ကောန်သ္ဂံၚ်ယိုက်ဂၠေၚ်ပၞာန် နူတမ်ဒပ် (ခလရ – ၃၄၃) ပွိုၚ်ဍုၚ်ရေဝ်၊ တွဵုရးဍုၚ်မန် (၂) တၠ လုပ်ပအပ်လွဟ် ကုဒပ်မၠုက်ရေဝ် YGF နွံရဂှ် ညးတာလျိုၚ်တံ ဟီုကဵုဌာန်ပရိုၚ်ဗၠးၜးမန် IMNA ရ။
ကောန်သ္ဂံၚ် (၂) တၠဂှ်ဝွံ ဂိတုအေဗရဴ စၟတ်တ္ၚဲ (၄) တုဲကၠုၚ်ဏံ အာစိုပ်ပံၚ်ကောံကဵု တမ်ဒပ် စၟတ် (၈၀၀၁) သၟဝ်နဲဗျူဟာ (၃၃) YGF တုဲ သီုလွဟ် MA1 (၂) ဇကိုအ်၊ ဖျေဲကမ် (၆) ဖျေဲ၊ ကမ် (၂၃၀) မ ကေတ်နၚ်လဝ်ကီုရောၚ် ဂွံတီကေတ်ရ။
ညးလုပ်ပံၚ်ကောံပအပ်လွဟ် (၂) တၠဏံဝွံ ကောန်သ္ဂံၚ် တာန်ကိုဝ်ကိုဝ် စၟတ်ပူဂဵု (ပစ-၁၇၃၉၉၇) ကေုာံ ကောန်သ္ဂံၚ်ဗိုဝ်ဗိုဝ်ကျဝ် စၟတ်ပူဂဵု (ပစ-၁၇၆၀၆၄) တံ မဒှ်ရောၚ် ညးမၞုံအခေါၚ်ဟီုဂး YGF ကောန်သ္ဂံၚ် သဝ်ခေတ်တေတ် ဟီုရ။
“လက္ကရဴအိုတ် ၜါတၠဂှ်တှေ် ဟိုတ်နူပရေၚ်ရုန်ဂ္စာန်ဌာနထံၚ်ပရိုၚ်ဂှ်ရ ဂွံအဆက်စၠောံတုဲ တိတ်ကၠုၚ်နူဒၞာဲဍေံတံကေတ်လဝ်ကၚ်ဂၠံၚ်ဂှ်တုဲတှေ် အာစိုပ်ကော်နၚ်ရ” သာ်ဝွံ ဟီုရ။
ညးတံဝွံ ဟိုတ်နူကော်ကဵုယိုက်ဂၠေၚ်ပၞာန်ဗွဲအဓမ္မဂှ်ရ လုပ်စိုပ်အာ ဒပ်ပၞာန်ဗၟာတုဲ စှေ်နူတန်ဗ္တောန် ဘာဝါကလဳ၊ ပွိုၚ်ဍုၚ်ဇြပ်ဗုကဵု တန်ဗ္တောန် ဘာယျမေဝ်တေန်၊ ရးမာန္တလေဝ်ရဂှ်လေဝ် ဂွံတီကေတ်ရ။
ညးလုပ်ကၠုၚ်ပအပ်လွဟ်ဂမၠိုၚ်တံဂှ် နူကဵုဒပ် YGF ရံၚ်အကာဲအရာတုဲ ကဵုမံၚ်လာဘ်သြန်နွံရ။ ညးလုပ်ကၠုၚ်သီုကဵုလွဟ်တံဂှ် (၃၀) ကိုဋ်ဒကေဝ်၊ ညးလုပ်ကၠုၚ်ကဵုမကမ်ဂှ် (၅) ကိုဋ်ဒကေဝ် ကေုာံ ညးလွဟ်မကမ်ဟွံပါတံဂှ် မွဲတၠမ္ဂး ၜိုတ် (၃) ကိုဋ်ဒကေဝ် ကဵုမံၚ်လာဘ်သြန်နွံရ။
ၜိုန်ဂှ်ကီုလေဝ် ပ္ဍဲသၞာံ (၂၀၂၆) ဏံ ဟိုတ်နူခက်ခုဲသြန်ဘဏ္ဍာတုဲ ကောန်သ္ဂံၚ်လုပ်ကၠုၚ်ပအပ်လွဟ်ဂမၠိုၚ်တံဂှ် ကဵုသြန်လာဘ်ဟွံမာန်ဏီ ကောန်သ္ဂံၚ်ဂှ် ဆက်ဟီုလဝ်ရ။
“ဓမ္မတာ ညးလုပ်ကၠုၚ်သီုလွဟ်တှေ် ဖျေံလာဘ်သြန် (၃၀) ကိုဋ်ရ။ သၞာံ (၂၀၂၆) ဏံ ညးလုပ်စိုပ်ကၠုၚ်လက္ကရဴအိုတ် (၁၁) တၠဂှ်တှေ် ဟိုတ်နူခက်ခုဲသြန်ဘဏ္ဍာတုဲ ဟွံဂွံကဵုလာဘ်သြန်ဏီပုဟ်။ အပ္ဍဲဂိတုဏံ သွက်ဂွံကဵုလာဘ်သြန်မာန်ဂှ် ဂ္စာန်မံၚ်ရ” သာ်ဝွံ ညးဆက်ဟီုလဝ်ရ။
မွဲဒမြိပ်ဒပ်ပၞာန်ဗၟာသီလဝ်အဝဵုဂှ်မ္ဂး ကောန်သ္ဂံၚ်လုပ်ကၠုၚ်ပအပ်လွဟ် ဇရေၚ်တမ်ဒပ် YGF စဵုကဵု (၂၃) တၠနွံကၠုၚ်တုဲ ကောန်သ္ဂံၚ်လုပ်ကၠုၚ်ပအပ်လွဟ်ဂမၠိုၚ်တံဝွံ ယိုက်ဂၠေၚ်မံၚ်တာလျိုၚ် ဆေၚ်စပ်ကဵု ပရေၚ်ဗ္တိုက်ကဵု ပရေၚ်ထံက်ပလံၚ်နွံရောၚ် ဂွံတီကေတ်ရ။
အတိုၚ်ဂကောံတိုၚ်ပ္ကဴညးဍုၚ်ကွာန် (ပျဳတုပါန်တိုၚ်) ပကောံဂွံလဝ်တၚ်နၚ် ဆေၚ်စပ်ကဵု ဂၠုဲပၞာန် ကေုာံ ကောန်သ္ဂံၚ်လုပ်ကၠုၚ်ပအပ်လွဟ်တံဂှ်မ္ဂး နူသၞာံ (၂၀၂၅) ဂိတုဂျာန္နဝါရဳ စဵုကဵု သၞာံ (၂၀၂၆) ဂိတုမာတ်တုဲကၠုၚ်ဏံ ကောန်သ္ဂံၚ်ပအပ်လွဟ် ကေုာံ ဂၠုဲပၞာန် သီုဖအိုတ် စဵုကဵု (၂၉၉၂) တၠ စိုပ်မံၚ်ဇရေၚ်ဂကောံဒပ်ပၠန်ဂတး အလုံကၟိန်ဍုၚ်နွံဂှ် ဓမံက်ထ္ၜးလဝ်ရ။
