ဂကောံကမ္မယှေန်ပၞာန် ထ္ပက်ကၠုၚ်ရောၚ်ပၞာန် ပ္ဍဲသ္ကုတ်ရေဝ်သၟဝ်ကျာ၊ တွဵုရးဍုၚ်မန်ဂှ် နူဒပ်ပံၚ်ကောံကောဒေံဒရုၚ် (စက်ဗရုသာဲ) မန်-တၞၚ်သဳ ကေုာံ ဒပ်ပံၚ်ကောံ မဟာမိတ်ပၠန်ဂတးတံ ပန်ဗ္တိုက်ထောံဖျေံဗမ် နကဵုဒရုၚ် (စက်ဗရုသာဲ) တုဲ ကောန်သ္ဂံၚ်ဒပ်ကမ္မယှေန်ပၞာန် ပြဟ်လလုဲ (၄) တၠ၊ ဒးဘဲဝပ် (၁၂) တၠနွံရဂှ် ဂွံတီကေတ် နူဒပ်ပၠန်ဂတးဍုၚ်မန် (MSRF) ရ။
ပ္ဍဲဂိတုမာတ် (၃၁) တုဲကၠုၚ်ဏံ ဂကောံကမ္မယှေန်ပၞာန် ထ္ပက်ကၠုၚ်ကရောၚ်ပၞာန် ဗဒဲါကွာန်အံၚ်တပျေဂှ် ထပ်ပန်ဗ္တိုက်ထောံဖျေံဗမ် (၆) မ နကဵုဒရုၚ်ရဂှ် နူကဵု (MSRF) လလောၚ်ပ္တိတ်လဝ် ပ္ဍဲဂိတုအေဗရဴ စၟတ်တ္ၚဲ (၃) တုဲကၠုၚ်ဏံရ။
ပ္ဍဲကဵုပေဲါဗ္တိုက်ဏံဝွံ ဒပ်ပၠန်ဂတးဍုၚ်မန် (MSRF) ၊ ဒပ်စဵုဒၞာညးဍုၚ်ကွာန်ရေဝ် (YPDF)၊ ဒပ်မန်ရာမည (RMA) တမ်ဒပ် (၉၀၁) ၊ တမ်ဒပ် KNLA (၂၇) ဒပ်ပါ် (၁) ကေုာံ ဒပ်ဒမၠုက်ရေဝ် (YGF) စၟတ် (၈၀၀၁) မဒှ်ဒပ်ပံၚ်ကောံမဟာမိတ်ပၠန်ဂတးကဵု ဒပ်ပံၚ်ကောံကောဒေံဒရုၚ် (စက်ဗရုသာဲ) မန်-တၞၚ်သဳတံ ပံၚ်ကောံပါလုပ်ရ။
တုပ်သာ်ဝွံကီု ပ္ဍဲဂိတုမာတ် (၃၀) တုဲကၠုၚ်တေံဂှ်လေဝ် ကရောၚ်ပၞာန်ကမ္မယှေန်ပၞာန် မၞုံဗဒဲါကွာန်အံၚ်တပျေဂှ် ပန်ဗ္တိုက်ထောံဖျေံဗမ် (၁) မ နကဵုဒရုၚ် (စက်ဗရုသာဲ) တုဲ ကောန်သ္ဂံၚ်ဒပ်ကမ္မယှေန်ပၞာန် ဒးအာဘဲဝပ်မွဲတၠရ။
ပ္ဍဲကွာန်သ္ကုတ်ရေဝ်သၟဝ်ကျာဂမၠိုၚ်ဂှ်ဝွံ စပ္တံနူဂိတုဖေဖဝ်ဝါရဳတုဲကၠုၚ်တေံ ကရောၚ်ပၞာန်ဒပ်ကမ္မယှေန်ပၞာန် လုပ်စိုပ်ကၠုၚ်တုဲ စဵုကဵုတ္ၚဲဏံ ဟွံက္လေၚ်ဆုတ်တိတ်မွဲသာ် ထ္ပက်မံၚ်ကရောၚ်ပၞာန်အဆက်ဆက်ဂှ်ရ သၟာကမၠောန်ကၠအ်ထ္ၜိုတ်တံ သွက်ဂွံခွါတ်ထ္ၜိုတ်ဂှ် ဒးဆဵုဂဗမံၚ်ခက်ခုဲရောၚ် ညးတြုံနူဒေသရေဝ်မွဲတၠဂှ် ဟီုရ။
“ဍေံတံ (ဒပ်ပၞာန်) ဗက်ဂေတ်မံၚ်ဏောၚ်တှေ် သၟာကၠအ်တံ ဟွံဂံၚ်ခွါတ်ပုဟ်။ ဒးဖေက်မံၚ်ရ။ အခိၚ်ဗ္တံတှေ်လေဝ် မိၚ်မံၚ်ရမျာၚ်လွဟ်ရ။ အခိၚ်ဒေါဝ်ဗ္တံ၊ အခိၚ်ပယျာံ ဂယးပြဟ်ဂှ် ညးခွါတ်ဂၠိုၚ်မံၚ်ရ။ ဍေံတံဆဵုတှေ် ရပ်ဏာဟာ၊ ဂစိုတ်ထောံဟာဂှ် ဒးဒှ်မံၚ်ဓဝိၚ်ရ။ လ္ၚဵုဂှ်တှေ် ဒေံါဇူထောံ ဟွံခွါတ်ဟဂှ်ရ” သာ်ဝွံ ညးဒေသရေဝ်ဂှ် ဟီုရ။
ညးဒေသ မကၠောန်မံၚ်ကမၠောန်ကၠအ်ဂူတံဝွံ ပွမဒးဒုၚ်သီဖုၚ်/သြန်ကီု၊ ဒးဒုၚ်ရပ်ကီု၊ ပရေၚ်ဘပဠကီု ဒးဆဵုဂဗမံၚ်ဂှ်ရ ဖေက်လကိုတ်မံၚ်အိုတ်ရောၚ် ဂးရ။
ကမ္မယှေန်ပၞာန်တံဝွံ သွက်ဂွံထိၚ်ဒဝ် သ္ကုတ်ဂၠံၚ်ဇၞော် စၟတ် (၈)၊ အကြာရေဝ်-ဇြပ်ဗု၊ သ္ကုတ်သၟဝ်ကျာပွိုၚ်ဍုၚ်ရေဝ်ဂှ်မ္ဂး ပြုပြေၚ်မံၚ်ပၞာန်ဗွဲမသ္ကာတ်မြဟ်ဂှ်ရ ဒှ်မံၚ်ပေဲါဗ္တိုက်ကဵု ဒပ်ပံၚ်ကောံမဟာမိတ်ပၠန်ဂတးတံ မွဲနှေံမွဲနှေံရ။
အပ္ဍဲဂိတုမာတ်တုဲကၠုၚ်ဏံဝွံ ပ္ဍဲဗဒဲါပွဳဗွိုၚ်ကွာန်အံၚ်တာယာ ကေုာံ ကၠအ်လိမဴ ကရောၚ်ပၞာန်ကမ္မယှေန်ပၞာန် ကေတ်လဝ်ဒၞာဲဂှ် ကတဵုဒှ်လဝ်ပေဲါဗ္တိုက်ၜါလ္ပာ် ဟွံအောန်နူ (၅) ဝါနွံရဂှ်လေဝ် ဂွံတီကေတ် နူညးဒေသဂမၠိုၚ်တံရ။
