ဂၠံင်ဇၞော်အာယှ ဘာအင်-ကအ်ကြိက်-ဗြဝတဳ အဓိက သွက်ပရေင်ဆက်စၠောံဗၞိက် (လှာဲဗ္တးဗၞိက်) ပယျဵုသေံ-ဗၟာ မတၟာတ်လဝ် ဗဒဲါပွိုင် (၃) သၞာံဂှ်ဝွံ တ္ၚဲဏံ ဂိတုမာတ် (၂) နူဂကောံကမ္မယှေန်ပၞာန်တံ က္လေင်ပံက်ဏာတုဲ ကွဳစက်ဍောတ်ဍောတ် (ကွဳစက်သၟတ်) မၠိုင် စအာကၠုင်မံင်ဣရရောင် ဂွံတီကေတ် နူတမ်ရိုဟ်ပရိုင်အပ္ဍဲဒေသရ။
ၜိုန်ရက္လေင်ပံက်ဏာဂၠံင်ဇၞော်ဂှ်ကီုလေဝ် ကွဳလိုန်ဓာတ်၊ ကွဳစက်ဍိုက်သွက်သ္ၚိကၟိန် ကေုာံ ကွဳစက်သၟတ်ဖ္ဍိုက်ညးအာတရဴတံဟေင် ကဵုလဝ်အခေါင်တတ်ကၠောံအာကၠုင်တုဲ ကွဳစက်ဖ္ဍိုက်ကပေါတ်ဇၞော်ဇၞော်တံဂှ် ဒၞာတာဆဵုဒဝ်လဝ် အခေါင်အာကၠုင်ဖိုဟ်ရောင် ညးဒေသဗြဝတဳမွဲတၠ ဟီုရ။
“ပြဟ်ပြဟ်ဏံဂှ်တှ်ေ ကွဳစက်သၠာစှ်ၜါတံ၊ ကွဳစက်ဇၞော်ဇၞော်တံဂှ် ဟွံကဵုစှ်ေဏီပုဟ်။ ဒဒန် စၟတ် (၂) ဂှ်လေဝ် ဟွံက္လေင်ပံက်ဏီပုဟ်။ ဒေသလှာဲဗ္တးဗၞိက်ဂှ်လေဝ် ဟွံပံက်ဏီပုဟ်။ လၟုဟ်ဏံ ဂၠံင်ဇၞော်မွဲဟေင် ပံက်လဝ်ရ။ ဟိုတ်ဂှ်ရ ကွဳစက်ဍောတ်ဍောတ်တံဟေင် အာဂွံရ” သာ်ဝွံ ညးဟီုရ။
တ္ၚဲဏံ စဵုကဵုဗဂါပ်ဂယးဂှ်ဝွံ ပ္ဍဲကဵုမွဲဒမြိပ်သ္ကုတ်ဂၠံင်ဂှ်မ္ဂး ကွဳလိုန်ဓာတ်၊ ကွဳစက်ဍိုက်သွက်သ္ၚိ ကၟိန် ကေုာံ ကွဳစက်သၟတ်ဖ္ဍိုက်ညးအာတရဴ သီုဖအိုတ် စဵုကဵုအကြာ (၄၀၀) ဖ္ဍိုက် အာကၠုင်မံင်နွံရဂှ်လေဝ် ညးတီအကာဲအရာဂၠံင်ဍာန်မွဲတၠဂှ် ဟီုရ။
အသေအဟာန်ပံက်ဂၠံင်ဇၞော်အာယှ ကအ်ကြိက်-ဗြဝတဳဏံဝွံ ဂိတုဨဗရဴ (၂) တ္ၚဲဏံ အခိင်နူဂယး ကၠောန်ဗဒှ်ဏာလဝ် ပ္ဍဲကွာန်တာန်တာဥူ၊ ပွိုင်ဍင်ဘာအင်ဂှ် နူကဵုဌာန မဆေင်စပ်ကမ္မယှေန်ပၞာန်တံ တိုန်စိုပ်တုဲ ညးအာကၠုင်အကြာဂၠံင်ဍာန်ဂမလို်င်တံဂှ်လေဝ် ဒုင်တလှုင်ကဵု ဍာ်ဍာတ်ဍာတ်/ဂံက်ဂံက်ရ။
ကွဳစက်စှ်ေနူဗြဝတဳဂမလို်င်ဂှ်ဝွံ ပရေင်ဒၞာတာစၟဳစၟတ်ဟွံမွဲမွဲသာ် အပ္ဍဲပွိုင်မွဲနာဍဳဂှ် စိုပ်ကၠုင်ဇရေင်ဍုင်ကအ်ကြိက်ရောင် ဂးရ။
“က္လေင်ပံက်ဏာဂၠံင် ဗီုလၟုဟ်ဏံတှ်ေ ပရေင်အာကၠုင် ပြေပြံင်အာနူကၠာတေံ တၟာဟလို်င်ရ။ ပ္ဍဲကဵုဂၠံင်ဂှ်လေဝ် အာကၠုင်မံင် ပြေပြေပြံင်ပြံင်ဂှ် ဂွံမိင်ရ” သာ်ဝွံ ညးဒေသဗြဝတဳဂှ် ဟီုရ။
စပ္တံနူဂိတုဒဳဇြေမ်ဗာ သတ္တဟစတုတ္ထ သၞာံ (၂၀၂၃) တုဲကၠုင်တေံ ဟိုတ်နူဒှ်မံင်ပေဲါဗ္တိုက်ဂှ်ရ သ္ကုတ်ဂၠံင်ဇၞော်အာယှဂှ် တၟာတ်ထောံလဝ်တုဲ ပရေင်လှာဲဗ္တးဗၞိက်ပယျဵုသေံဗၟာဂှ် ဒးဒေံါဇူ လဝ်ရ။ ဟိုတ်ဂှ်ရ ပ္ဍဲကဵုပရေင်ပလံင်ဗ္စိုပ်ဗၞိက်ဂှ် ဒးပၠောပ်ဏာဒမံင် နူကဵုသ္ကုတ်ဂၠံင်ပြေပြံင်ဂှ်ရ။
ဟိုတ်နူက္လေင်ပံက်ဂၠံင်ဇၞော်အာယှမာန်ဂှ်ရ ဒဒန်ဆာန်ကၟိန် စၟတ် (၂) ဗြဝတဳ-မာဲဆံက် ကေုာံ ဒေသလှာဲဗ္တးဗၞိက်ဗြဝတဳဂှ်လေဝ် သွက်သ္ဂောံက္လေင်ပံက်ကဵုဂှ် သၟာဗၞိက်ကဵု ညးဒေသတံ မနွံပၟိက်ဒမံင်ရ။
ပရေင်လှာဲဗ္တးဗၞိက်ပယျဵု သ္ဂောံက္လေင်စမာန်ဂှ် ဂိတုဖေဖဝ်ဝါရဳတုဲကၠုင်ဏံ ဝန်ဇၞော်ကေင်ကာဍုင်သၟာင် ကမ္မယှေန်ပၞာန်ကဵု ဝန်ဇၞော်ကေင်ကာဍုင်သၟာင် ကၟိန်ဍုင်သေံတံ ဆဵုဂဗသဳကၠဳလဝ်ညးသ္ကံ ပ္ဍဲဍုင်ပူကေတ်နွံဂှ် ဂွံတီကေတ်ရ။
