ပ္ဍဲရာသဳက္ညၚ်သၞာံဏံ ဟိုတ်နူဘဲဒဏ်ဂမ္တဴသၠုၚ် (သ္ကာတ်မြဟ်) တုဲ ပ္ဍဲကဵုဇရေၚ်ရုၚ်ဂဥုဲ၊ ခဒံဂဥုဲ ကွာန်ရးကဵု လ္တူဍုၚ် တွဵုရးဍုၚ်မန်ဝွံ ညးဒးအာဒုၚ်လွဳလွတ်မံၚ်ယဲ / ပရေၚ်ထတ်ယုက်ဂၠိုၚ်ဒၟံၚ်ရောၚ် ညးဒေသကဵု ညးတာလျိုၚ်ရုၚ်ဂဥုဲ၊ ခဒံဂဥုဲတံ ဟီုရ။
ဟိုတ်နူဘဲဒဏ်ဂမ္တဴတုဲ စပ္တံနူတ္ၚဲအတးသၚ်္ကြာန်တုဲကၠုၚ်တေံရ ကောန်ၚာ်၊ ညးအဝဲလ္ဒေါဝ်၊ ညးအာယုက်ဇၞော်တံ မပ္တံ ဂမ္တဴလုပ်/တိုန်၊ ဇကုကတဴ၊ ဂၞဴအာဂမၠိုၚ် ဒးဆဵုဂဗဂၠိုၚ်ကၠုၚ်ရ။
ညးတာလျိုၚ်ရုၚ်ဂဥုဲၜါသွာၚ်မွဲတၠဂှ် “လၟုဟ်ဏံ ကၠုၚ်ထ္ၜးပ္ဍဲကဵုရုၚ်ဂဥုဲတှေ် ညးဂမ္တဴတိုန်တံ ဂၠိုၚ်ရ။ ကောန်ၚာ်ကီု သီုမၞိဟ်ဇၞော်ရ။ ဒှ်မာန်တှေ် လ္ပအာမ္ၚးညိ။ သဝ်တ္ၚဲ ၜိုတ် (၆) နာဍဳမှ ဒၞာဲဒးအာနွံဂှ် အာညိ။ အာမ္ၚးတှေ်လေဝ် ကေတ်ဏာ က္ဍိုၚ်တံ၊ ပဠောံတဲဇမၠိၚ်တံကီု။ ဂမ္တဴတိုန်လောဲမံၚ်။ စွံသတိ အာကၠုၚ်ညိ” သာ်ဝွံ ညးဟီုရ။
ဂိတုမာတ် စၟတ်တ္ၚဲ (၂၃) တုဲကၠုၚ်ဏံလေဝ် ပ္ဍဲပွိုၚ်ဍုၚ်ၜါသွာၚ် ညးတြုံအဝဲလ္ဒါဝ်မွဲတၠ စဴကၠုၚ်နူရေၚ်ကၠေၚ်ဂှ် ဟိုတ်နူဘဲဒဏ်ဂမ္တဴတုဲ ဒးချိုတ်အာလဝ်ကီု ဂွံတီကေတ်ရ။
ဥတုရာသဳက္တဴက္တာန်ကၠုၚ်ဂှ်ရ အရာဖဵုဟွံမွဲပၟိက်ဂမၠိုၚ် ညံၚ်ဟွံကတဵုဒှ်ကၠုၚ်ဂှ်မ္ဂး နူကဵုဌာနဝန်ဇၞော်ပရေၚ်ထတ်ယုက်တံ လလောၚ်ပ္တိတ်လဝ် တၚ်ဒးဒ္ဂေတ်ဗက်ဂမၠိုၚ်ကီုရ။
ဗွဲတၟေၚ်မ္ဂး ဟိုတ်နူဘဲဒဏ်ဂမ္တဴတုဲ ကောန်ၚာ်တံ ဒှ်ယဲဂၞဴလီု၊ ဂၞဴအာ ဂၠိုၚ်ကၠုၚ်မံၚ်ရောၚ် မိကောန်ၚာ်မွဲတၠဂှ် ဟီုရ။
“ပ္ဍဲကဵုပိုဲတံလေဝ် ဒှ်ဂၠိုၚ်ရ။ ကောန်ၚာ်တံ ဒှ်ဂၠိုၚ်ရ။ ဂၞဴအာညိ ဇကုက္တဴညိ ဂေတ်မံၚ်ဟဂှ်ရ။ တ္ၚဲဂှ်လေဝ် က္တဴလောန်တှေ် ကောန်ၚာ်တံ စနူမံၚ်စံၚ်ခက်ရ” သာ်ဝွံ ညးဟီုရ။
ဒေသသ္ကုတ်သၠုၚ်ကျာကၟိန်ဍုၚ်ဗၟာဝွံ လ္တူနူကဵုဂမ္တဴဓမ္မတာဂှ် သၠုၚ်တိုန်ကၠုၚ်ဒၟံၚ် နူ (၀.၅) ဒဳဂရဳသေန်တဳဂရုက် စဵုကဵု (၁) ဒဳဂရဳသေန်တဳဂရုက်ရောၚ် ဂွံတီကေတ် နူတၠပညာဗြဲကျာ ဥူဝေန်နာၚ် မတော်ခယျလဝ်ရ။
ဟိုတ်နူဘဲဒဏ်ဂမ္တဴတုဲ မပ္တံက္ဍိုပ်ဂိ မတ်ဗၜူ၊ ကောန်ကၞိတိုန်၊ ဂမ္တဴတိုန်၊ ပဠက်ဇတ်၊ ဍောၚ်ၜိုတ်အိုတ်ဓတ်၊ ဝိုတ်သတိ(စိပ်) စဵုကဵုဘဲအန္တရာဲလမျီု ကတဵုဒှ်ကၠုၚ်မာန်ဂှ်ရ ကၠောန်ကမၠောန်ပ္ဍဲတ္ၚဲကီု၊ အာကၠုၚ်မ္ၚးကီုဂှ် ဒးသ္ပဂရု စွံသတိရောၚ် နူဌာနပရေၚ်ထတ်ယုက်တံ ဖတိုက်ဖအောဝ်လဝ်ရ။
ကာလစဴကၠုၚ်နူမ္ၚးမ္ဂးလေဝ် လ္ပလုပ်ခဒံကျာဂံက် (အေဝ်ကန်) လဝဲါဂှ်ညိ။ ပွမသုၚ်ဍာ်ကလောံ၊ ဟုံဍာ် ကေုာံ ကြာတ်ကြဴက္ဍိုပ်ကီု ဝေၚ်ပဲါညိ။ သုၚ်ဍာ်ဂၠိုၚ်ဂၠိုၚ်တုဲ ဒၞာဲကျာလုပ်တိတ်ခိုဟ်ဂှ် မံၚ်ဇူဒီုအာညိ။
ပ္ဍဲအခိၚ်ကာလ ဘဲဒဏ်ဂမ္တဴသ္ကာတ်မြဟ်ဏံဝွံ ဟိုတ်နူဒးလျးပသာန်တ္ၚဲတဝ်တဝ် (တိုက်ရိုက်) တုဲ ကေန်သာစၞာံဇကုကီု သီုဖဵုပရေံ မဆေၚ်စပ်ကဵု စၞာံဇကု မကတဵုဒှ်မာန်ဂှ်ရ ကာလဒးတိတ်မ္ၚးတွဵုမ္ဂး စကာဗွိုက်လ္တိုက် ပလောံတဲဇမၠိၚ်၊ က္ဍိုၚ်၊ ခပေဲ (ခမော်၊ အထုပ်) ကေုာံ ဒ္ၚောဝ်မတ်ဒၞာလျးပသာန်တ္ၚဲ ထေက်ရဂှ်လေဝ် သၞာဲဒဴပရေၚ်ထတ်ယုက်တံ ဟီုဂးဖတိုက်ဖအောဝ်လဝ်ရ။
