ဂိတုအေပရဴ စၟတ်တ္ၚဲ (၂၇) နူတနေံဗ္တံဏအ်ဝွံ ပ္ဍဲကၟိန်ဍုၚ်အေန်ဒိုဝ်နဳယှာ မ္ၚးဍုၚ်ဂျကာဒါဂှ် ကွဳပၟတ်ၜါဖ္ဍိုက် လုပ်ဇီုဒးညးသ္ကအ်တုဲ ညးအာတရဴ ဍိုက်ဗက်ကၠုၚ်ဂမၠိုၚ်တအ် ပရေၚ်ဒးဘဲဝပ်ချိုတ်ဂျိုၚ်နွံရောၚ် ဂွံဆဵုကေတ်ပရိုၚ်ရ။

မွဲအသိၚ်ကွဳပၟတ်ၜါဖ္ဍိုက်တေက်ဇီုဒးတုဲဂှ် ညးအာတရဴ ဍိုက်ဗက်ကၠုၚ် လၟိဟ် (၂၄၀) တၠတအ် ဒးချိုတ်အာ (၇) တၠကဵု ဒးဘဲဝပ် (၈၁) တၠနွံတုဲ မၞိဟ်တၟာတ်ဆိုအ်မံၚ် အပ္ဍဲကဵုကွဳပၟတ်ဂှ်ဗွဲမဂၠိုၚ်ရ။

ကွဳပၟတ်ဇီုဒးၜါဖ္ဍိုက်ဏအ်ဝွံ ဒှ်ကွဳပၟတ်နူကဵုကုမ္ပဏဳ (KAI)၊ ဟိုတ်နူဂၠံၚ်ဍာန်တိတ်တရဴကွဳပၟတ်တုပ်အာတုဲ ကွဳပၟတ်ဒမြိပ်လာၚ်သ္ၚောဲမွဲဖ္ဍိုက် အာဇီုကပိုက်စုတ် ဍုတ်ကွဳပၟတ်ညးအာတရဴ ဒေါံဇူမံၚ် အပ္ဍဲကဵုသၞေဟ်ကွဳပၟတ် ပဳကာသဳတဳမာဂှ်ရောၚ် ဂွံတီကေတ်ရ။

ကိစ္စဏအ်ဂှ် “ညးလျိုၚ်ဒမြိပ်လာၚ်ကွဳပၟတ်တအ်ကီု၊ ညးထိၚ်ဂၠံၚ်ဍာန်ကွဳပၟတ်တအ်ကီု ဟိုတ်နူသာသ္ပအ်ကဵု ပရေၚ်ပလေဝ်ပလေတ်ဂှ်ရ သ္ဒးက္တဵုဒှ်အာဗီုဏအ်ဏောၚ်’’သာ်ဝွံ ညးဇၞော်ဍုၚ်ဂျကာဒါတအ် ဟီုရ။

ဒှ်သာ်ဂှ်ရ ဂကောံညးရီုဗၚ်ဟံၚ်ပြာ်မၞိဟ်တအ် ဗွဲမဂတာပ်အခိၚ် ကၠုၚ်စိုပ်ကဵုရီုဗၚ် ဂၠိုက်ဂၠာဲကေတ်ပ္တိတ်မံၚ်တုဲ ညးနွံပၟိက်ကဵု အံက်ဇြဳဂျေန်တအ်ဂှ် ကဵုအရီုဗၚ်ကၠာတုဲ

 မၞိဟ်သှေ်မၠိုၚ်တအ်ဂှ်လေဝ် ဟံၚ်ကေတ်ပ္တိတ်မံၚ်သိုက်သိုက်ဖိုဟ်တုဲ မၞိဟ်ဒးဘဲဝပ်တအ်ဂှ် ပလံၚ်ပစိုပ်ဏာရုၚ်ဂဥုဲလွဳလွတ်မံၚ်ရောၚ် ဂွံတီကေတ်ရ။

ပြဟ်ဟ်ဏအ်ဝွံ အပ္ဍဲကဵုညးအာတရဴ ဍိုက်ဗက်ကၠုၚ် လၟိဟ် (၂၄၀) တၠတအ်ဂှ်မ္ဂး တၚ်နၚ်ညးဒးဘဲဝပ်ချိုတ်ဂျိုၚ် ချိုတ်ချိုတ်ပၠိုတ်ပၠိုတ်ဂှ် သ္ပဒ္တန်ဟွံမာန်ဏီရ။

ပ္ဍဲကၟိန်ဍုၚ်အေန်ဒိုဝ်နဳယှာ ကိစ္စကွဳပၟတ် က္တဵုဒှ်အာ ပရေၚ်တေက်ဇီုသာ်ဏအ်တုဲ နူကဵုဗၠာဲသၟိၚ်ဍုၚ်ဂျကာဒါတအ် ဂၠိုက်ဂၠာဲစၟဳစၟတ်မံၚ် ပရူဒဒှ်ဍာံဖိုဟ်ရောၚ် ဂွံတီကေတ်ရ။

ဗီုရုပ် – Thai news (PPTV HD)