ပ္ဍဲတ္ၚဲဂိတုပသာ်ပေၚ်ဏံဝွံ နူကမ္မယှေန်ပၞာန်တံ လလောၚ်ပ္တိတ်အမိၚ် ကဵုအခေါၚ်ဗၠးဒုဟ်ဒဏ် ကုကောန်ထံၚ်ဂမၠိုၚ်တုဲ ညးဂွံအခေါၚ်ဗၠးဒုဟ်ဒဏ် နူဗဒိုပ်(ဂုက်/အချုက်)၊ ထံၚ် တွဵုရးဍုၚ်မန် (၉၂) တၠနွံရောၚ် ဂွံတီကေတ် နူတၚ်နၚ်ရုၚ်က္ဍိုက်က္ဍိုပ်ထံၚ် တွဵုရးဍုၚ်မန်ရ။
အပ္ဍဲကဵုညးဗၠးကၠုၚ်ဂမၠိုၚ်ဂှ်ဝွံ နူထံၚ်ဗဟဵုကျာ်မြဟ် (၁၃) တၠ၊ ထံၚ်မတ်မလီု (၂၃) တၠ၊ ထံၚ်သဓီု (၈) တၠ၊ နူဗဒိုပ်(အၚ်္ဂဘိုရာဘာ) (၈) တၠ၊ နူဗဒိုပ်ပ္တိတ်ကပေါတ်ဗၞိက်ဇိုၚ်ကျာ် (၉) တၠ၊ ဗဒိုပ်ယျေန်ညုၚ် (၁) တၠ၊ ဗဒိုပ်(အၚ်းဗြောၚ်) (၁) တၠ၊ ဗဒိုပ်(တောၚ်စွန်း) (၆) တၠ၊ နူဗဒိုပ် (မုပ္ပလၚ်) (၂) ဗဒိုပ်ဂှ် (၉) တၠ၊ သီုဖအိုတ် ညးဗၠးတိတ်ကၠုၚ် (၉၂) တၠနွံရောၚ် ဂွံတီကေတ်ရ။
ပ္ဍဲကဵုညးဂွံအခေါၚ်ဗၠးဒုဟ်ဒဏ် (၉၂) တၠဂှ်ဝွံ ကောန်ထံၚ်ပရေၚ်ဍုၚ်ကွာန် ပါ/ဟွံပါဂှ် နူကဵုဌာန်ပရိုၚ်ပရိုၚ်ဗၠးၜးမန် IMNA ဆက်ဂၠိုက်ဂၠာဲမံၚ်ဖိုဟ်ရ။
ပ္ဍဲဂိတုပသာ်ပေၚ်တ္ၚဲဏံဝွံ နူကဵုကမ္မယှေန်ပၞာန်တံ သၟာၚ်နူကဵုအခေါၚ်ဗၠးဒုဟ်ဒဏ် ကုကောန်ထံၚ်သီုဖအိုတ် (၁၅၀၈) တၠဂှ်တုဲ ညးဒးမံၚ်ဒုဟ်ဒဏ်ထံၚ်သီုဖအိုတ်တံဂှ်လေဝ် ကဵုအခေါၚ်ဖအောန်ဖျေံလဝ် ဒုဟ်ဒဏ်သှေ်သၟေဟ်နွံရ။
ၜိုန်ဂှ်ကီုလေဝ် နကဵုညးတံ “က္လေၚ်လုတ်လောန်ဒုဟ်မွဲဝါပၠန်မ္ဂး ဒုဟ်ဒဏ်သှေ်သၟေဟ်မံၚ် လၟုဟ်ဏံဂှ်လေဝ် ထပ်ပံၚ်တုဲ ဒးဒုၚ်အာရောၚ်” ဂှ် နကဵုသၞောတ်ဗ္ၜတ် က္လေၚ်ဗလးကဵုလဝ်ရ။
နကဵုအမိၚ်ကဵုအခေါၚ်ဗၠးဒုဟ်ဒဏ်လၟုဟ်ဏံကီု သီုနူကဵုက္ဍိုပ်သ္ကိုပ်ပၞာန်တြေံ ဥူမေန်အံၚ်လှာၚ်ကီု လလောၚ်ပ္တိတ်အမိၚ် ကဵုအခေါၚ်ဗၠးဒုဟ်ဒဏ် ကုကောန်ထံၚ် နွံကၠုၚ် (၄) ဝါကီုလေဝ် လၟိဟ်ညးက္လေၚ်တိတ်ကၠုၚ် ပ္ဍဲဗလးတိဏံ ဟွံညဳသၟဟ်ဂှ်ရ လီစၞာဲဒၟံၚ် နကဵုလၟိဟ်ဂၞန်ဟေၚ်ရဂှ်လေဝ် ညးမၚ်ရံၚ်ကေၚ်ကာကောန်ထံၚ်တံ သ္ၚဳဂၠိပ်လဝ်နွံရ။
