ပ္ဍဲကာလချဳဒရာၚ်စန်ဒက်မာဲတ္ၚဲဏံဂှ် ညးစၞးအလံၚ်အမာတ်လ္ၚဵု နူဗော်ညဳသၟဟ်မန်တအ် ဒးဒုၚ်ဘပဠနကဵုဖုၚ်နွံရောၚ် ညးလုက်စုက်ကဵု အလံၚ်အမာတ်မန်မွဲတၠဂှ် ဟီုလဴထ္ၜးရ။

နူဂကောံပၠန်ဂတးမွဲဂကောံဂှ် ဆက်ကၠုၚ်ဖုၚ် ဟီုဘပဠကၠုၚ် သွက်ဂွံကေတ်ဒုဟ်ဒဏ် ကု ညးစၞးအလံၚ်အမာတ်တအ်၊ ညးပူဗိုၚ်တအ်နွံ ညးလုက်စုက်ဂှ် ဟီုထ္ၜးရ။

“နူတေံ (ဂကောံပၠန်ဂတးမွဲဂကောံ) ဆက်ကၠုၚ်ဖုၚ် ညးစၞးအလံၚ်အမာတ်တအ်၊ ညးဘိုၚ်ပူဗိုၚ်တအ် နကဵုညးတအ် သွက်ဒးရပ်စပ်ကေတ်အရေဝ် သ္ပဒုဟ်ဒဏ်နွံမံၚ်ရောၚ် ဆက်ကၠုၚ်ဖုၚ်၊ ခယျကေတ်တှ်ေ ဆက်နၚ်မၞိဟ်မွဲ မၞိဟ်ၜါဓဝ်ဟွံသေၚ်ပုဟ်၊ ဗွဲမဂၠိုၚ်ဂှ် ဒးဒုၚ်ဆက်ဖုၚ် ဘပဠနွံမံၚ်” သ္ဂးရ။

ကာလလၟုဟ်ဂှ် ညးစၞးအလံၚ်အမာတ်လုပ်ပြိုၚ်ပေါဲရုဲမာဲဂမၠိုၚ်တအ် ပွိုၚ်ဍုၚ်ညးကဵုညးဂှ် သၠုၚ်အသိၚ်တုဲ ချဳဒရာၚ်စန်ဒက်မာဲ သွက်ဂွံဇၞးမာဲနွံရ။

တုပ်သာ်ဂှ်ကီု လ္ပာ်ဂကောံပၠန်ဂတးလ္ၚဵုတအ်လေဝ် သၠုၚ်အသိၚ်တုဲ ပ္တိတ်ကၠုၚ်သၞောဝ်ဥပဒေ သွက်ဂွံရပ်စပ် ကေတ်အရေဝ် ကု ညးလုပ်ပေါဲရုဲမာဲတအ်ကီု၊ ညးဘိုၚ်ရေၚ်တၠုၚ်တအ်ကီု သီုကဵုညးမစုတ်ကဵုမာဲတအ် နွံကၠုၚ်ရ။

“လ္ပာ်ပ္ဍဲဏံလေဝ် အခိၚ်ပေါဲရုဲမာဲဂှ် ကြပ်ကၠုၚ်ကွေံကွေံရ၊ ရဲပ္ဍဲဏံဂှ် ဂစာန်ညံၚ်ဂွံဇၞးမာဲ၊ လ္ပာ်မ္ၚးတေံဂှ် ဗတိုက်ပလီုဏောၚ် ဂးတှ်ေ ညးတအ်ဒးသၠုၚ်အသိၚ်ကၠောန်မံၚ်၊ အခိၚ်ဏံဂှ်တှ်ေ ဒှ်အခိၚ်ကိစ္စဇၞော် ပ္ဍဲဂကူပိုဲ ယဝ်ဒးဟီုကဵု လညာတ်အဒေါဝ် နပူဂဵုတှ်ေ ပဋိပက္ခပရေၚ်ဂကူ ညံၚ်ဟွံဒှ်ညးသ္ကအ်တှ်ေ ပၟိက်ဇၞော်ရ” သာ်ဝွံ ညးချဳဒရာၚ်ပရေၚ်ဍုၚ်ကွာန်မန် ဗွိုၚ်မ္ၚးဗော်မွဲတၠ ဟီုရ။

သွက်ဂွံရပ်စပ်ကေတ်အရေဝ် ကုညးလုပ်ပြိုၚ်ပေါဲရုဲမာဲတအ်ကီု၊ ဗော်ပရေၚ်ဍုၚ်ကွာန်ပတိုန်လဝ်စရၚ် ပ္ဍဲကမ္မေယှန်ပၞာန်တအ်ကီု၊ ကောန်ဗော်တအ်ကီု၊ နဲကဲဇဳ ညးမချဳဒရာၚ်ပူဗိုၚ်စန်ဒက်မာဲတအ်ကီု စတမ်နူ (၁) သၞာံ ဒဵုကဵု (၅) သၞာံ သွက်ဂွံ ကေတ်အာအရေဝ်ဒုဟ်ဒဏ်ဂှ် နူကဵုဃံၚ်သဳဖေဝ်ဒရာဍုၚ်မန် (MSFC) ဂှ် တုဲကၠုၚ်နဝ်ဝေမ်ဗာ (၂၅) ဂှ် ပ္တိတ်ကၠုၚ်သၞောဝ်ဥပဒေရ။

လတူဃံၚ်သဳဖေဝ်ဒရာဍုၚ်မန် (MSFC) တအ် ပ္တိတ်လဝ်သၞောဝ်ဥပဒဂှ် နူဂကောံပရိုၚ်ဗွဲမဂၠိုၚ် ချူပတိုန်လဝ်ပရိုၚ်တုဲ ကမ္မတဳရေၚ်တၠုၚ်ကေၚ်ကာဗဟဵု ဗော်ညဳသၟဟ်မန်မွဲတၠဂှ် “နွံမံၚ်ပဍဲထံၚ်တုဲတုဲရ ပရေံနူထံၚ်ဏအ်နွံမံၚ်ဏီဟာ” ရဴသာ်ဝွံ ကလေၚ်ချူပါ်တြး Share လတူသဵုယှေဝ်မဳဒဳယာ မွဲကဆံၚ်နွံဂှ် ဂွံဆဵုကေတ်ရ။