ဂိတုဖေဖဝ်ဝါရဳ စၟတ်တ္ၚဲ (၈) ဏံ ကၠောန်ဗဒှ်လဝ် ပေါဲရုဲမာဲ ပ္ဍဲကၟိန်ဍုၚ်သေံဂှ်ဝွံ နကဵုဗော်ဘောမ်ဇာဲဓါဲ သ္ကိုပ်ဝန်ဇၞော်သေံ နာဲအနုဓိန်ချာန်ဝဳရဂုန် အာက္ဍိုပ်ဂှ် ဟိုတ်မဇၞးလဝ်မာဲ ဒၞါဲဂၠိုၚ်အိုတ်ဂှ်ရ ဗော်ညးဍုၚ်ကွာန် (People’s Party) ကဵု ဗော်ဖိုအ်ဓါဲတအ် ဟွံဒုၚ်တဲ လ္တူမမာဲမကလိဂွံလဝ်ဂှ်တုဲ အာတ်မိက်ကၠုၚ် ကဵုကလေၚ် ရိုဟ်မာဲတၟိရောၚ် ဂွံတီကေတ်ရ။
ဗော်ဘောမ်ဇာဲဓါဲဂှ် ဇၞးလဝ်မာဲ (၁၉၆) ဒၞါဲ၊ ဗော်ညးဍုၚ်ကွာန်ဂှ် ဇၞးလဝ်မာဲ (၁၁၈) ဒၞါဲ ကဵု ဗော်ဖိုအ်ဓါဲတအ် ဇၞးလဝ်မာဲ (၇၄) ဒၞါဲ၊ အကြာဗော်ဇၞးကဵု ဗော်ကျတအ်ဂှ် ဆန္ဒမမာဲပိုတ်သ္ကုတ်ကၠုၚ်ဂၠိုၚ်တုဲ စရၚ်မာဲဏအ်ဂှ် တိတ်ကၠုၚ်အတိုၚ်ပကတိဟွံသေၚ် ဒှ်မာဲဟွံလုပ်သၞောဝ်ရောၚ် ဟီုဂးပါ်ပါဲကၠုၚ်ရ။
ဂိတုဖေဖဝ်ဝါရဳ စၟတ်တ္ၚဲ (၉) တုဲကၠုၚ်ဏအ် ပ္ဍဲခရိုၚ်ချောန်ၜုရဳ စၟတ် (၁)၊ ဒၞါဲကြပ်ကဵုရုၚ်သၠာတ်တက်ဗိတ်ဂှ် ညးဍုၚ်ကွာန်တအ် ဂွံဆဵုကေတ် တၞးလိက်မာဲ ဆေၚ်စပ်ကဵုစရၚ်မာဲတအ် ကၠဟ်လဝ်ပ္ဍဲကဵုထိုၚ်ခၟိက်တုဲ ပ္ဍဲခရိုၚ်မဟာသရခါန်ဂှ် စရၚ်မဂၞန်မာဲ ဗၠေတ်မှာမံၚ်ဂှ်လေဝ် ဂွံဆဵုကေတ်လဝ်ရ။
ရံၚ်ကဵုပ္ဍဲခရိုၚ်ချောန်ၜုရဳ မပ္တံဒေသခရိုၚ်ပထုံဌာနဳ၊ ကျာန်ထၜုရဳ၊ ဖဳကျေတ်၊ မဟာသာရခါန်တအ် လၟိဟ်မာဲဗၠေတ်မှာဂၠိုၚ်ဂှ်ရ ညးဍုၚ်ကွာန်တအ် ဒစဵုဒစးတိုန် အကြာညးတာလျိုၚ်တအ် က္တဵုဒှ်ကၠုၚ်တုဲ နကဵုကဝ်မယှေန်ပေါဲရုဲမာဲတအ် သ္ဒးကလေၚ်ရိုဟ်ပ္တိတ်မာဲထေက်ရောၚ် ညးတၠဆန္ဒမာဲတအ် ဂးရ။
စပ်ကဵုကိစ္စဏအ်တုဲ နူကဵုဗော်ညးဍုၚ်ကွာန် ကေုာံ ဗော်ဖိုအ်ဓါဲတအ် ဟွံဒုၚ်တဲ လ္တူမမာဲမကလိဂွံဏအ်တုဲ အာတ်မိက်ကၠုၚ်ကဝ်မယှေန်ပေါဲရုဲမာဲ (ECT) တအ် ကဵုကလေၚ်ရိုဟ်မာဲတၟိရ။
ပေါဲရုဲမာဲဏအ်ဝွံ “လိက်တၞးမာဲ လုပ်စိုပ်မံၚ်ပ္ဍဲကဵုထိုၚ်ခၟိက်ဂှ် ဒှ်ဟွံထေက်ရောၚ်၊ စရၚ်ဟၟဲကဵုဓရ်ဍာံဂှ် ကၠောန်ဟွံထေက်၊ ယဝ်ဟွံကလေၚ်ရိုဟ်မာဲမ္ဂး ဗော်ဇၞးမာဲဂှ် ပြံၚ်သၠာဲအာဟွံမာန်ရောၚ် “ သာ်ဝွံ ညးဍုၚ်ကွာန်သေံ ကေုာံ သၟတ်ကွးဘာသေံတအ် ရမျာၚ်ပံက်ဟီုထ္ၜးကၠုၚ်ဆန္ဒရ။
ပြဟ်ဟ်ဏအ်ဝွံ ညးဍုၚ်ကွာန်ကီု သီုပါလုပ်ကွးဘာတက္ကသိုလ်တအ်ကီုဂှ် တိတ်ထ္ၜးမံၚ်ဆန္ဒ ဂတမုက်ရုၚ်ကဝ်မယှေန်ပေါဲရုဲမာဲ (ECT) တအ်တုဲ စနူဂိတုဖေဖဝ်ဝါရဳ စၟတ်တ္ၚဲ (၉) စဵုကဵုတ္ၚဲဏအ် အသိၚ်ထ္ၜးဆန္ဒ ကဵုကလေၚ်ရိုဟ်မာဲတုဲ နကဵုကဝ်မယှေန်ပေါဲရုဲမာဲတအ် ခါတ်ကာဲကဵု အလုံကၟိန်ဍုၚ်တုဲ ကလေၚ်ရိုဟ်ကဵုမာဲညိဂှ် အာတ်မိက်ကၠုၚ်အဆက်ဆက်နွံရ။
