ပ္ဍဲပွိုင်ဍုင်ရေဝ်၊ တွဵုရးဍုင်မန်ဝွံ ကမ္ပဏဳပၟတ်ဓာတ်လလဳ နဇြဟတ်ပူဂဵုဇကုဇကုလ္ၚဵုတံ ဟွံဒစးဒုင်ကဵုသမ္တီမွဲသာ် ကံက်ကေတ်ဒမံင် စရိတ်မဳတာ မွဲယူနေတ် စဵုကဵု (၇၅၀၀) ဒကေဝ်ဂှ်ရ ညးရပ်စကာတံ သ္ဒးဒုင်ဂိမံင်သြန်ရောင် ညးဒေသရေဝ်တံ ဟီုရ။
တန်တဴကဵု လ္တူရာန်ဂွံကၠေင်စက်တုဲ နူကမ္ပဏဳ SMD ကေုာံ NYEDS တြးမံင်ဇြဟတ်ပၟတ်ဓာတ်လလဳ ပ္ဍဲသ္ကုတ်ရေဝ်သၟဝ်ကျာဂှ်ဝွံ ဇြဟတ်ပၟတ်ဓာတ်လလဳ ရပ်စပ်စကာလဝ် အပ္ဍဲဂိတုမာတ်ဂှ် ပြံင်လှာဲကံက်ကေတ်အာ (၃၈၀၀) ဒကေဝ်တုဲ အခိင်တြးပၟတ်ဂှ်လေဝ် ဖအောန်ဖျေံအာရောင်ဂှ် ကဵုလဝ်သမ္တီ ကုညးရပ်စပ်စကာတံရ။
ဆဂး ကမ္ပဏဳပၟတ်ဓာတ်လလဳ နဇြဟတ်ပူဂဵုဇကုဇကု (ကိုယ်ထူကိုယ်ထ) လ္ၚဵုတံ ဟွံဒစးဒုင်ကဵုသမ္တီမွဲသာ် စရိတ်မဳတာရပ်စပ်စကာလဝ် အပ္ဍဲဂိတုမာတ်ဂှ် ကံက်ကေတ်ဒမံင် မွဲယူနေတ် (၇၅၀၀) ဒကေဝ်တုဲ အခိင်တြးပၟတ်ဓာတ်လလဳဂှ်လေဝ် ဖအောန်ဖျေံလဝ် အတိုင်ပၟိက်စိုတ်ဂှ်ရ သ္ဒးဒုင်ဂိမံင်ရောင် ညးဗြဴနူဒေသရေဝ်မွဲတၠ ဟီုရ။
“သွက်ဂိတုမာတ်တုဲကၠုင်ဏံ ဂွံရာန်ကၠေင်စက်ဂှ် ဝါတ်ဂါတ်မံင်။ ၚုဟ်လေဝ်တိုန်အာဏောင်ဟီုတှ်ေ စရိတ်မဳတာ မွဲယူနေတ် ဒှ်အာ (၇၀၀၀) ရ။ ပၟတ်ဂှ်လေဝ် ၜိုတ်ကဝက်ဂိတုမာတ်ဂှ် မွဲတ္ၚဲတှ်ေ မွဲနာဍဳ၊ မွဲနာဍဳကဝက်ဟေင် ကဵုမံင်ရ။ အခိင်ပၟတ်ကၠုင်ဂှ် အောန်လောန်ရ။ တုဲတှ်ေ ဒစးဒုင်ကဵုသမ္တီလေဝ်ဟၟဲပုဟ်။ သီုဖအိုတ် ဒှ်မံင်ဒဒိုက်” သာ်ဝွံ ညးဟီုရ။
သၟာင်နူဂှ်ပၠန် ၚုဟ်မဳတာဂှ် ဟိုတ်နူစကံက်ကေတ် နူ (၅) ယူနေတ်ဂှ်ရ သ္ၚိဒမံင်မွဲမမ္ဂး မွဲဂိတု အောန်အိုတ် ဒးမံင် (၃၅၀၀၀) ရောင် ဂွံတီကေတ်ရ။
အခိင်လၟုဟ်ဝွံ ဟိုတ်နူဝါတ်ဂါတ်ကၠေင်စက်တုဲ ညးရပ်စပ်စကာဒမံင် ပၟတ်ဓာတ်လလဳ နဇြဟတ်ပူဂဵုဇကုဇကု ကေုာံ ကမ္ပဏဳပၟတ်ဓာတ်လလဳ ပ္ဍဲပွိုင်ဍုင်ရေဝ်ဂှ် မွဲယူနေတ် နူကဵု (၄၀၀၀) စဵုကဵု (၇၅၀၀) ဒကေဝ် ဒးကဵုကၠုင်ၚုဟ်နွံရ။
ညးဒေသရုတ်တံင်ဗွဲမဂၠိုင်တံဝွံ အခိင်ဂွံပၟတ်အောန်ကၠုင်ဂှ်ရ ညးသြန်နွံတံ စၞးပၟတ်ဓာတ်လလဳဂှ် ရပ်စပ်စကာ ဗဂပ်ကၠုင်သဵုလာဂၠိုင်ကၠုင်မံင်ရောင် ဂွံတီကေတ်ရ။
ညးတြုံဒေသရေဝ်မွဲတၠဂှ် _“အကြာဏံ သ္ၚိသြန်နွံဗွဲမဂၠိုင်တံ ပလှ်ပၟတ်ဓာတ်လလဳတုဲ ဗဂပ်ကၠုင်သဵုလာရ။ သ္ၚိလ္ၚဵုတံ ဗဂပ်လဝ် သီုပၟတ်ဓာတ်လလဳ၊ သီုသဵုလာရ။ သၟာဇိုင်စက်တံလေဝ် ဒှ်ဒဒိုက်ရ။ ကမၠောန်သှ်ေတၞဟ်တံလေဝ် ဝါတ်ဂါတ်မံင်ဗီုဂှ်ကီုရ။ မၞိဟ်အဆံင်သဇိုင်တံဂှ် ရပ်စပ်စကာ ပၟတ်ဓာတ်လလဳဟွံမာန်ပုဟ်။ မွဲမွဲဂိတု ဒးကဵုမံင်ၚုဟ်မဳတာ ဟွံအောန်ပုဟ်”_ သာ်ဝွံ ဟီုရ။
အပ္ဍဲပွိုင်ဍုင်ရေဝ်ဝွံ ကမ္ပဏဳပၟတ်ဓာတ်လလဳဇၞော်ဇၞော် SMD ကေုာံ ကမ္ပဏဳ မျာတ်တူရထောန်ကီု သီုကမၠောန်ပၟတ်ဓာတ်လလဳ နဇြဟတ်ပူဂဵုဇကုဇကုတံ သီုဖအိုတ်နွံမံင် ဟွံအောန်နူ (၄) တုဲ တြးကဵုဒမံင်ပၟတ်ဓာတ်လလဳ ပ္ဍဲကွာန်ရေဝ်သၠုင်ကဵု ရေဝ်သၟဝ်ကျာရ။
ကမ္ပဏဳပၟတ်ဓာတ်လလဳ ပ္ဍဲပွိုင်ဍုင်ရေဝ်ဝွံ သွက်ကမၠောန်ဂွံဂေတ်ဂှ် ဒးဗဒဗဒဲါမံင် ကၠေင်စက်နူမ္ၚးတုဲ နူကဵုဒၞာဲခြိုင်ကၠေင်စက် မၞုံပ္ဍဲသၞေဟ်ထဝဲါမွဲတဆင့်ဂှ် ဖ္ဍိုက်ပလောင်ဗ္စိုပ်ဒမံင် နကဵုကွဳစက်ဖ္ဍိုက်ကၠေင်တုဲ အခိင်လၟုဟ်ဏံ ဟိုတ်နူသ္ဂောံဂွံကၠေင်စက်ဝါတ်ဂါတ်ဂှ်ရ သွက်သ္ဂောံပ္တိတ်ပၟတ်ဓာတ်လလဳဂှ် ဝါတ်ဂါတ်ကၠုင်ဒမံင်ရောင် ဂွံတီကေတ်ရ။
