ညးဒေသကၠအ်သတ် အာယုက် (၅၀) သၞာံ၊ မၞုံယၟု နာဲမျေအ်နာင် က္ဍိုက်က္ဍိုပ်ပံက်ဒမံင် ဝိုင်ဝေင်ဇျှင်လံင်သြန်၊ ပ္ဍဲကွာန်ကၠအ်သတ်၊ ပွိုင်ဍုင်မုဟ်ဍုင်၊ တွဵုရးဍုင်မန်ဂှ်ဝွံ နူဗော်ဍုင်မန်တၟိ ဗတိုက်သရိုဟ်တၠအဝဵုပၞာန် NMSP-AD တံ ရပ်ကော်ဏာလဝ်ရောင် ဂွံတီကေတ် နူညးစုက်လုက်ကဵု ဂကောံသ္ၚိကၟိန်မွဲတဆင့်ရ။
အတိုင်ညးဒေသကၠအ်သတ်တံဟီုမ္ဂး ပ္ဍဲဂိတုမာတ် (၂၈) တုဲကၠုင်ဏံ နူဗော်ဍုင်မန်တၟိ ဗတိုက်သရိုဟ်တၠအဝဵုပၞာန် NMSP-AD သွက်ဂွံဆဵုဂဗသၟာန်သၟုက် နာဲမျေအ်နာင်ဂှ် ကေတ်အဆက်ကဵုဖိုင်တုဲ အခိင်အာစိုပ်ဆဵုဂဗ ဒၞာဲချိင်ဖာတ်လဝ်ဂှ် ဒးဒုင်ရပ်ဏာလဝ်ရောင် ဂးရ။
“ကၠုင်ရပ်ပ္ဍဲသ္ၚိ ဟွံသေင်ပုဟ်။ ဆဵုဂဗကဵု နာဲမျေင်နာင်မ္ၚးတုဲတှ်ေ သွက်ဂွံသၟာန်သၟုက်နွံ ဂးတုဲ ဆက်နင်ဖိုင်ကဵုညးရ။ အေ ဗွဲကြဴဂှ်တုဲ ဒးဒုင်ရပ်ရ။ လၟုဟ်ဏံ နွံမံင်ပ္ဍဲရုင်စၟဳစၟတ် AD ဏောင် ၝဲညးဟီုမံင်ဂှ် ဂွံမိင်ကေတ်ရ” သာ်ဝွံ ညးတြုံ နူဒေသကၠအ်သတ်မွဲတၠဂှ် ဟီုရ။
ဒးဒုင်ရပ်တုဲ တ္ၚဲခြာဟွံလအ်ဂှ် ဂကောံသ္ၚိကၟိန်တံ ဂွံမိင်ကေတ် ဒးဒုင်ထိင်လဝ် ပ္ဍဲရုင်စၟဳစၟတ် ခရိုင်မတ်မလီု၊ ဗော်ဍုင်မန်တၟိ ဗတိုက်သရိုဟ်တၠအဝဵုပၞာန် NMSP-AD တုဲ အခိင်လၟုဟ်ဏံ သ္ကိုပ်အုပ်ဓုပ်အရာပ်ကဵု ဂကောံသ္ၚိကၟိန်တံ ပလေဝ်ပလေတ်ဒမံင် သွက်အမှုရောင် ညးဗြဴ နူဒေသဂှ်မွဲတၠ ဟီုရ။
“ၝဲညး ဗက်ဂၠိုက်ဂၠာဲမံင်၊ သွက်ဂွံအာဒၞာဲဂှ်။ ဖျေံအမိင်ဟာ၊ ကော်ဏာတုဲ ကဵုသတိသက်သက်ဟာဟီုဂှ် မုဟွံဂွံတီကေတ်ဏီပုဟ်။ ဗွဲကြဴနူရပ်ဏာတုဲဂှ် ၝဲညးလေဝ် မွဲအလန်မှ ဟွံဂွံအာဆဵုဏီပုဟ်” သာ်ဝွံ ညးဗြဴဂှ် ဟီုရ။
နာဲမျေအ်နာင် ဒးဒုင်ရပ်လဝ်ဂှ်ဝွံ ပံင်ကောံကဵု ဗၠာဲသၟိင်ဒေသ၊ ဂကောံအုပ်ဓုပ်ပွိုင်ဍုင်တံတုဲ ပံက်လဝ်ဝိုင်ဝေင်ဇျှင်လံင်သြန် အပ္ဍဲအရာပ်ဂၠံင်ကွဳပၟတ်ကၠအ်သတ်ဂှ် လလအ်ကဵုသၞာံရ။
သၟာင်နူဂှ်ပၠန် နူကဵုသၟာဝေင်ဇျှင်လံင်သြန်တံ ကၠတ်ဂၠံက်ပၠိုင်ၜးနင် ကပေါတ်မၞုံၚုဟ်မးဂမၠိုင်ဂှ် ပ္တိတ်ကဵုမံင်သြန်ပံင် (သြန်ကဝိုင်) ဂှ်ရ ကတဵုဒှ်ပြဒ္ဒညာကဵု ညးဒေသတံ မွဲနှေံမွဲနှေံနွံဂှ် ဂွံတီကေတ်ရ။
ဟိုတ်ဂှ်ရ ရပ်ထိင်လဝ် နာဲမျေအ်နာင် နကဵုအမှုဝေင်ဇျှင်လံင်သြန်တုဲ နကဵုဗော်ဍုင်မန်တၟိ ဗတိုက်သရိုဟ်တၠအဝဵုပၞာန် NMSP-AD တံ ဗီုလဵုစဳရေင်ရော သ္ဂောံတီကေတ်မာန်ဂှ် နူဌာန်ပရိုင်ဗၠးၜးမန် IMNA ကေတ်အဆက်သၟာန်သၟုက်ဒမံင် ညးတာလျိုင် မဆေင်စပ်တံဖိုဟ်ရ။
အပ္ဍဲကာလဒပ်ပၞာန်ဗၟာသီအဝဵုဂှ်မ္ဂး ပ္ဍဲပွိုင်ဍုင်မုဟ်ဍုင်ဝွံ ညးပရေင်ဆက်စၠောံနွံကဵု ဂကောံကမ္မယှေန်ပၞာန်တံ ပံက်မံင်ဝိုင်ဝေင်ဇျှင်လံင်သြန် ကေုာံ သွံရာန်ဒမံင်ဂဥုဲၜူမာဲ ညံင်ရဴဗဗွဲဓဝ်တုဲ ဂကောံဒပ်ပၠန်ဂတးအပ္ဍဲဒေသတံ သွက်ဂွံရေင်တၠုင်ကေတ်ကဵုအရေဝ်ဂှ် ညးဒေသတံ မနွံပၟိက်ရ။
