ပ္ဍဲအခိၚ်ဂံက်ထ္ၜိုတ်တိတ်ဂၠိုၚ်ဏံ ညးသွံဍာ်ထ္ၜိုတ်ဂၠိုၚ်တိုန်တုဲ တၠကမၠောန်ရုၚ်စက်ဗုတ်ထ္ၜိုတ်အဆံၚ်သၠုၚ်တအ် ရာန်ဍဵုဖျေံကၠုၚ်ၚုဟ်နွံရောၚ် ရဲသွံဍာ်ထ္ၜိုတ်တအ် ဟီုရ။
ၚုဟ်ဍာ်ထ္ၜိုတ်ဂှ် နူကဵုအခိၚ်ဗြဲအိုတ်ခွါတ်ထ္ၜိုတ်ဂွံတုဲ စဵုကဵုလၟုဟ်ဂှ် ၚုဟ်စှ်ေအာ ဗၞတ် (၂၀၀) ဒ္ကေဝ်ပြၚ်ရတုဲ စတမ်နူတနေံ (နဝ်ဝေမ်ဗာ၂၇) ဂှ် ထပ်စှ်ေအာ (၅၀) ပၠန်ရောၚ် ညးသွံဍာ်ထ္ၜိုတ် နူဇြပ်ဗုကီု မုဟ်ဍုၚ်ကီု ဟီုရ။
“လၟုဟ်စိုပ်ကၠုၚ်အခိၚ်ဂံက်တိုန်ရတှ်ေ ထ္ၜိုတ်တိတ်ဂၠိုၚ်တိုန်၊ တုဲပၠန်တှ်ေ လၟုဟ်ဂှ် မၞိဟ်ဗုတ်သွံထ္ၜိုတ်ဂတှ်ေဂှ် အောန်စှ်ေကွေံကွေံရ၊ ဗွဲမဂၠိုၚ် သွံဍာ်ထ္ၜိုတ်သၟးရဂၠိုၚ်၊ ဍာ်ထ္ၜိုတ်ဂၠိုၚ်ခ္ဍၚ်တှ်ေ တၠရုၚ်စက်ဗုတ်ထ္ၜိုတ်တအ် ရာန်ဍဵုဖျေံၚုဟ်ခ္ဍၚ်” သာ်ဝွံ တၠ ကၠအ်ထ္ၜိုတ်သွံဍာ်(ထ္ၜိုတ်) နာဲတိုၚ်ဟာန် နူဇြပ်ဗု ဟီုရ။
ၚုဟ်ဍာ်ထ္ၜိုတ်ဂှ် အပ္ဍဲပွိုၚ်မွဲဂိတုဏံ မွဲဝါမ္ဂး ၚုဟ်စှ်ေအာ (၅၀) ဗၞတ် (၄) ဝါဒှ်တုဲ စဵုလၟုဟ်မ္ဂး ၚုဟ်စှ်ေအာ ဗၞတ် (၂၀၀) ဒ္ကေဝ်ဒှ်ယျရောၚ် ညးသွံဍာ်ထ္ၜိုတ်တအ် သ္ဂးရ။
“နူစပိုဲသွံဂှ် ဍာ်ထ္ၜိုတ်မွဲပံၚ် (၂၆၅၀)၊ စှ်ေမွဲတဲတှ်ေ (၅၀)၊ ဒဵုနူတနေံတေံတှ်ေ စှ်ေဂွံ (၄) ဝါတုဲရ၊ နူစခွါတ် ၚုဟ်စှ်ေအာ (၂၀၀) တုဲရ၊ ၜိုတ်ပိုဲတီတှ်ေ ၚုဟ်ထ္ၜိုတ်ဂတှ်ေ ဟွံစှ်ေပုဟ်၊ ၚုဟ်ဍာ်ထ္ၜိုတ်ရ စှ်ေမံၚ်၊ ဟီုဟဏံတှ်ေ ရဲသွံဍာ်ထ္ၜိုတ်ဂှ် ဂၠိုၚ်လောန်အာတုဲတှ်ေ ရဲရုၚ်စက်တအ် ကေတ်ဍာ်ထ္ၜိုတ်ဟွံအိုတ်၊ တၠရုၚ်စက်ဗုတ်ထ္ၜိုတ်တအ်ရ ဍဵုရာန်ဖျေံမံၚုဟ်” သာ်ဝွံ နာဲထောန်မိုၚ် တၠကၠအ်ထ္ၜိုတ် နူပွိုၚ်ဍုၚ်မုဟ်ဍုၚ်ဂှ် ဟီုရ။
ၚုဟ်ဍာ်ထ္ၜိုတ်ဂှ် တၠရုၚ်စက်ဗုတ်ထ္ၜိုတ်အဆံၚ်သၠုၚ်တအ် ၜိုန်ရစၟတ်လဝ် တုပ်ကဵုၚုဟ်ထ္ၜိုတ်ဂတှ်ေ အဆံၚ်မုက်ဂၞန် (၃) RSS 3 ဂှ်ကီုလေဝ် ထ္ၜိုတ်ဂတှေ် မုက်ဂၞန် (၃) ဂှ် နွံၚုဟ် အကြာ (၂၈၅၀) ကဵု (၂၇၀၀) ပြၚ်ကီုလေဝ် ၚုဟ်ဍာ်ထ္ၜိုတ်ဂှ် တၠရုၚ်စက် ထ္ၜိုတ်သီုဖအိုတ်တအ် ပညဳပညပ်ညးသ္ကအ်တုဲ ရာန်မံၚ်မွဲပံၚ် (၂၄၀၀) ဒ္ကေဝ်ဓဝ်ရ။
ထ္ၜိုတ်အဆံၚ်သၠုၚ်အိုတ် RSS 1 မုက်ဂၞန် (၁) တၠရုၚ်စက်တအ် ရာန်ဍာ်တုဲ ဗုတ်မံၚ်လၟုဟ်ဂှ် မွဲပံၚ် အကြာ (၃၀၀၀) ဒ္ကေဝ်နွံတုဲ မုက်ဂၞန် ၃ RSS 3 ဂှ် နွံအကြာ (၂၈၅၀)၊ USS 3 စဲတ္ၚဲဂှ် နွံအကြာ (၂၇၀၀)၊ RSS 5 မုက်ဂၞန် (၅) ဂှ် နွံအကြာ (၂၆၈၀)၊ USS 5 ဍုက်က်ဂှ် အကြာ (၂၂၉၀) ကဵု အကြာ (၂၄၂၀) အဆံၚ်ဆံၚ်နွံတုဲ ၚုဟ်ထ္ၜိုတ်ဂှ် မွဲဒေသကဵုမွဲဒေသ ၚုဟ်တၞဟ်ခြာနွံညိညရ။
ဍာ်ထ္ၜိုတ်ဂှ် ဗုတ်ပတိတ်ထ္ၜိုတ်အဆံၚ်သၠုၚ် ဒှ်မုက်ဂၞန် (၁) RSS 1 (No.1) မ္ဂး (၁) ပံၚ် အောန်အိုတ် အကြာ (၄၀၀) ဒ္ကေဝ်ကဵု (၅၀၀) ဒ္ကေဝ် ပရဲတိတ်ဂၠိုၚ်မံၚ်ဂှ်တုဲ တၠတမ်ရိုဟ်ညးသ္ပမာန်တအ် ပတန်ကၠုၚ်ရုၚ်စက်ဗုတ်ထ္ၜိုတ်ဂတှေ်အဆံၚ်သၠုၚ် ဂၠိုၚ်ကၠုၚ်မံၚ်ရောၚ် ဂွံတီကေတ်ရ။
