ပ္ဍဲကၟိန်ဍုၚ်ဗၟာဝွံ ဟိုတ်နူရုၚ်ကလုတ်ဍုၚ်သၟာၚ်တအ် မွဲဍုၚ်တုဲမွဲဍုၚ် နုက်တိတ်ကၠုၚ်ဒၟံၚ်ဂှ်တုဲ စပ်ကဵုပရေၚ်ရီုဗၚ်မၞိဟ်ကီု ပရေၚ်ရီုဗၚ်ထံက်သွာၚ်နာနာတအ်လေဝ် ဒးဇီုကပိုက်ကၠုၚ်မံၚ်နွံရောၚ် ဂကောံချဳဒရာၚ် ဂွံလဝ်အရီုဗၚ်နူရုၚ်ကလုတ်အမေရိကာန် ပ္ဍဲဍုၚ်မန်မွဲတၠ ဟီုလဴထ္ၜးရ။
ပ္ဍဲသၞာံ (၂၀၂၆) မံက်ဏံမ္ဂး ရုၚ်ကလုတ်ဍုၚ်သၟာၚ် ဍုၚ်ဒုၚ်မက်လေဝ် သွက်ဂွံသီရုပ်နုက်တိတ်နူကၟိန်ဍုၚ်ဗၟာဂှ်တုဲ နကဵုလုပ်သၞောဝ်ဂှ် ရုၚ်ကလုတ်ဍုၚ်သၟာၚ်ပ္ဍဲကၟိန်ဍုၚ်ဗၟာ နုက်တိတ်အာ ၜါဍုၚ်တုဲရရောၚ် ရုၚ်ကလုတ်သှေ်ဍုၚ်တၞဟ်တၞဟ်တအ်လေဝ် ဖအောန်ဖျေံလဝ်ကမၠောန်တုဲ ပရေၚ်ရီုဗၚ်ထံက်ပၚ်ပရေၚ်မၞိဟ်ကီု ပရေၚ်နာနာကီုဂှ် ဒးဇီုကပိုက်ဒၟံၚ်နွံရောၚ် သ္ဂးရ။
“ရုၚ်ကလုတ်ဍုၚ်သၟာၚ်ပ္ဍဲလ္ဂုၚ်ဂှ် မွဲရုၚ်တုဲမွဲရုၚ် လလောၚ်နုက်တိတ်အာ နူကၟိန်ဍုၚ်ဗၟာလၟုဟ်တှေ် ဒှ်ဒတန်တုဲဒှ်အာ ၜါဍုၚ်တုဲရ၊ သှေ်ရုၚ်ကလုတ်ဍုၚ်တၞဟ်တၞဟ်လ္ၚဵုတအ်လေဝ် ဖအောန်ဖျေံလဝ်စက်ယန် ပရေၚ်ကမၠောန်ညးတအ်တၟာဂလိုၚ်၊ ညးတအ်ထ္ၜးဟိုတ်ဂှ်တှေ် စပ်ကဵုပရေၚ်ဂီုကၠီုဍုၚ်ပိုဲကဵု ပရေၚ်ခက်ခုဲဩန်ဘဏ္ဍာဍုၚ်ညးတအ် အဓိက ၜါသာ်ဏံဍေံနွံ” သာ်ဝွံ ကောန်ဂကောံချဳဒရာၚ် ဂွံလဝ်ပရေၚ်ရီုဗၚ်နူရုၚ်ကလုတ်အမေရိကာန် ချဳဒရာၚ်ဒၟံၚ် ပရေၚ်အပ္ဍ္ဍဲဍုၚ်မန်မွဲတၠ ဟီုရ။
ကၠာသၞာံ (၂၀၂၅) ဟွံအိုတ်ဂှ် ရုၚ်ကလုတ်ဍုၚ်ဖေန်လာန် (Finland)၊ ပ္ဍဲသၞာံ (၂၀၂၆) ဏံမ္ဂး ရုၚ်ကလုတ်ဍုၚ်ဒုၚ်မက် (Denmark) ပြဟ်ပြဟ်ဏံ ၜါဍုၚ်ဂှ် နကဵုလုပ်သၞောဝ် လလောၚ်တြးလဝ် သွက်ဂွံရုပ်သီနုက်တိတ်နူလ္ဂုၚ်နွံရ။
ရုၚ်ကလုတ်ကၟိန်ဍုၚ်အမေရိကာန်လေဝ် နကဵုလုပ်သၞောဝ်ၜိုန်ရဟွံရုပ်သီနုက်တိတ်ကီုလေဝ် စပ်ကဵုစက်ယန်ပရေၚ်ကမၠောန်ဂှ် ဖအောန်ဖျေံလဝ်တုဲ စပ်ကဵုပရေၚ်ရီုဗၚ်ထံက်ပၚ် ကဏ္ဍညးဍုၚ်ကွာန်သွာၚ်နာနာဂှ်လေဝ် ကုတ်ထပိုတ်ကၠုၚ်နွံရ။
“ရုၚ်ကလုတ်အမေရိကာန်ဂှ် ရုပ်သီနုက်တိတ်ဂှ် ဟွံဒှ်ဏီ၊ ဆဂးတှေ် ကောန်ရုၚ်တအ်ကီု၊ ပရေၚ်ကမၠောန်စက်ယန်နာနာကီုဂှ် ဖအောန်ဖျေံလဝ် မုကြပ်ဟွံမွဲဟီုစဂွံ၊ စပ်ကဵုပရေၚ်ထံက်ပၚ်ရီုဗၚ်သွာၚ်မှာဇန်ညးဍုၚ်ကွာန် ကောန်ဍုၚ်အရၚ် ဗီုကဵုဍုၚ်မန်ဏံ ဒေါံအိုတ်တး ဟီုကြပ်ဂွံ၊ ဇီုကပိုက်အာကဵု ရဲချဳဒရာၚ်ပရေၚ်မှာဇန်ညးဍုၚ်ကွာန်တၟာဂလိုၚ် ဇီုကပိုက်အာကဵု ပရေၚ်ဖောအ်ဗြေဝ်မှာဇန်ညးဍုၚ်ကွာန်တၟာဂလိုၚ်ဍေံနွံ” သာ်ဝွံ မၞိဟ်ဂှ် ဆက်ဟီုရ။
ပ္ဍဲကၟိန်ဍုၚ်ဗၟာဝွံ ကြဴနူကဵု ပၞာန်သီအဝဵု (၂၀၂၁) တုဲဂှ် ဂကောံတၠဒါန်ဍုၚ်သၟာၚ်ထံက်ပၚ်ရီုဗၚ်ဒၟံၚ် ကဏ္ဍသွာၚ်နာနာကီု၊ ရုၚ်ကလုတ်ဍုၚ်သၟာၚ် ကဵုဒၟံၚ်ထံက်ပၚ်ပရေၚ်ပညာ၊ ပရေၚ်ထတ်ယုက်၊ ဖေါအ်ဗြေဝ်ပရေၚ်မှာန်ဇန်ညးဍုၚ်ကွာန် ကဏ္ဍနာနာဂှ်လေဝ်ကီု ဒးဇီုကပိုက်ကၠုၚ်ဇၞော်ကဵုဒြဟတ်နွံရ။
ရုၚ်ကလုတ်ဍုၚ်သၟာၚ် အပ္ဍဲကၟိန်ဍုၚ်ဗၟာဂှ် ပြဟ်ပြဟ်ဏံ ဒှ်ဒတန်ရုပ်သီအာၜါဍုၚ်ကီု၊ ရုၚ်ဍုၚ်သၟာၚ်လ္ၚဵုလ္ၚဵုတအ်လေဝ် ဖအောန်ဖျေံလဝ် စက်ယန်ပရေၚ်ကမၠောန်နွံရ။ ရုၚ်ကလုတ်ဍုၚ်သၟာၚ်ဖျေံလဝ်သဇိုၚ် အပ္ဍဲကၟိန်ဍုၚ်ဗၟာဂှ် သီုဖအိုတ် (၄၀) ဍုၚ်ပြၚ်မံၚ်ရောၚ် ဂွံတီကေတ်ရ။
