဲတအ်ကီု၊ ပူဂဵု ထံက်ဂလာန် ပူဗိုၚ် လၟေၚ်ကမၠောန် ပေါဲရုဲမာဲကီု ညံၚ်ဟွံဂွံကဵုဇြဟတ်ကဵု လၟေၚ်ကမၠောန်ကမ္မယှေန်ပၞာန် တအ်ဂှ်တုဲ ဗော် ကေုာံ ပူဂဵု ချဳဒရာၚ်ပူဗိုၚ် လၟေၚ်ကမၠောန်ပေါဲရုဲမာဲတအ်ဂှ် ကေတ်အာ ဒုဟ်ဒဏ်ပိုတ်ပိုတ်ရောၚ်ဂှ်လေဝ် လ္ပာ်ဂကောံပၠန်ဂတးဂမၠိုၚ်တအ် ဓမံက်ပ္တိတ်လဝ်နွံဂှ် ဂွံတီကေတ်ရ။
