ပ္ဍဲတွဵုရးဍုၚ်မန်ဝွံ ကၠေၚ်စက်ၜိုတ်နွံပၟိက်ဂှ် ရာန်ကေတ်ဟွံမာန်ဂှ်ရ ကာလကဵုဒါန်ဍာ် ဇရေၚ်ပွိုၚ်ဍုၚ်ဝါတ်ဍာ်တေံဂှ် နကဵုဂကောံရီုဗၚ်မၞိဟ်တံ ဒှ်မံၚ်ခက်ခုဲရောၚ် ဂးရ။

ဍာ်ပၠိုၚ် ကေုာံ ဍာ်ကၟာဂမၠိုၚ် ကှ်ဇတ်တုဲ ပ္ဍဲကဵုအရာပ်လ္ၚဵု မၞုံပ္ဍဲပွိုၚ်ဍုၚ်ကျာ်မြဟ်၊ သဓီု ကေုာံ ၜဳက္လေၚ်ဂှ်ဝွံ ဗွဲကြဴနူအခိၚ်အတးတုဲဂှ် ပရေၚ်ဝါတ်ဂါတ်ဍာ် သာတုဲပရေံကၠုၚ်ရ။

ပရေၚ်နွံပၟိက်ဍာ်ဂၠိုၚ်မံၚ်ကီုလေဝ် နူကဵုဂကောံရီုဗၚ်မၞိဟ် ကဵုဒၟံၚ်ဒါန်ဍာ်တံ နကဵုသၞောတ်ဗ္ၜတ်ကၠေၚ်ဟေၚ် ဒးကဵုမံၚ်ဒါန်ဂှ်ရ အရာပ် / ကွာန် မနွံပၟိက်ဒၟံၚ်ဍာ်သီုဖအိုတ်တံ ကဵုဒါန်ဍာ်ဟွံမာန်ရဂှ် ဂကောံရီုဗၚ်မၞိဟ်ဂမၠိုၚ်တံ ဟီုရ။

“မွဲတ္ၚဲတှေ် သွက်ကာမွဲမဂှ် ကၠေၚ်ၜိုတ်ၜါဠက်ဟေၚ် ဂွံမာန်ရ။ budget ဂကောံလေဝ် ဟွံဂၠိုၚ်တှေ် မွဲတ္ၚဲဂၠိုၚ်အိုတ် ၜိုတ် (၈) အလန်ဟေၚ် အာမာန်ရ။ ဒၞာဲနွံပၟိက်တံဂှ် နွံဗွဲမဂၠိုၚ်ဏီ။ ဒၞာဲဟွံစုိုပ်ဏီဂှ်လေဝ် နွံဗွဲမဂၠိုၚ်ရ။ ဗီုသၞာံကၠာကၠာတေံ မွဲတ္ၚဲ ဒဵုကဵု (၁၂) အလန် ရုံရုံဂပ်ဂပ် ကဵုဒါန်ဟွံမာန်ပုဟ်။ လၟုဟ်ဏံ တန်တဴကဵုလၟိဟ်သ္ၚိကၟိန်တုဲတှေ် မူစိစေဝ်စၟတ်တုဲ ပရအ်ကဵုမံၚ်” သာ်ဝွံ ကောန်ဂကောံရီုဗၚ်မၞိဟ် ပွိုၚ်ဍုၚ်သဓီုမွဲတၠ ဟီုရ။

နကဵုဂကောံရီုဗၚ်မၞိဟ်ဂမၠိုၚ်တံဝွံ သြန်ဂအုံတၞဟ်ခြာဟၟဲမွဲသာ် ဒးဗဒဗဒဲါတန်တဴဒၟံၚ် လ္တူသြန်တၠဒါန်ထံက်ပၚ်ဂမၠိုၚ်တုဲ အခိၚ်လၟုဟ်ဏံ တၠဒါန်အောန်စှေ်ကၠုၚ်ဂှ်ရ နအလဵုကောန်ဂကောံတံ စုတ်သြန်ဂအုံတုဲ ဆက်ကၠောန်သ္ပမံၚ် ပရေၚ်ကဵုဒါန်ရောၚ် ဂးရ။

တုဲပၠန် ပၟတ်ဓာတ်လလဳဂှ်လေဝ် ဟွံဂွံလၟေၚ်ဍာံဂှ်ရ စက်ဇြောတ်ဍာ်ဂမၠိုၚ်ဂှ် ဒးဗ္ဂေတ်ဒၟံၚ်ကဵု ကၠေၚ်ဓာတ်ဟေၚ်တုဲ ဟိုတ်နူစရိတ်အိုတ်သၠုၚ်တိုန်ကၠုၚ်ဂှ်ရ ပ္ဍဲကာလရေၚ်တၠုၚ်ကမၠောန်မ္ဂး သာတုဲခက်ခုဲမံၚ်ရောၚ် ညးတာလျိုၚ် ဂကောံရီုဗၚ်မၞိဟ် ပွိုၚ်ဍုၚ်ၜဳက္လေၚ်မွဲတၠ ဟီုရ။

“ကွာန်နွံပၟိက်ဍာ်တံ မွဲတ္ၚဲကဵုမွဲတ္ၚဲ ဂၠိုၚ်ကၠုၚ်မံၚ်ရ။ ဆဂး ကၠေၚ်ဟွံရုံဂပ်၊ တၠဒါန်လေဝ် အောန်စှေ်ကၠုၚ်ဂှ်ရ ၜိုတ်နွံပၟိက်ဂှ် ထံက်ပၚ်ဟွံမာန်ပုဟ်။ လၟုဟ်ဏံတှေ် ဒၞာဲနွံပၟိက်ကာတၟေၚ်ဂှ်ဟေၚ် ကဵုဖျုန်တုဲ ပလံၚ်ဗ္စိုပ်မံၚ်ရ” သာ်ဝွံ ညးဟီုရ။

သၞာံကၠာကၠာတေံဝွံ သွက်အရာပ် / ကွာန် ဝါတ်ဂါတ်မံၚ်ဍာ် ဇၟာပ်သၞာံတံဂှ် ဂကောံပၠိုတ်ပၟတ် ကေုာံ ဂကောံရီုဗၚ်မၞိဟ်၊ ဂကောံပတဟိတံ ဒစးဒုၚ်စဳဇန်တုဲ ပရအ်ကဵုမံၚ်ဍာ်နွံရောၚ် ဂးရ။

ၜိုန်ဂှ်ကီုလေဝ် သၞာံဏံဝွံ ဟိုတ်နူခက်ခုဲကၠေၚ်စက်တုဲ ဗီုသၞာံကၠာကၠာတေံ ကဵုရီုဗၚ်ဟွံမာန်ရဂှ် ဂွံတီကေတ် နူဂကောံရီုဗၚ်မၞိဟ်တံရ။

ရာသဳက္ညၚ်သၞာံဏံဝွံ ဟိုတ်နူအသိၚ်ဂမ္တဴသၠုၚ်တိုန်ကၠုၚ်ဂှ်ရ ဒးဆဵုဂဗ ပရေၚ်ဝါတ်ဍာ်ဂၠိုၚ်တိုန်တုဲ ဟိုတ်နူခက်ခုဲကၠေၚ်စက်ဂှ်ရ ပရေၚ်ကဵုရီုဗၚ်ဂှ်လေဝ် နွံမံၚ်ကဵုသၞောတ်ဗ္ၜတ်ရ။ ဟိုတ်ဂှ်ရ ကွာန်မနွံပၟိက်ဍာ်ဂမၠိုၚ်တံလေဝ် ကေတ်အဆက်ကဵု ဂကောံရီုဗၚ်ဟံၚ်ပြာ်မၞိဟ်တံတုဲ အာတ်ရီုဗၚ်ဗွဲမဂတာပ်အခိၚ်ညိဂှ် ညးတာလျိုၚ်ဂမၠိုၚ်တံ ဟီုဂးဖ္တိုက်ဖၟောဝ်လဝ်ရ။