ပ္ဍဲဗွိုၚ်ဂဳတမန်ခေတ်လၟုဟ်ဝွံ သၟတ်မန် မဒှ်ဝုတ်ဝုတ်ဗၠာဲဗၠာဲဂမၠိုၚ်တအ် ဟွံဒုၚ်စသိုၚ်တဴ ရှ်သာဒွက် ကေုာံ ကွတ်သုခုမ ကွေံကွေံရပုဟ်ဂှ် သၟာဒယှေ်ဒွက်ကဵု ညးမဆာန်သုခုမတအ် ဟီုဂးကၠုၚ်ဒၟံၚ်နွံရ။

အတိုၚ်မဂွံဆဵုကေတ်မံၚ် ပ္ဍဲအခိၚ်ကာလလၟုဟ်ဏအ်မ္ဂး ဇၟာပ်ဒၞာဲသဘၚ်ဂဳတမဒှ်ဂှ် သၟတ်ဝုတ်ဗၠာဲတအ် ဂၠောဲအာစိုပ်တုဲ ဟွံဒုၚ်စသိုၚ်လတူရှ်သာဒွက် ကေုာံ အစောံကွတ်စရာဲ ရမျှာၚ်သၟာဒယှေ်ဒွက်တအ်မွဲသာ် ဆမိက်ဂွံဗုတ်လှေ်ဒယှေ်လဟိၚ် မိပ်ခအဴတအ်ဟေၚ် ဂၠိုၚ်ကၠုၚ်ရောၚ် သၟာဒယှေ်ဒွက်ဝှ်ကြံၚ်မွဲတၠဂှ် ဟီုလဴကုဌာန်ပရိုၚ်ဗၠးၜးမန် (IMNA) ရ။

“သွက်လ္တူစၚ် သွက်ပုရိသာတ်ပ္ဍဲသၠာတ်ပိုဲဟီုတှေ် ဒယှေ်ကဵုဒွက်ဂဒုဂဒုတှေ်တုဲရ။ ဒှ်ကၠုၚ်ကဵုအခေတ်ဟာ ကေတ်ဟွံဒး၊ ကောန်ၚာ်လၟုဟ် ဍေံဒးစိုတ်ဗီုဏံဏောၚ်။ ရမျှာၚ်ခိုဟ်ခိုဟ်ပရေံပရေံ ဒွက်ခိုဟ်ခိုဟ်ပရေံပရေံ ညံၚ်ကဵုဟွံဒးရုဲပုဟ်။ ပ္ဍဲပေါဲဂဳတမွဲမွဲဒၞါဲတှေ် ရဲဒုၚ်စသိုၚ်ဒွက်ဇေတ်ဇေတ်ဂှ် ၜိုတ် (၂၀) က္ဍိုပ်ကၠံလေဝ် ကြပ်ဟွံပေၚ်ပုဟ်” သာ်ဝွံ ညးဟီုသောၚ်ကလးလဝ်ရ။

အခိၚ်ကၠာတေံမ္ဂး နကဵုပုရိသာတ်ကောန်ဂကူမန် ဍောတ်ဇၞော်ဟွံရုဲတအ် အာဗဵုဂဳတမ္ဂး ဒုၚ်စသိုၚ်တဴ ရမျှာၚ်ဒယှေ်၊ ပၠောပ်အာရီု ဇြိုဟ်ဟ်နက်က် လတူသတ်ဒွက် ကေုာံ အခိုက်တွိၚ်တွိုက် သၟာဒယှေ်ဒွက်တအ်တုဲဟေၚ် တက်တဲကဵုဇြဟတ်အိုတ်ရ။

ဆဂး ကာလလၟုဟ်ဏံမ္ဂး သၟာဒယှေ်ဒွက်လဵုမွဲဟွံဟီု ညးလဵုမွဲဒယှေ်ဒယှေ်၊ ရမျာၚ်ခိုဟ်ဟွံခိုဟ်ဂှ် ဒှ်တဴအဓိကဟွံသေၚ်တုဲ ဗြုလဟိၚ်ဂဒုဒၟံၚ်မ္ဂး လဟိၚ်ဒၟံၚ်တွဵုရောၚ် လညာတ်သာ်ဏအ် ဓလီုဍိုက်ကၠုၚ်တုဲ နကဵုစက်သၠဲရမျှာၚ်သၟးလေဝ် သၟတ်တအ် ကောံဂၠောဲဗုတ်လှေ်ဒၟံၚ်အိုတ်ရ။

“မိပ်ဂှ် မိပ်ဂွံမံၚ်ရ ခိုဟ်မံၚ်ရ။ ဆဂး မိက်ဂွံဟီုဂှ် ရှ်သာဒွက်လေဝ် ဟွံမိက်ကဵုလီုအာ။ ဟီုဗျိဗဒေက်လေဝ် ဟွံသေၚ်ပုဟ်။ မိက်ဂွံကဵုဒုၚ်စသိုၚ် ကွတ်စရာဲသုခုမမန်ရ။ ဗီုဏံမှ သုခုမမန်ပိုဲ ဂွံဇၞော်မောဝ်အာ အဓာန်ဇမၠိၚ်တေံမာန်ဏောၚ် ထေၚ်ကေတ်ရ” သာ်ဝွံ ပုရိသာတ်ညးမသ္ဍိုက်မၠိုက်သုခုမမွဲတၠဂှ် ဟီုရ။

ဟိုတ်နူအခိုက်ပုရိသာတ် ပြံၚ်လှာဲအာသာ်ဏအ်တုဲ ဒွက်ၜိုဟ်ၜိုဟ် မနွံကဵုစရာဲဍာ်ဒကေဝ်တအ် ဟွံဂွံဒၞါဲတုဲ ၚုဟ်မးကွတ်သုခုမဂဳတမန်တအ်လေဝ် ဍိုန်လျစှေ်အာသိုက်သိုက်မာန်ဒၟံၚ်ရောၚ်ဂှ် ညးဆက်ဟီုလဝ်ရ။

ဆဂှ်သၟးဟွံက သၟာဒယှေ်ဒွက်တအ်လေဝ် ဟွံစွံအာရီုကဵု ပရေၚ်ဍာ်ဒကေဝ်ဒွက်လေဝ် ဒှ်ကၠုၚ်မာန်တုဲ ၚုဟ်မးသုခုမမန်ဂှ် ထေက်ကဵုဒးစွံသတိ ဒးပူဗိုၚ်ရီုဗၚ်ပလေဝ်အာ ညးညးအဲအဲထေက်ရောၚ်ဂှ် သၟာဒယှေ်ဒွက် ကေုာံ ညးမဆာန်သုခုမတအ် ဟီုကဵုကၠုၚ်ကသပ်ရ။