ဟိုတ်နူအကာဲအရာ ပရေၚ်ဍုၚ်ကွာန်တုဲ ပေါဲဇာတ်၊ ဂဳတ ဒေါံဇူမံၚ်ဂၠိုၚ်ကဵုသၞာံဂှ် အခိၚ်လိုက်ဝှ်သၞာံဏံ ပ္ဍဲဒေသနာနာ ကလေၚ်ဒှ်မံၚ်နွံဂှ် ဂွံဆဵုကေတ်ရ။

ပ္ဍဲဍုၚ်မန်ဂှ် စတမ်နူပၞာန်သီအဝဵု (၂၀၂၁) တေံရ ပေါဲဇာတ်ကီု၊ ဂဳတကီုဂှ် ဒေါံဇူကၠုၚ်လဝ်တုဲ ပ္ဍဲအခိၚ်လိုက်ဝှ်ဏံမ္ဂး ဗွဲမဂၠိုၚ် သဘၚ်လလးကထိုန် ပ္ဍဲဒေသနာနာဂှ် လိၚ်ဗဒှ်ပေါဲဇာတ်ကီု၊ ဂဳတကီု နွံကၠုၚ်ရ။

“ဗွဲမဂၠိုၚ်ဂှ် သဘၚ်လလးရ ဗဒှ်ကၠုၚ် ပေါဲဇာတ် ဂဳတဂၠိုၚ်၊ သၞာံတုဲတုဲကၠုၚ်တေံဂှ် ဟိုတ်နူပရေၚ်ဍုၚ်ကွာန်ဟွံၜိုဟ်ဩိုဟ် တုဲတှေ် ဟွံဂံၚ်ဗဒှ်ကၠုၚ်၊ လိုက်ဝှ်သၞာံဏံဂှ် ပေါဲဗတိုက်အောန်သိၚ်စှ်ေအာတုဲတှ်ေ ပေါဲဇာတ်တအ် ဂဳတတအ် ကလေၚ်ဒှ်ဂၠိုၚ်တိုန်” သာ်ဝွံ ညးဒေသ ပွိုၚ်ဍုၚ်ဇြပ်ဗုမွဲတၠ ဟီုရ။

ဒေသဍုၚ်မန်ဂှ် ဇၟာပ်စိုပ်ကၠုၚ်အခိၚ်လိုက်ဝှ်သှ်ပဝါမ္ဂး သဘၚ်အခိုက်ကၞာဒေသကီု၊ သဘၚ်ကျာ်ကီု၊ သဘၚ်ဖျဴသွဝ်ကီု၊ သဘၚ်မ္ၚဵုနာနာသာ်ကီု ကၠောန်ကၠုၚ်မံၚ်နွံရ။

“ပေါဲဇာတ် ဂဳတ ကလေၚ်ဒှ်တိုန်ညိညိဟီုဂှ် ဗွဲမဂၠိုၚ်ဂှ် ကလေၚ်ဒှ်တိုန်ဟီုဂွံ၊ ဆဂး ဒေသလ္ၚဵု သဘၚ်လ္ၚဵုဂှ်တှေ် ညးတအ် ချိၚ်ဆမံၚ်ဏီ၊ ညံၚ်ဟွံဂွံဗဒှ်ပေါဲသဘၚ်ဂှ်လေဝ် ညးတအ် ချိၚ်မံၚ်လေဝ်နွံကီု” သာ်ဝွံ ညးဒေသ ပွိုၚ်ဍုၚ်မုဟ်ဍုၚ်မွဲတၠဂှ် ထပ်ဟီုရ။

ဍုၚ်မန်ဂှ် ဗွဲကြဴနူကဵု အကာဲအရာ ပရေၚ်ဍုၚ်ကွာန် ကတဵုဒှ်ရုသံၚ်တုဲ ပွိုၚ် (၄) သၞာံဂှ် သဘၚ်အခိုက်ကၞာဒေသကီု၊ သဘၚ်ကျာ်ကီု၊ သဘၚ်ဖျဴသွဝ်ကီု၊ သဘၚ်မ္ၚဵုနာနာသာ် ဒးကၠောန်ကၠုၚ်သ္ၚိတ်တ်ဇြဇြနွံတုဲ ဗွဲကြဴနူသၞာံတုဲကၠုၚ်ဏံ သဘၚ်လ္ၚဵုဂှ် စပံက်ဗဒှ်ကၠုၚ် ပေါဲကချိၚ်ဍောတ်ဍောတ်၊ ဂဳတဍောတ်ဍောတ် နွံကၠုၚ်ရ။