တုဲကၠုၚ်ဒဳဇြေမ်ဗာ (၃၁) ဏံဂှ် နူကဵုဌာနဝန်ဇၞော်ပရေၚ်ပိုန်ဒြပ်ကဵု သၠာဲဂတးသွံရာန် လစှေ်နူကမ္မယှေန်ပၞာန်တအ် ပ္တိတ်ကၠုၚ်မူဝါဒ ပရေၚ်ပၠုပ်ယာန်ကွဳစက်ဂှ် ပ္ဍဲသၞာံ (၂၀၂၆) ဏံလေဝ် ၚုဟ်ကွဳစက်သွက်ဂွံစှေ်အာ ဟွံမွဲဏီရောၚ် အကြာရဲသွံရာန် ကွဳစက်တအ် ဟီုမံၚ်အိုတ်ရ။

ယာန်ကွဳစက် ဍိုက်သုၚ်စောဲသ္ၚိဂှ် ပံက်ကဵုလဝ်အခေါၚ် သၞာံတၟိတၟိ (၂၀၂၅) ကဵု (၂၀၂၆) ဒှ်မံၚ်ကွဳစက်တၟိတၟိဓဝ်ရတုဲ ၚုဟ်ကွဳစက်မၞိဟ်ဂမၠိုၚ်ဍိုက်စောဲဒၟံၚ်လၟုဟ်ဂှ် သွက်ဂွံစှ်ေအာ ဟွံမွဲရောၚ် အကြာရဲသွံရာန်ကွဳစက်တအ် ဟီုရ။

“မူဝါဒကာပတိတ်လဝ်လၟုဟ်ဂှ် ရံၚ်ကေတ်တှ်ေ အတိုၚ်တြေံ ဗီုတုဲကၠုၚ်တေံပၠန်ရ၊ ကာတြေံတြေံ ဗီုကဵုကာ (ဂျပါန်ကျ) ဂှ်တှေ် ဟွံကဵုလဝ်အခေါၚ်ပၠုပ်ပုဟ်၊ ဆကာတၟိတၟိ သၞာံ (၂၀၂၅) ကဵု (၂၀၂၆) ရတှ်ေ သွက်ကာတၟိတၟိရ ပံက်ကဵုလဝ်အခေါၚ်၊ မုဍေံဒှ်ရောတှေ် သွက်ကာတၟိတၟိ ၚုဟ်သၠုၚ်သၠုၚ်တအ်ဂှ် သွက်မၞိဟ်ဩန်ဂၠိုၚ်ဂၠိုၚ်တအ်ရ ရာန်ဍိုက်မာန်၊ မၞိဟ်အဆံၚ်သၟဝ်တအ် ဓမ္မတာ ဂွံရာန်ဍိုက်ကာဂှ် ဟွံလောဲပၠန်ရ၊ ဍေံအာအတိုၚ်တြေံပၠန်ရ၊ ကာၚုဟ်ဂွံစှ်ေအာဂှ် ဂၠံၚ်ဟွံမွဲရ” သာ်ဝွံ ညးရေၚ်တၠုၚ်သွံရာန်ကွဳစက်ဍုၚ်မန်မွဲတၠ ဟီုရ။

အတိုၚ်နူကဵု ဌာနဝန်ဇၞော်ပရေၚ်ပိုန်ဒြပ်ကဵု သၠာဲဂတးသွံရာန်တအ် ပ္တိတ်လဝ် မူဝါဒ ပၠုပ်ယာန်ကွဳစက် သွက်သၞာံ (၂၀၂၆) ဏံဂှ် ကွဳစက်မၞိဟ်ဍိုက်သုၚ်စောဲသ္ၚိ သၞာံ (၂၀၂၅) ကဵု (၂၀၂၆)၊ ကွဳစက်ဖ္ဍိုက်ကပေါတ် ကေုာံ ကွဳစက်ဒမြိပ်လာၚ်ဂှ် စတမ်နူ သၞာံ (၂၀၂၂) ဒဵုစိုပ် (၂၀၂၆)၊ ကွဳစက်ပလိုတ်ပၟတ် ကေုာံ ကွဳစက်ဖ္ဍိုက်မၞိဟ်ဂိယဲဂှ် စတမ်နူသၞာံ (၂၀၁၇) ဒဵုစိုပ် (၂၀၂၆)၊ ကွဳစက်သုၚ်စောဲ ပ္ဍဲဗွိုၚ်ကမၠောန်ဂမၠိုၚ်ဂှ် စတမ်နူ (၂၀၁၇) ဒဵုစိုပ် (၂၀၂၆) ဏံတုဲ ကွဳစက်သီုဖအိုတ်တအ်ဂှ် သ္ဒးဒှ်ဂဳယာလ္ပာ်ပါဲဖအိုတ်ရောၚ် ပ္ဍဲလိက်ဂှ် ဓမံက်ထ္ၜးလဝ်ရ။

“မူဝါဒကာ ဍုၚ်ပိုဲဂှ် ဒှ်အာရဲဘုံလတူတအ်ဏောၚ် ရပ်လဝ်ပေၚ်ပေၚ်တှ်ေ အရၚ်ညးဍုၚ်ကွာန်အဆံၚ်သၟဝ်ဏံဂှ် ညိလေဝ် ဟွံကဵုလဝ်အခေါၚ်၊ ညးဍုၚ်ကွာန်တအ်သၟဝ်ဏံဂှ် ၚုဟ်ၜက်နူ (၁၀၀၀) ကိုဋ်တှ်ေ ဂွံရာန်ဍိုက်သုၚ်စောဲမာန်ဂှ် တၟာကလှေ်အာယျ၊ ဍာံဍာံဂှ် ရာန်ဍိုက်မံၚ်ညးသ္ကအ်လၟုဟ်ဒးဟီုတှ်ေ ကာ (ဂျပါန်ကျ) မဝ်ဒေဝ် အကြာ (၂၀၁၇၊ ၂၀၁၈၊ ၂၀၁၉) အကြာစဂှ်ရဂၠိုၚ်၊ ဠတေံတှ်ေ အကြာတုဲကၠုၚ် (၃-၄) သၞာံတေံတှေ် ကိုဋ် (၂၀၀)၊ ကိုဋ် (၃၀၀)၊ လၟုဟ်တှေ် ဒှ်အာ (၇၀၀) ကိုဋ်၊ (၈၀၀) ကိုဋ်၊ ကာခိုဟ်တှ်ေ ဒှ်အာကဵု (၁၀၀၀) ကိုဋ်၊ လၟုဟ်ပတိတ်မူဝါဒ ကဵုအခေါၚ်ပၠုပ်ကာတၟိတၟိဏံတှေ် ကာတြေံတြေံတေံရ ကလေၚ်သွံရာန်မံၚ်ညးသ္ကအ် အကြာအကြာဂှ်ပၠန်ရ ၚုဟ်ဂွံစှေ်အာ ဟွံမွဲရ၊ မုပရောဟီုတှ်ေ ကာမဝ်ဒေဝ်သဝ်သဝ် ဗီုကဵုကာ (ဂျပါန်ကျ) တေံဂှ်လေဝ် ဟွံဂွံအခေါၚ်ပၠုပ်ရပုဟ်တှ်ေ ၚုဟ်ကာဂှ် ဘိုအ်ဂွံသဝ်စှ်ေအာဟွံမွဲရ” သာ်ဝွံ ညးရေၚ်တၠုၚ်သွံရာန်ကွဳစက်ဂှ် ထပ်ဟီုရ။

အတိုၚ်မူဝါဒ အခေါၚ်ပၠုပ်ယာန်ကွဳစက်တအ်လၟုဟ်ဏံမ္ဂး ကွဳစက်ဂှ် ၚုဟ်သွက်ဂွံစှ်ေအာဟွံမွဲတုဲ ညးဍုၚ်ကွာန်တအ် ဂွံဍိုက်သုၚ်စောဲမာန်ဂှ်လေဝ် တၚ်ကော်ဆဴနွံဒၟံၚ်နာနာသာ်ဏီရောၚ်ဂှ်လေဝ် ညးဆက်ဟီုရ။

ပဝ်လသဳမူဝါဒကွဳစက်ဂှ် နူကဵုညးအုပ်ဓုပ်ဍုၚ်အဆံၚ်လတူတအ်တိုက်ရိုက် ရပ်ကေမ်လဝ်တေၚ်တေၚ်ဂှ်ရ အကံက်အခေါန်ပၠုပ်ကွဳစက်၊ အကံက်အခေါန်လာၚ်ဇြေန် တအ်ဂှ် က္ဍၚ်သၠုၚ်နူၚုဟ်မးကွဳစက်ဏီရောၚ် ဂွံတီကေတ်ရ။