အခိၚ်ကၠိက်က္တဵုဒှ်ယဲ ချိုတ်ဂၠိုၚ်မံၚ်လၟုဟ်ဏံ ဖျုန်ကၠိက်ကၠုၚ်သွံနူဌာန်သ္ၚောဲဂှ် စွံသတိတုဲ ရာန်ညိ ဒံက်တာကေတ်မံၚ်တာလျိုၚ် ရုၚ်ဂဥုဲပုဂ္ဂလိက လတူဍုၚ်မတ်မလီုမွဲတၠ ဟီုကဵုသတိရ။

“အခိၚ်လၟုဟ်ဂှ် ကၠိက်က္တဵုဒှ်ယဲတုဲ ချိုတ်ဂၠိုၚ်မံၚ်ဇၟာပ်ပွိုၚ်ဍုၚ် ဒှ်မံၚ်ရ၊ ဖျုန်ကၠိက် သွံ အကြာအရာပ်ဇကုကဵုဇကု တီတုဲရာန်ဂှ် သာခိုဟ်နူရာန်စဖျုန်ကၠိက်ကၠုၚ်သွံနူဌာန် သ္ၚောဲဏီ၊ အခိၚ်ကၠိက်ယဲဏံ စွံသတိတုဲ ရာန်စဖျုန်ကၠိက်ကၠုၚ်သွံနူသ္ၚောဲသ္ၚောဲညိ” သာ်ဝွံ ဒံက်တာကေတ်မံၚ်တာလျိုၚ် ပရေၚ်ကောပ်ကာဲရုၚ်ဂဥုဲပုဂ္ဂလိက ဍုၚ်မတ်မလီုမွဲတၠဂှ် ဟီုရ။

အခိၚ်လၟုဟ်ဝွံ ကၠိက်က္တဵုဒှ်ယဲဂၠိုၚ်တုဲ ချိုတ်လေဝ်ဂၠိုၚ်မံၚ်ဇၟာပ်ဒေသနွံရ၊ ကၠိက်ချိုတ်အာ နကဵုယဲမ္ဂး လ္ၚဵုဂှ် ပၠုပ်ဗွဝ်ဖျာတုဲ သွံမံၚ်လေဝ်နွံရ။ ဟိုတ်နူရာန်ဒးကၠိက်ဒှ်ယဲတုဲ ယဲကၠိက်ဂှ် ကၠောံထၞာန်အာ ကၠိက်ပ္ဍဲဒေသအရာပ်/ကွာန်ဇကုတုဲ ချိုတ်မံၚ်နွံဂၠိုၚ်ရောၚ်ဂှ်လေဝ် ဒံက်တာဂှ် ဆက်ဟီုထ္ၜးရ။

“ဒၟာနူရာန်ဒးဖျုန်ကၠိက်ဒှ်ယဲတုဲတှေ် ကၠိက်လွဳလဝ်အကြာသ္ၚိဇကု၊ အကြာအရာပ်ဇကု ကွာန်ဇကုတအ်ဂှ် ကၠောံယဲတုဲ ချိုတ်မံၚ်အတိုၚ်အရာပ်၊ အတိုၚ်ကွာန်ဂှ် စွံသတိ၊ ခိုဟ်အိုတ်ဂှ်တှ်ေ ဖျုန်ကၠိက်သွံပ္ဍဲအရာပ်ဇကု ဇကုတီမံၚ်တှ်ေ ရာန်ဂှ် ခိုဟ်၊ ဖျုန်ကၠိက်ကၠုၚ်နူလဵုဟွံတီမွဲသာ် အခိၚ်ကၠိက်ဒှ်ယဲဏံ ရာန်ဒးတှ်ေ ယဲကၠိက်ကၠောံဂွံတှ်ေ ကၠိက်ပ္ဍဲအရာပ်ဇကု / ကွာန်ဇကုဂှ် ချိုတ်အိုတ်တး ဒှ်လေပ်မံၚ်” သာ်ဝွံ ဒံက်တာဂှ် ဆက်ဟီုရ။

ဖျန်ကၠိက်ဂှ် ပ္ဍဲအရာကၠောန်သ္ပကေၚ်ကာမွဲမွဲသာ်ဂှ် လုပ်အဝေါၚ်ဒးဍုန်တိုပ်သုၚ်စောဲ ဟေၚ်ဂှ်တုဲ လုပ်ဗွဝ်ဖျာပရေၚ်ပိုန်ဒြပ်အဓိက မွဲသာ်ကီုရ။

ဖျုန်ကၠိက်ဝွံ ဖျုန်သက်သက်ဂှ် မွဲပသာ နွံအကြာ (၃၀၀၀၀) ဒ္ကေဝ်တုဲ ဖျုန်ကၠေၚ်နှဴဂှ် မွဲပသာ နွံအကြာ (၂၅၀၀၀) ဒ္ကေဝ်နွံရ။

ဟိုတ်နူဖျုန်ကၠိက် ဒှ်မံၚ်ပရေၚ်ပိုန်ဒြပ်ခိုဟ်မွဲတုဲ ကၠိက်ချိုတ်ယဲလေဝ် လုပ်မံၚ်ဗွဝ်ဖျာလတူဍုၚ်ဂှ်ရ ရာန်ဖျန်ကၠိက်မ္ဂး စွံသတိကဵု ဖျုန်ကၠိက်ဒှ်ယဲညိဂှ် ဒံက်တာသဝ်ဝန်လ္ၚဵု ဆဝ်ဗ္ၚုဟ်ကဵုလဝ်သတိနွံ ဂွံတီကေတ်ရ။