ဂိတုအေပရဴ စၟတ်တ္ၚဲ (၂၃) နူတနေံဏအ်ဝွံ ပ္ဍဲခရိုၚ်ဖယျော၊ ကၟိန်ဍုၚ်သေံဂှ် ညးတာလျိုၚ်ဗၠာဲသၟိၚ်သေံတအ် လုပ်စၟဳစၟတ်ရပ်ဂွံ ကောန်ဍုၚ်ဗၟာဟွံလုပ်သၞောဝ် (၆၃) တၠနွံရောၚ် နူကဵုပရိုၚ်သေံ khaosod ပ္တိုန်ထ္ၜးလဝ်ဂှ် ဂွံဆဵုကေတ်ရ။
နူတနေံဏအ် ၜိုတ်အခိၚ်နူဂယးဂှ်ဝွံ ဗၠာဲသၟိၚ်သေံ မၞုံခရိုၚ်ဖယျောတအ် လုပ်အာစိုပ်စၟဳစၟတ်လဝ် ပ္ဍဲကဵုသ္ၚိမွဲဒၞါဲဂှ် ဂွံဆဵုကေတ် ကောန်ဍုၚ်မန်ဗၟာဟွံလုပ်သၞောဝ် လၟိဟ် (၆၃) တၠတုဲ အပ္ဍဲဂှ်ဝွံ ကောန်ဂကူပအိုဝ်၊ သေံ၊ ကရေၚ် မၞိဟ်တြုံ (၃၃) တၠ ကဵု မၞိဟ်ဗြဴ (၃၀) တၠ သီုကောန်ၚာ် ပါလုပ်မံၚ် (၃) တၠကီုရောၚ် ဂွံတီကေတ်ရ။
ကောန်ဍုၚ်ဗၟာတဏအ်ဝွံ နူကဵုဃံၚ်ထပၠုပ်မၞိဟ်တအ်မွဲကဆံၚ် ကၠတ်လုပ်ကၠုၚ် နူကဵုပၞော်ဂၠံၚ် ခရိုၚ်ဇျေၚ်မာဲ၊ မေအ်သိုၚ်တေံတုဲ သွက်ဂွံဆက်တရဴ သ္ဂောံအာကၠောန်ကမၠောန် ဇရေၚ်ဒေသ ၜၚ်ကံက်၊ ခရိုၚ်ဖေတ်သ္ဍူလော်တေံပၠန်ဂှ် လုပ်အောပ်မၚ်မံၚ် ပ္ဍဲကဵုသ္ၚိမွဲဒၞါဲဂှ်ရောၚ် ဂးရ။
အကြာကြေပ်ဂြတ်မံၚ်ဂှ်ဝွံ ဒးကဵုကၠုၚ်စရိတ်ဂၠံၚ် ကုဃံၚ်ထပၠုပ်မၞိဟ်တအ် ညးမွဲတၠမ္ဂး ဩန်သေံ အကြာ (၈၅၀၀) ၝာတ် ကဵု (၁၀,၀၀၀) ၝာတ်နွံရ။
ဒှ်သာ်ဂှ်ရ ကောန်ဍုၚ်ဗၟာ ကၠတ်လုပ်ကၠုၚ် နကဵုဂၠံၚ်ဟွံလုပ်သၞောဝ်တအ်ဂမၠိုၚ်ဝွံ ညးတာလျိုၚ်တအ် ရပ်ထိၚ်လဝ် ပ္ဍဲကဵုရုၚ်ဗၠာဲသၟိၚ်သေံဖယျောဂှ်တုဲ စၟဳစၟတ်ကေတ် အရေဝ်တုဲဒှ်အိုတ်မ္ဂး ကလေၚ်ပလံၚ်ဏာ ဇရေၚ်ဍုၚ်ကွာန်ဌာန်ဇကုတေံပၠန်ရောၚ် ဂွံတီကေတ်ရ။
ပ္ဍဲဂိတုအေပရဴဏအ်ဝွံ ဗၠာဲသၟိၚ်သေံ၊ ဒပ်ပၞာန်ဂေတ်မၚ်ဂီုကၠီုဒေသပယျဵုတအ် ပတေၚ်လဝ်ပရေၚ်စၟဳစၟတ်ကီုလေဝ် ရပ်ဂွံကောန်ဍုၚ်မန်ဗၟာတအ် နွံအောန်စှေ်မံၚ်တုဲ ပ္ဍဲကဵုအကြာမွဲၜါတ္ၚဲဏအ်ဂှ်ရ ဗၠာဲသၟိၚ်သေံတအ် ထပ်ရပ်ဂွံမံၚ် ကောန်ဍုၚ်မန်ဗၟာ ညးကၠတ်လုပ်ဍုၚ်တအ် အဆက်က်နွံကၠုၚ်ပၠန်ရောၚ် ဂွံတီကေတ်ရ။
