ပ္ဍဲပွိုၚ်ဍုၚ်ဍာ်ဗု ကေုာံ ပွိုၚ်ဍုၚ်တယျက်ချာၚ်၊ ရးဒေသဇၞော်တၞၚ်သဳဂှ်ဝွံ အပ္ဍဲဂိတုအေဗရဴသၞာံဏံ မာၚ်တိုပ်တိခတိုဟ်အာ စဵုကဵု (၄) ဝါဂှ်ရ ကောန်ၚာ်အာယုက် (၁၀) သၞာံမွဲတၠ ဒးချိုတ်အာတုဲ ညးဒးအာဝပ် (၇) တၠနွံဂှ် ဂွံတီကေတ်ရ။

ပၞောဝ်ကဵုပရူဒဒှ်ဂမၠိုၚ်ဂှ်မ္ဂး ပ္ဍဲဂိတုအေဗရဴ စၟတ်တ္ၚဲ (၁၁) တုဲကၠုၚ်ဏံ သ္ၚိကၟိန်သၟာကမၠောန်ဆုဲပြံၚ် မကၠောန်ဒၟံၚ်ကမၠောန် ပ္ဍဲကၠအ်ထ္ၜိုတ်၊ ဗဒဲါကွာန်ဍာ်ဂမ္တဴ၊ ပွိုၚ်ဍုၚ်ဍာ်ဗုဂှ် လိုန်ဒးမာၚ်တိုပ်တိ (၂) မအဆက်ဆက် အပ္ဍဲကၠအ်ဂှ်ရ ဂကောံသ္ၚိကၟိန် သီုညး (၅) တၠ ဒးအာဘဲဝပ်တုဲ အပါ ကေုာံ ကောန်ဝုတ် ဒးဝပ်သ္ကာတ်မြဟ်ဂှ်ရ ဒးကုတ်လဝ်ဇိုၚ်မွဲမွဲဒိုဟ်ရ။

တုဲပၠန် ပ္ဍဲတ္ၚဲအတးအကြာပ် ဂိတုအေဗရဴ စၟတ်တ္ၚဲ (၁၅) တုဲကၠုၚ်ဏံ ပ္ဍဲကဵုကွာန် (ဂုံညှၚ်းဆိပ်)၊ ပွိုၚ်ဍုၚ်တယျက်ချာၚ်ဂှ်ဝွံ ကောန်ၚာ်ၜါတၠ လိုန်ဒးမာၚ်တိုပ်တိ ဗဒဲါပွဳဗွိုၚ်ကၠအ်သ္ၚိဂှ် ကောန်ၚာ်အာယုက် (၁၀) သၞာံမွဲတၠ ဒးချိုတ်အာတုဲ ကောန်ၚာ်အာယုက် (၁၄) သၞာံမွဲတၠ ဒးအာဘဲဝပ်ကီုရ။

တုပ်သာ်ဂှ်ကီု ပ္ဍဲဇိုၚ်ဒဵုကျာ်ပြေလၟောၚ်၊ ဗဒဲါဍုၚ်တယျက်ချာၚ်ဂှ်ဝွံ ပ္ဍဲဂိတုအေဗရဴ စၟတ်တ္ၚဲ (၁၇) ဏံ ညးတြုံအာယုက် (၅၀) သၞာံပြၚ်မွဲတၠ အဃောအာကၠအ်ဂှ် လိုန်ဒးမာၚ်တိုပ်တိလ္တူဍာန်တုဲ ဒးကုတ်ထောံဇိုၚ်ပုၚ်မွဲဒိုဟ်ကီု ဂွံတီကေတ်ရ။

ညးဒေသတံ လိုန်ဒးမာၚ်တိုပ်တိဆက်ဒၟံၚ်ကီုလေဝ် ကမ္မယှေန်ပၞာန်ကဵု ဂကောံရပ်လွဟ်အပ္ဍဲဒေသတံ ဟီုဂးကဵုသတိဟွံမွဲရဂှ် ညးဒေသကွာန်ဍာ်ဂမ္တဴမွဲတၠ ဟီုရ။

“ညးဒးနွံတုဲမှ လ္ပအာလ္ပာ်တေံ၊ လ္ပအာလ္ပာ်ဏံ၊ မာၚ်နွံမံၚ်ဏောၚ်ဂးတုဲ ဒပ်ပၞာန်တံ ဟီုထ္ၜးရ။ ဒပ်ပၞာန်တံ တိုပ်မာၚ်၊ ကေအေန်ယူတံ တိုပ်မာၚ်၊ အကြာဂှ် ညးဒေသတံရဒး။ ကၠအ်လေဝ်ဟွံဂံၚ်အာ ဒးဇူလဝ်ရ။ ဆဂး သွက်စဟၟဲတှေ် ဒးအာကၠောန်ပၠန်ရ။ ညးဒးဂှ် ဒးရ” သာ်ဝွံ ညးဟီုရ။

ဒၞာဲမာၚ်ခတိုဟ်မံၚ်လၟုဟ်ဏံဂှ်ဝွံ ဒပ်ကမ္မယှေန်ပၞာန်ကီု သီုဒပ်ကေအေန်ယူ မချဳဓရာၚ်မံၚ်အပ္ဍဲဒေသတံ လုပ်တိတ်အာကၠုၚ်ဒၟံၚ်ရောၚ် ညးဒေသဂမၠိုၚ်တံ ဟီုရ။

ဆေၚ်စပ်ကဵုမာၚ်တိုပ်တိတုဲ ကေအေန်ယူ မချဳဓရာၚ်ဒၟံၚ် အပ္ဍဲကွာန်ဍာ်ဂမ္တဴ ကေုာံ ကွာန်သာယာမန်ဂှ်ကဵု ဂကောံကမ္မယှေန်ပၞာန်တံ လုပ်စိုပ်စၟဳစၟတ်မံၚ်ဂှ်ရ ညးဒေသတံ ဒှ်ဂဝိၚ် ဂွိၚ်ဖေက် ကတဵုဒှ်ပေဲါဗ္တိုက်ၜါလ္ပာ်ရ။

“မာၚ်ခတိုဟ်တှေ် ဒပ်ပၞာန်တံ လုပ်ကၠုၚ်ကွာန်ဍာ်ဂမ္တဴရ။ နူတနေိတေံသဝ်တ္ၚဲဂှ် က္လေၚ်တိတ်အာရ။ ကရေၚ်တံလုပ်၊ ဒပ်ပၞာန်တံလုပ်၊ လုပ်လုပ်တိတ်တိတ် ဒှ်မံၚ်ရ။ ဟိုတ်ဂှ်ရ ဂွိၚ်ဖေက်ဒှ်ပေဲါဗ္တိုက်တုဲ ပလေဝ်ပလေတ်မံၚ် သွက်ဂွံဂြိပ်ရ” သာ်ဝွံ ညးတြုံ နူဒေသကွာန်သာယာမန်မွဲတၠ ဟီုရ။

ဂိတုအေဗရဴသတ္တဟပထမတုဲကၠုၚ်ဏံဂှ်လေဝ် သမ္ဘာတၠသ္ၚိၜါတၠ အဃောအာကၠအ်ကဵု ကွဳလိုန်ဓာတ်ဂှ် လိုန်ဒးမာၚ် ပ္ဍဲဗဒဲါကွာန်ဍာ်ဂမ္တဴဂှ်ကီုလေဝ် မၞိဟ်ဟွံဒးဘဲဝပ်မွဲသာ်ရ။

အခိၚ်လၟုဟ်ဏံ ပ္ဍဲပွိုၚ်ဍုၚ်ရးတၞၚ်သဳဂှ် ဆက်ဒှ်မံၚ်ပဋိပက္ခဂှ်ရ ညးဒေသတံ သွက်ဂွံပဲါဒဴအာဒၞာဲဂီုကၠီုဂှ် လ္ပာ်ဒပ်ပၠန်ဂတးတံ လလောၚ်ပ္တိတ်ကဵုလဝ်သတိရ။

ပ္ဍဲရးဒေသဇၞော်တၞၚ်သဳဂှ်ဝွံ စနူဂိတုဂျောန် သၞာံ (၂၀၂၅) စဵုကဵုဂိတုဒဳဇြေမ်ဗာ ပွိုၚ် (၆) ဂိတုဂှ် ပရူဒဒှ်မာၚ်ခတိုဟ် ကတဵုဒှ်အာ (၂၂) ဝါတုဲ မၞိဟ်ချိုတ် (၅) တၠ၊ ဒးဘဲဝပ် (၁၈) တၠနွံရဂှ် ဓမံက်ထ္ၜးလဝ် ပ္ဍဲလိက်ဒုၚ်စဳရေၚ် ဂကောံသုတေသန Tide Information Unit TIU ရ။

အပ္ဍဲကာလဒပ်ပၞာန်ဗၟာသီအဝဵုဂှ် ဟိုတ်နူမာၚ်တိုပ်တိကဵု ကပေါတ်လွဟ်လနက်သှေ်သၟေဟ်ဂှ်ရ ပ္ဍဲရးတၞၚ်သဳဝွံ ပရေၚ်ဘဝလၟေၚ်တ္ၚဲညးဒေသတံ ကြေပ်ဂြတ်ဂၠိုၚ်ကၠုၚ်တုဲ ဒးမံၚ်တန်တဴ ဒးသ္ပသတိမံၚ်ကဵု ဘဲအန္တရာဲမာၚ်ရ။