ပ္ဍဲကဵုပါ်ပရအ်အဆံၚ်အဝဵု အကြာဗော်ကျဖောအ်ကဵု ဒပ်ပၞာန်တံဂှ်ဝွံ သၞောဝ်ဥပဒေပလေဝ်ပလေတ် သွက်ဂွံခါန်ကၞက် သ္ကိုပ်ဇမၞော်ဍုၚ် (မြို့တော်ဝန်) အရၚ်ဍုၚ်ဇၞော် ရး ကေုာံ တွဵုရးဂှ် က္ဍိုပ်သ္ကိုပ်ပၞာန် လလောၚ်ပ္တိတ်လဝ် နူတနေံဏံရ။
ပ္ဍဲကဵုသၞောဝ်ဥပဒေပလေဝ်ပလေတ် ဂကောံအလဵုအသဳ ရးဒေသဇၞော် (ဝါ) အလဵုအသဳတွဵုရးဂှ်ဝွံ “လၟိဟ်ဝန်ဇၞော်ရး (ဝါ) တွဵုရးဂှ် အောန်အိုတ် နူကဵု (၅) တၠ စဵုကဵု (၁၀) တၠ ဒးကဵုအာတာလျိုၚ်ရောၚ်။ အပ္ဍဲလၟိဟ်ဝန်ဇၞော် စၟတ်လဝ်ဂှ်မ္ဂး ဂလိုၚ်ပ္တိုန်၊ ဖအောန်ဖျေံမာန်ရ။
ကာလခါန်ကၞက်ကဵုလျိုၚ် ကုဝန်ဇၞော်ဂမၠိုၚ်ဂှ်မ္ဂး သွက်ရးလ္ဂုၚ်ကဵု အဝဂှ် ကဵုတာလျိုၚ် နဒဒှ်သ္ကိုပ်ဇမၞော်ဍုၚ် ဝန်ဇၞော်မွဲမွဲတၠရ။ ဝန်ဇၞော်ဗဂဵုလဟဵုဍုၚ်ကွာန် ဂကောံအလဵုအသဳတွဵုရး (ဝါ) ရးဂှ်မ္ဂး ခါန်ကၞက်ကဵုတာလျိုၚ် နဒဒှ်သ္ကိုပ်ဇမၞော်ဍုၚ် ပ္ဍဲဍုၚ်ဇၞော်တွဵုရး (ဝါ) ရး မာန်ရ” သာ်ဝွံ ပလေဝ်ဗပေၚ်ဏာလဝ်ရ။
အတိုၚ်သၞောဝ်ဥပဒေကၠာတေံမ္ဂး သွက်လ္ဂုၚ်ကဵု အဝဟေၚ် စၞောန်ပျးလဝ် အရၚ်ဂွံခါန်ကၞက် သ္ကိုပ်ဇမၞော်ဍုၚ်ကီုလေဝ် အတိုၚ်တၚ်ပလေဝ်ပလေတ်ဟီုမ္ဂး သွက်ဍုၚ်ဇၞော်တွဵုရးကဵု ရးတၞဟ်တၞဟ်ဂှ်လေဝ် ဝန်ဇၞော်ဗဂဵုလဟဵုဍုၚ်ကွာန်တံဂှ် နူကဵုဂကောံအလဵုအသဳမဆေၚ်စပ်တံ ခါန်ကၞက် နဒဒှ်သ္ကိုပ်ဇမၞော်ဍုၚ်မာန်ရ။
ဆေၚ်စပ်ကဵု တၚ်ပလေဝ်ပလေတ်ဂှ်တုဲ ပ္ဍဲဂကောံအလဵုသဳတွဵုရး ကေုာံ ရး ဒပ်ပၞာန် ဒက်ပ္တန်ဂှ်မ္ဂး ဒၞာဲယၟုအဆံၚ်တၟိဟေၚ် ဂၠိုၚ်တိုန်တုဲ ပရေၚ်ပလေဝ်ပလေတ်ပြံၚ်လှာဲ နွံပၟိက်ဒၟံၚ်ဇေတ်ဇေတ်ဂှ် ဟွံသေၚ်ရောၚ် ညးစၞးစၠတ်ထဝ်တွဵုရး ဇၞးလဝ်မာဲမွဲတၠဂှ် ဟီုရ။
“ကမၠောန်သ္ကိုပ်ဇမၞော်ဍုၚ်ဂှ် နူတမၠာတေံရ ဒှ်ကမၠောန်ဝန်ဇၞော်ဗဂဵုလဟဵုဍုၚ်ကွာန်တံ ဒးကၠောန်ရ။ ဣညအ်ဂှ် မုဟွံတၟေၚ်ကၠုၚ်ပုဟ်။ ယၟုအဆံၚ်ထပ်ဂၠိုၚ်တိုန်ဟေၚ်ရ” သာ်ဝွံ ညးဟီုရ။
လက်ထက်အလဵုအသဳ အေန်အေဝ်ဒဳ ဂှ်လေဝ် ဝန်ဇၞော်ဗဂဵုလဟဵုဍုၚ်ကွာန်တံဂှ်ဟေၚ် ခါန်ကၞက်လဝ် နဒဒှ်သ္ကိုပ်ဇမၞော်ဍုၚ် ဍုၚ်လ္ဂုၚ်ကဵု အဝရ။
တုဲပၠန် သၞောဝ်ဥပဒေကံၚ်ဇြဳနေပျဳဒဝ်ဂှ်လေဝ် ဒပ်ပၞာန်တံ ပလေဝ်ထောံတုဲ နကဵုၝောံပိုဒ် ၃ (ဂ) ဂှ်မ္ဂး “ကောန်ဂကောံကံၚ်ဇြဳမွဲမွဲတၠဂှ် ခါန်ကၞက်ကဵုတာလျိုၚ် နဒဒှ်ဒုသ္ကိုပ်ဇမၞော်ဍုၚ်၊ ဒုဥက္ကဌ ကမ္မတဳဗဂဵုလဟဵုဍုၚ်ကွာန်နေပျဳဒဝ်မာန်ရောၚ်”ထပ်ဗပေၚ်လဝ်တၟိရ။
ကောန်ဂကောံကီု သီုစရၚ်ယၟု ဒပ်ပၞာန်ကဵုလဝ် ကေုာံ ဥက္ကဌကံၚ်ဇြဳနေပျဳဒဝ်ကဵုလဝ်ကီုဂှ် နူကဵုသမ္မတခါန်ကၞက်တုဲ နကဵုအဆံၚ်မ္ဂး ဥက္ကဌကံၚ်ဇြဳဂှ် ဒှ်သ္ကိုပ်ဇမၞော်ဍုၚ်နေပျဳဒဝ်ရ။
ကိစ္စခါန်ကၞက် သ္ကိုပ်ဝန်ဇၞော်တွဵုရးကဵု ရးဂှ်လေဝ် နူကဵုသမ္မတ ဒးရုဲစှ်ခါန်ကၞက် ညးစၞးစၠတ်ထဝ်တွဵုရး ကေုာံ ရး မဆေၚ်စပ်မွဲမွဲတၠတုဲ ဝန်ဇၞော်တွဵုရးကဵု ရးဂှ်ဝွံ ညးစၞးစၠတ်ထဝ်ကီုဒှ် ညးစၞးစၠတ်ထဝ်ဟွံသေၚ်ကီုဒှ် ဍိုက်ပေၚ်ကဵု အစောံစရာဲစၟတ်လဝ်ဂှ်မ္ဂး သ္ကိုပ်ဝန်ဇၞော်မဆေၚ်စပ်တံ ကေတ်တၚ်တုပ်စိုတ်ကဵု စၠတ်ထဝ်တုဲ ဒးခါန်ကၞက်ကဵုရ။
နကဵုဒပ်ပၞာန်တံဝွံ ဆေၚ်စပ်ကဵု ဒက်ပ္တန် ဂကောံအလဵုအသဳတွဵုရး ကေုာံ ရးတုဲ သ္ကိုပ်ဝန်ဇၞော် ဗော်ကောန်ဍုၚ်အရၚ်တံ မအာတ်မိက်မံၚ်ဂှ်ဝွံ နူကဵုသမ္မတ ခါန်ကၞက်တိုက်ရိုက်ဟွံသေၚ်တုဲ နကဵုတၚ် စၠတ်ထဝ်မဆေၚ်စပ်တံ သွက်ဂွံရုဲစှ်ဟီုဂှ် ပလေဝ်ပလေတ်ကဵု ဟွံမွဲဏီတုဲ သွက်ဂွံခါန်ကၞက် အဆံၚ်သ္ကိုပ်ဇမၞော်ဍုၚ်တၟိဂှ်ဟေၚ် ပလေဝ်ပလေတ်ကၠုၚ်ဗွဲကိုပ်ကၠာရ။
