ဒၞါဲၜံက်ခါဲဒ္ကောဝ် (မါင်ဒ္ကောဝ်) ကောန်ဍုင်ကြုက်တအ်ကၠောန်ဒၟံင် ပ္ဍဲကွာန်မက္ကသ၊ နွံဗ္ဒါဲဍုင်ကျာ်ပိဂှ် ဒပ်ပၞာန်ဗၟာ ပန်ဗ္တိုက်ကၠုင် နကဵုက္ၜင်ကျာပၞာန်တုဲ ညးတၠကမၠောန် ကောန်ဍုင်ကြုက်တအ်ကီု သီုသၟာကမၠောန်ၜံက်ခါဲဒ္ကောဝ်ဂမၠိုင် ဖ္အိုတ်လၟိဟ် (၁၀) တၠပြင် ဒးအာလဝ်ဘဲဝပ်နွံရောင် ဂွံတီကေတ်ရ။

နူတဏေံတေံ ဂိတုအေဗရဴ စၟတ်တ္ၚဲ (၂၉) အခိင်လ္ဒောဝ်တ္ရဲ အကြာ (၂) နာဍဳပြင်င်ဂှ် မွဲဝါ၊ အခိင်သဝ်တ္ရဲ အကြာ (၅) နာဍဳဂှ် မွဲဝါ က္ၜင်ကျာပၞာန်ဗၟာတအ် ကၠုင်ပန်ဗ္တိုက်လဝ် ၜါဝါတုဲ လၟိဟ်မဗမ်ဟွံအောန်နူ ၂၀ မ ထောံဖျေံလဝ်နွံရောင် ညးဒေသကျာ်ပိမွဲတၠဂှ် ဟီုရ။

“အတိုၚ်ညးဒေသတံဟီုဂှ်တှ်ေ နူကမ္မယှေန်ပၞာန်တံ ဂြာတ်ဖျေံဗမ် ပံၚ် (၅၀) ဂှ်တှ်ေ မွဲဒမြိပ် နူသ္ကုတ်ကွာန်မက္ကသ ဒဵုစိုပ်ကွာန် (သပြုတ်) ဆက်စပ်ဒၟံၚ်ကဵုမာၚ်ဒ္ကေါဝ်ဖအိုတ်တုဲ ဗွဲမဂၠိုၚ် သၟာကမၠောန်ကၠောန်ဒၟံၚ်မာၚ်ဒ္ကောဝ်တံဂှ်ရ ဒးဘဲဝပ်နွံ၊ ဆဂး ဂွံသ္ပဒတန်ချိုတ်တ်ပၠိုတ်တ်ဂှ် ဟွံမာန်ရောၚ်” သာ်ဝွံ ညးဒေသကျာ်ပိမွဲတၠ ဟီုရ။

ညးမဒးလဝ်ဘဲဝပ်တအ်ဂှ် ပလံၚ်ဗစိုပ်လဝ် ရုၚ်ဂဥုဲသခႅဠၜူရဳ လ္ပာ်ဍုင်သေံတုဲ ညးဒးဘဲဝပ်သ္ကာတ်မြဟ်တံဂှ်မ္ဂး နူရုၚ်ဂဥုဲသခႅဠၜူရဳမွဲအဆံင် ထပ်ပလံၚ်ဗစိုပ်ဏာလဝ် ရုၚ်ဂဥုဲဍုင်ကမ္မရဳတံနွံရောၚ် ဂွံတီကေတ်ရ။

လဂွံကဵုပရိုင်သေံတအ် ချူဓမံက်လဝ်ဂှ်မ္ဂး ဟိုတ်နူဒပ်ပၞာန်ဗၟာတအ် ဖျေံဗမ်ကဵုက္ၜင်ကျာ ဒၞါဲမါင်ဒ္ကောဝ် ကောန်ဍုင်ကြုက်တအ်ကၠောန်မံင်ဂှ်တုဲ သၟာကမၠောန်ကီု သီုညးတၠကမၠောန်တအ်ဖ္အိုတ် ဗၞတ် (၁၂) တၠ ဒးအာလဝ်ဘဲဝပ်နွံ သ္ဂးလဝ်တုဲ မၞိဟ်ဒးအိုတ်အာလမျီုနွံ၊ ဟွံမွဲဂှ် တၞဟ်ခြာဟွံဓမံက်ထ္ၜးလဝ်ရ။

ကတိုင်ၜံက်ခါဲဒ္ကောဝ် ဒၞါဲဒပ်ပၞာန်ဗၟာတအ် ပန်ကဵုက္ၜင်ကျာ မၞုံကွာန်မက္ကသဂှ်ဝွံ ဒှ်တိဍာ်ခရိုင်ဒူပဠာယျာ မဟာဒပ် (၆) ဗော်သွးကောန်ဂကူကရေင် KNU တုဲ ယဝ်ရတိတ်နူဍုင်ကျာ်ပိ နကဵုကွဳလိုန်ဓါတ်မ္ဂး ဒးဒဳ လလအ်အခိင် ဗၞတ် (၁၅) မိဏေတ်ရောင်။

ဒၞါဲၜံက်ခါဲဒ္ကောဝ် ကွာန်မက္ကသ မၞုံတိဍာ် KNU ဏအ်ဂှ် ဒးဒုင်ပန်ဗ္တိုက်ဒၟံင်ကဵုက္ၜင်ကျာပၞာန်ဗၟာဂၠိုင်ကဵုဝါတုဲ ဒးဒုင်ပန်ဗ္တိုက်အလန်ဏအ်ဂှ် သ္ကာတ်မြဟ်အိုတ်ရောင် ညးဒေသကျာ်ပိတအ် ဟီုဂးမံင်အိုတ်ရ။

ဗီုရုပ် – โจโฉ