ကြဴနူကဵုရာန်ကၠေၚ်ကျာတ်ဏံဂှ်တုဲ နူကဵုညးတာလျိုၚ်ဗၠာဲသၟိၚ်တအ် ဖျေံကၠုၚ်ပၟိၚ် ကုဆေၚ်သွံကၠေၚ် ပံက်လဝ်အကြာဆေၚ်ဖျာဍောတ်ဍောတ် ပ္ဍဲကွာန်တအ် ဒးဒုၚ်ကၟာတ်တုဲ ဒးရုပ်သီလဝ်ဆေၚ်ဖအိုတ်ရောၚ် တၠကမၠောန်သွံကၠေၚ် နူပွိုၚ်ဍုၚ်ဇြပ်ဗုမွဲတၠ ဟီုထ္ၜးရ။

“ဆေၚ်သွံကၠေၚ်ဍောတ်ဍောတ် ပံက်လဝ်အကြာဆေၚ်ဖျာ အကြာသ္ၚိတအ်ဂှ်တှေ် ဍေံကဵုရုပ်ကၟာတ်ထောံအိုတ်ယျ၊ နူကဵုရာန်ကၠေၚ်ကျာတ်တုဲ သၞောတ် စုမ်-မ တုဲဂှ် ကၠတ်သွံမံၚ်ကၠေၚ်ညးသ္ကအ် ၚုဟ်ကမၠတ် (မှောၚ်ခို) ကၠတ်ဗပဵုသွံမံၚ် ၚုဟ်ၜါဆ ပိဆတုဲဂှ် ပရိုၚ်မံက်အာတုဲတှေ် ဆေၚ်သွံကၠေၚ်ဍောတ်ဍောတ် ဗီုဆေၚ်ပိုဲဏံ ဍေံကဵုရုပ်ကၟာတ်ထောံဖအိုတ်” သာ်ဝွံ တၠဆေၚ်သွံကၠေၚ်ဍောတ်ဍောတ် ပံက်လဝ်မွဲကရောံကဵုဆေၚ်ဖျာ နူပွိုၚ်ဍုၚ်ဇြပ်ဗုမွဲတၠ ဟီုရ။

ဆေၚ်သွံကၠေၚ်ဍောတ်ဍောတ် ပံက်လဝ်အကြာကွာန်တအ်ဂှ် အခိၚ်ရာန်ကၠေၚ်လောဲမံၚ်တေံမ္ဂး ရာန်ကေတ်နၚ်ကၠေၚ် နူကဵုဆေၚ်ကၠေၚ် အဆက်ညးကဵုညးတုဲ သွံမံၚ်ကၠေၚ် အကြာဒေသ ကွာန်ညးကဵုညးနွံဒၟံၚ်တုဲ ညးဍုၚ်ကွာန်တအ် ရာန်ကၠေၚ်မ္ဂး ဟွံဒးအာဆေၚ်ကၠေၚ် (ဆေၚ်ဇၞော်ဇၞော်) မွဲသာ် ရာန်စုတ်ကၠေၚ် ကွာန်ညးကဵုညးနွံကၠုၚ်ရ။

“လၟုဟ်တှေ် စုတ်ကၠေၚ်ပ္ဍဲကဵုဆေၚ်သွံကၠေၚ် အကြာကွာန်ဟွံဂွံရ၊ ဆေၚ်သွံကၠေၚ်ဍောတ်ဍောတ် အကြာကွာန်တအ်ဂှ် ပံက်လဝ်နကဵုဓဝ်ပလိုဟ် အကြာဒေသရတှေ် ရာန်ကၠေၚ်ဟွံဂွံရပုဟ်၊ အဓိကဂှ် အကြာဏံ ကၠေၚ်ကေတ်ကျာတ်မံၚ်ဂှ် ကၠတ်သွံမံၚ်ညးသ္ကအ် နကဵုၚုဟ်မ္ၚး (မှောၚ်ခို) မွဲဂါလာန် (၂၀) လဳတာဂှ် (၂) ကိုဋ်ပြၚ် (၃) ကိုဋ်ပြၚ် ပရိုၚ်ဂှ် တိတ်အာတုဲတှေ် ရဲ ဆေၚ်သွံကၠေၚ်ဍောတ်ဍောတ် အကြာကွာန်တအ်ဂှ် ဍေံကဵုကၟာတ်ထောံဖအိုတ်တှေ် ရဲပတိတ်လဝ်တမ်စဂှ် ဒှ်အာဒဒိုက်ဖအိုတ်ရ” သာ်ဝွံ ညးရေၚ်တၠုၚ်ပလံၚ်ကဵုဒၟံၚ်ကၠေၚ် သွက်ရဲဆေၚ်သွံကၠေၚ်ဍောတ်ဍောတ် ပံက်လဝ်အကြာကွာန် နူဍုၚ်ဇြပ်ဗုမွဲတၠဂှ် ထပ်ဟီုထ္ၜးရ။

ဒၞာဲဒေသသ္ၚောဲကဵုဍုၚ် ဆေၚ်စုတ်ကၠေၚ်ဟွံမွဲ အကြာကွာန်ဗွဲမဂၠိုၚ်ဂှ်မ္ဂး ပံက်လဝ်ဆေၚ်သွံကၠေၚ်ဍောတ်ဍောတ် တောဲသွံဒၟံၚ်မွဲကရောံကဵု ဖျာဗၞိက်နာနာလေဝ်နွံ၊ ကွာန်လ္ၚဵုမ္ဂး ပံက်လဝ်ဗီုကဵုဆေၚ်ကၠေၚ်ဇၞော်ဇၞော်တအ်ကီု ကေတ်လဝ်ဓဝ်ပလိုဟ်ကဵု ညးတာလျိုၚ်ဒေသတအ်တုဲ ပံက်သွံမံၚ် ဆေၚ်သွံကၠေၚ်ဍောတ်ဍောတ် အကြာကွာန်တအ်နွံရ။

ကြဴနူကဵုဌာနဇြဟတ် (စွမ်းအၚ်) တအ် ဖျေံကဵုစၞောန် သွံကၠေၚ်နကဵုသၞောတ် ကျူအာကုဒ် QR Code ဂှ်တုဲ ဆေၚ်သွံကၠေၚ်ဍောတ်ဍောတ် ပံက်လဝ်အကြာကွာန်ဂမၠိုၚ်တအ် ဒးဒုၚ်သီရုပ်ကၟာတ်ကၠေံဂှ်တုဲ ဒးဒုၚ်ကၟာတ်သွံကၠေၚ် ဗွဲလအိတ်ရဟာဂှ် တၠဆေၚ်သွံကၠေၚ် ပတိတ်လဝ်တမ်ရိုဟ်စက်စုတ်ကၠေၚ်တအ် ဒှ်မံၚ်ဂဝိၚ်ရောၚ် ဂွံတီကေတ်ရ။