အလံၚ်အမာတ်လုပ်ပြိုၚ်ပေါဲရုဲမာဲ ပွိုၚ်ဍုၚ်ရေဝ်ဂမၠိုၚ်ဂှ် ဟိုတ်နူဒှ်ဂဝိၚ်ကဵု ပရေၚ်ဂီုကၠီုတုဲ ဒးစန်ဒက်မံၚ်မာဲ နူဌာန်ဇမ္ၚောဲရောၚ် ညးလုက်စုက်ကဵု အလံၚ်အမာတ်မန်မွဲတၠ ဟီုရ။
အလံၚ်အမာတ်လုပ်ပြိုၚ်ပေါဲရုဲမာဲ ပွိုၚ်ဍုၚ်ရေဝ်ဂမၠိုၚ်တအ်ဂှ် ဒှ်ဂဝိၚ်ကဵု ပရေၚ်ဂီုကၠီု ဇကုဇကုတုဲ ဟွံဂံၚ်ထ္ၜးမုက်ကဵု ညးဍုၚ်ကွာန်၊ ဟွံဂံၚ်ချဳဒရာၚ်စန်ဒက်မာဲ ပ္ဍဲဗလးတိဂှ်ရ ဗွဲမဂၠိုၚ်ဂှ် နွံဒၟံၚ်ပ္ဍဲဍုၚ်မတ်မလီုတုဲ ဟီုတွံထ္ၜးမံၚ်မုက်မတ် နကဵုအန်လိုၚ်လတူလပှ်ကျာ နွံဂၠိုၚ်ရောၚ် သ္ဂးရ။
“အလံၚ်အမာတ် ဗီုကဵုဗော်ညဳသၟဟ်မန်တှေ် ဗွဲမဂၠိုၚ်ဂှ် မံၚ်ဒၟံၚ်လတူဍုၚ်မတ်မလီု ဖအိုတ်ရဂၠိုၚ်၊ အလံၚ်အမာတ် ဗော်တၞဟ်တအ်လေဝ် ဗီုဂှ်သၟးရဂၠိုၚ်၊ ဒှ်ဂဝိၚ်ကဵု ပရေၚ်ဂီုကၠီု ဇကုဇကုတုဲတှေ် ဟွံဂံၚ်ထ္ၜးမုက်မတ်ပုဟ်၊ ဟွံဂံၚ်ချဳဒရာၚ် ပ္ဍဲဗလးတိဏံပုဟ်၊ ဒးစန်ဒက်မံၚ်မာဲ နူဌာန်ဇမ္ၚောဲ” ရဂှ် ညးလုက်စုက်ကဵု အလံၚ်အမာတ်မန်ဂှ် ဟီုထ္ၜးရ။
ပ္ဍဲတွဵုရးဍုၚ်မန် သကုတ်သၠုၚ်ကျာမ္ဂး ပွိုၚ်ဍုၚ်ရေဝ်ဂှ် ဂကောံပၠန်ဂတးဂမၠိုၚ်တအ် ချဳဒရာၚ်ဖျေံလဝ်သဇိုၚ် နွံဂၠိုၚ်ကဵုဂကောံတုဲ ပေါဲဗတိုက်လေဝ် ကတဵုဒှ်ဂၠိုၚ်အိုတ်ရ။ ဟိုတ်နူအကာဲအရာသာ်ဂှ်တုဲ ညးစၞးအလံၚ်အမာတ်ဂမၠိုၚ်တအ် ဗွဲမဂၠိုၚ် ဒးပါဲမံၚ်ဒၟံၚ် လတူဍုၚ်တၞဟ်တၞဟ်အိုတ်ရ။
“ဂတဵုမုက်အလံၚ်အမာတ်တအ်လေဝ် ဟွံဂံၚ်ပစူမွဲပုဟ်၊ ဆဵုမံၚ် ဂတဵုမုက် ဗော်ကျဖောအ်မွဲဒၞာဲဟာ ဆဂှ်ရ၊ အလံၚ်အမာတ် ညးဂှ် နူလဵု ဗွဲမဂၠိုၚ်ဟွံတီအိုတ်ပုဟ်၊ အခိၚ်စုတ်မာဲလေဝ် တိတ်ကဵုမာဲညိဟာဂှ် ဒးချပ်မံၚ်ဏီ” သာ်ဝွံ တၠဆေၚ်ဖျာသွံဂၠိက် ယာတ်ပလောံ လတူဍုၚ်ရေဝ်မွဲတၠ ဟီုထ္ၜးရ။
အလုံတွဵုရးဍုၚ်မန်ဝွံ ဟိုတ်နူထိၚ်ဒဝ်ပရေၚ်ဂီုကၠီုဟွံမာန်ဂးတုဲ (၁၄၀) ဂကောံကွာန် (ကျေးရွာအုပ်စု) ဂှ် ဟွံကၠောန်ကဵုပေါဲရုဲမာဲတုဲ ပ္ဍဲပွိုၚ်ဍုၚ်ရေဝ်လေဝ် (၂၃) ဂကောံကွာန် ဟွံကၠောန်ပေါဲရုဲမာဲရောၚ် ကမ္မယှေန်ပေါဲရုဲမာဲတအ် လလောၚ်လဝ်နွံဂှ် ဂွံတီကေတ်ရ။
