ကိစ္စမလလောင်တြးလဝ် ဒက်ပ္တန်ကၟိန်ဍုင်ကဝ်ဒူလေဝ်ဂှ် ဟွံကိတ်ညဳကဵု ဒဒှ်ပကတိရုပ်ဂမၠိုင်တုဲ သီုဟွံဒှ်အထံက်အရီုကဵု တိုင်ပ္ကဴရန်တၟအ် ပၠန်ဂတးကောန်ဂကူကရေင်တအ်ရောင် ဂိတုဂျာန္နဝါရဳ စၟတ်တ္ရဲ ၈ ဂှ် ဗော်သွးကောန်ဂကူကရေင် KUN ဟီုဓမံက်ကၠုင် နကဵုလိက်လလောင်တြးရ။

ပ္ဍဲဂိတုဂျာန္နဝါရဳ စၟတ်တ္ရဲ ၅ မတုဲကၠုင်ဂှ်ရ နူကဵုဒပ်ပၞာန်ကဝ်ဒူလေဝ် KTLA သဝ်နေဝ်တာမျ က္ဍိုက်ပ်တအ် လလောင်တြး ဟီုဗမံက်ကၠုင် စပ်ကဵု ဒက်ပ္တန်ကၟိန်ဍုင်ကဝ်ဒူလေဝ် ကုညးဂမၠိုင်ရ။

သွက်ဂွံအုပ်ဓုပ်ပ္ကင်ရင်အာ ကၟိန်ဍုင်ကဝ်ဒူလေဝ်မာန်ဂှ် ပံက်ပ္တန်အလဵုအသဳကဝ်ဒူလေဝ်တုဲ ပ္ဍဲကဵုဂကောံအလဵုအသဳဂှ် ညးဂအုပ်က္ဍိုက်ပ်ပၞာန် KTLA သ္ကိုပ်ပၞာန် သဝ်နေဝ်တာမျ ကေတ်လဝ်တာလျိုင် ဒၞါဲသမ္မတရ။

ဒၞါဲဒုသမ္မတ (၁) ကဵု ဝန်ဇၞော်ဍုင်သ္အာင်ဂှ် သဝ်ဇြာဂဵုဖဝ်၊ ဒုသမ္မတ (၂) ဂှ် သဝ်ဒဵုဗေတ်တာကဗဝ်၊ သ္ကိုပ်ဝန်ဇၞော်ဂှ် သဝ်ဖဝ်ဒူလေဝ်၊ ဝန်ဇၞော်ပရေင်စဵုဒၞါဂှ် သဝ်ဒဵုဗေတ်လဝ်တူတအ် ကေတ်အာတာလျိုင်ရောင် ချူဗမံက်လဝ် ပ္ဍဲလိက်လလောင်တြး KTLA ဂျာန္နဝါရဳ စၟတ်တ္ရဲ (၅) ဂှ်ရ။

ညးက္ဍိုက်ပ် ဒပ်ပၞာန်ကဝ်ဒူလေဝ် KTLA သဝ်နေဝ်တာမျဝွံ အခိင်မဒှ်ဒၟံင် ညးဂအုပ်က္ဍိုက်ပ်ပၞာန် KNDO နွံသၟဝ်တဲ KNU တေံဂှ် ဒးဒုင်စောဲစပ်လဝ် နဒဒှ်ညးလုလောန် အမှုရာဇဝတ်ပၞာန်မွဲသၟးဟွံက သီုဖံက်ပ္ကဝ်ကၠုင်လဝ် စေဝ်ပၞောန်ဗော်ဂၠိုင်ကဵုဝါနွံဂှ်ရ ပ္ဍဲသၞာံ ၂၀၂၂ ဂှ် ပ္တိတ်ထောံလဝ်နူဗော်ရောင် KNU ချူဓမံက်လဝ်ရ။

ဒှ်သာ်ဂှ်ရ ပြဝကမၠောန် KTLA တအ်ဂှ်ဝွံ သုင်စောဲ (ဖၠိုပ်) ဏာ ယၟုကဝ်ဒူလေဝ်တုဲ ကၠောန်သ္ပတဴဒၟံင် ညံင်ဂုဏ်သိက္ခာ ပၠန်ဂတးကရေင်၊ လက်သဏ်ကောန်ဂကူကရေင်တအ် သ္ဂောံဍိုန်သဝ်စှ်ေရောင် KNU သ္ဂးရ။

ပရေင်ထိင်ဒဝ်တိဍာ်၊ သၞောတ်ပရေင်အုပ်ဓုပ် ကေုာံ ညးဍုင်ကွာန်ဒးဒုင်အုပ်ဓုပ်တအ် ဟွံမွဲတဴမွဲသာ် ဒက်ပ္တန်အလဵုအသဳဟွံဂွံရောင် ညးမၞုံအခေါင်ဟီုဂး ဗော် KNU ပဒိုဝ်သဝ်တဝ်နဳ သ္ဂးလဝ်ပ္ဍဲဌာန်ပရိုင်ကေအိုင်သဳဂှ် သ္ဂောံဗှ်ကေတ်ရ။

“ထိင်ဒဝ်လဝ်တိဍာ်လဵုလေဝ် ဟၟဲမွဲသာ် ဒက်မံင်အလဵုအသဳလ္တူကျာဟွံဂွံပုဟ်၊ တိဍာ်၊ သၞောတ်ပရေင်အုပ်ဓုပ် မုလေဝ်ဟၟဲ၊ ဒက်မံင်အလဵုအသဳ နကဵုမၞိဟ်နွံမံင်ဍုင်မ္ရးတအ်ဂှ် ကဵုဗော်ပိုယ် မုဟွံဆက်စပ်ပုဟ်” သာ်ဝွံ ညးဟီုလဝ်ရ။

နကဵုဗော် KNU ဂှ် ညံင်သ္ဂောံဓမံက်ပ္တိုန် ကၟိန်ဍုင်ဖေဝ်ဒရေဝ် မဒုင်သ္ဇိုင်ကဵုမူ နူသၟဝ်တိုန်လ္တူ (Bottom-up Federalism) တုဲ ပံင်တောဲလုပ်အာပေါဲဗ္တိုက် ကရောံဂကောံရပ်လွဟ်ကောန်ဍုင်အရင်၊ ဇြဟတ်ဒဳမဝ်ကရေဇြဳ၊ ညးဍုင်ကွာန်ဂမၠိုင်ရောင် ချူဓမံက်လဝ် ပ္ဍဲလိက်လလောင်တြးဂှ်ရ။