အပ္ဍဲပွိုင်ဍုင်ဖါအင် တွဵုရးကရေင်ဂှ် ဟွံကဵုအခေါင်ကၠောန် ပေါဲရုဲမာဲတုဲ ဒစဵုဒစးအာဏောင် ကမ္မတဳကေင်ကာပွိုင်ဍုင်ဖါအင် ခရိုင်ဒူတထူ ဗော်သွးကောန်ဂကူကရေင် (ကေအေန်ယူ) ပ္တိတ်လဝ်လိက်လလောင် ပ္ဍဲဂိတုနဝ်ဝေမ်ဗါ စၟတ်တ္ရဲ ၁၇ ဂှ်ရ။
သၞာံ ၂၀၂၅၊ ဂိတုဒဳဇြေမ်ဗါ စၟတ်တ္ရဲ ၂၈ တေံမ္ဂး သွက်ဂွံစကၠောန်ဗဒှ်အာ ပေါဲရုဲမာဲမာန် ဂကောံကမ္မယှေန်ပၞာန်တအ် ပလေဝ်ပလေတ်ဒၟံင်တုဲ ညးမဒှ်အလံင်အမာတ်တအ် စစှ်ေမံင်ပရေင်စန္ဒက်မာဲလေဝ်နွံရ။
မွဲလ္ပာ်ဂှ် အလဵုညးမဒှ်တၠဆန္ဒမာဲ ညးဍုင်ကွာန်တအ်ဂှ် ဟိုတ်နူသၞောဝ်ဥပဒေ ဒးယိုက်ဝန်ပၞာန်ကီု၊ ဟိုတ်နူဘဲပေါဲပၞာန်ကီု ဒးထောံလသာသ္ရိဌာန် ဍုင်ကွာန်အိုတ်တုဲ ညးဍုင်ကွာန် ဆက်သှ်ေမံင်အကြာဍုင်အကြာကွာန်တအ်ဂှ်လေဝ် ဒးဒုင်ဘပဠ ဒးဒုင်ကဵုဒၟံင်ဇြဟတ်ဒရိုဟ် သွက်ဂွံအာတိတ်ကဵုမာဲအိုတ်ရောင် လိက်လလောင်တြး ကေအေန်ယူဂှ် ချူဓမံက်လဝ်ရ။
တုဲပၠန် သၞောတ်ပေါဲရုဲမာဲ ကမ္မယှေန်ပၞာန် မကၠောန်ဗဒှ်အလန်ဏအ်ဂှ် ညးဍုင်ကွာန်တအ် ဂွံကၠိုဟ်ဝါတ်ကီု၊ ပွမစကာလဝ်သၞောတ်စုတ်မာဲ ကဵုစက်ဂှ်လေဝ် ပတှ်ေစဟွံဂွံတုဲ ဗီုဒးစိုတ် ဂကောံကမ္မယှေန်ပၞာန်တအ် ပ္တိတ်ကေတ်သွဟ်ပေါဲရုဲမာဲမာန်ရောင်ဂှ်လေဝ် ကေအေန်ယူ ဆက်ဟီုလဝ်ရ။
ဒှ်သာ်ဂှ်ရ ပေါဲရုဲမာဲ ကမ္မယှေန်ကၠောန်အလန်ဏအ်ဂှ် ဒှ်ပေါဲရုဲမာဲပ္တောံ သွက်ဂွံဇမၠိင်ဏာအာယုက်တၠအဝဵုပၞာန်တုဲ ဒၞါဲဒေသကေန်အေန်ယူ မထိင်ဒဝ်လဝ် ပ္ဍဲပွိုင်ဍုင်ဖါအင်ဂှ် ဟွံကဵုအခေါင်ကၠောန်ပေါဲရုဲမာဲရောင် ဂးရ။
ပ္ဍဲပွိုင်ဍုင်ဖါအင်ဂှ် နူကဵုအလံင်အမာတ် ဗော်မန်တောတက် လုပ်ပြိုင်အာ ဒၞါဲခုင်ကၠတ်ထဝ်ညးဍုင်ကွာန်မွဲတၠရောင် ဂွံတီကေတ်ရ။
