ပ္ဍဲသၞာံဗ္တောန်ပညာ (၂၀၂၆-၂၀၂၇) ဏံ အ္စာဘာကောန်ဂကူမန် သွက်ဂွံဒေါံဇူနွံဂၠိုၚ်တုဲ ဘာလ္ၚဵုမ္ဂး အ္စာသီုဖအိုတ် ပတိုန်လဝ်လိက် သွက်ဂွံဒေါံဇူနွံရောၚ် ကေၚ်ကာဂကောံအ္စာဘာ ကဆံၚ်ပွိုၚ်ဍုၚ်မွဲတၠ ဟီုလဴထ္ၜးရ။
ပ္ဍဲကဵုအ္စာဘာဒေါံဇူဂၠိုၚ်ဂှ် ဗွိုၚ်အပ္ဍဲဍုၚ်က္တဵုဒှ်ဂၠိုၚ်တုဲ ဘာလ္ၚဵုဂှ် အ္စာအလုံအတိုၚ်မွဲဘာ ပ္တိုန်လဝ်လိက်သွက်ဂွံဒေါံဇူနွံတုဲ ဒှ်ဒၟံၚ်ခက်ခုဲကဵု ပရေၚ်ဗပေၚ်အ္စာဘာ ဇၞော်ကဵုဒြဟတ်နွံရောၚ် ညးတာလျိုၚ်ဂကောံကေၚ်ကာအ္စာဘာ (ဗွိုၚ်ပ္ဍ္ဍဲဍုၚ်) မွဲတၠ ဟီုထ္ၜးရ။
“သၞာံဗ္တောန်ပညာ (၂၀၂၆-၂၀၂၇) ဏံ အ္စာဘာပတိုန်လဝ်လိက် သွက်ဂွံဒေါံဇူဂၠိုၚ် ကွေံကွေံမွဲတဲ၊ ဘာလ္ၚဵုဂှ်တှေ် ကဆံၚ်တန်မူလ တန်မူလလောန်ဂှ်တှေ် အ္စာဘာ (၃) တၠ၊ (၄) တၠ၊ (၅) တၠ၊ (၆) တၠ ဘာ —— (ဟွံဓမံက်ယၟုဘာ) ဂှ်တှေ် အ္စာဘာညးတံ ဖအိုတ် (၆( တၠဂှ် သီုအတိုၚ် (၆) တၠဂှ် ပတိုန်လဝ်လိက် သွက်ဂွံဒေါံဇူနွံ၊ လၟုဟ်အခိၚ်ပံက်ဘာဂှ် သှေ်အကြာၜိုတ်မွဲဂိတုပၠန်ရတှေ် ဂၠာဲဗပေၚ်စုတ်အ္စာဂှ်လေဝ် ဂၠာဲဟွံလောဲ ဒှ်ခက်ခုဲကဵုဂၠာဲအ္စာ ဇၞော်ကဵုဒြဟတ် ဒှ်မံၚ်” သာ်ဝွံ အ္စာဗြဴ ကေတ်မံၚ်တာလျိုၚ် ကေၚ်ကာဂကောံအ္စာဘာ ကဆံၚ်ပွိုၚ်ဍုၚ်မွဲတၠဂှ် ဟီုရ။
အ္စာဘာကောန်ဂကူမန် ပတိုန်လဝ်လိက် သွက်ဂွံဒေါံဇူဂမၠိုၚ်တအ်ဂှ် အ္စာလ္ၚဵုဂှ် ကေတ်ကၠုၚ်တာလျိုၚ် ဗၞတ်ပွိုၚ် (၁၀) သၞာံလေဝ်နွံ၊ အ္စာလ္ၚဵုဂှ် ကေတ်ကၠုၚ်တာလျိုၚ် ဗွိုၚ်ဗၞတ်အကြာ (၅) သၞာံနွံ၊ အ္စာလ္ၚဵုဂှ် ကေတ်ကၠုၚ်တာလျိုၚ် ဗၞတ် (၂) သၞာံနွံတုဲ အ္စာဘာဒေါံဇူသီုဖအိုတ်ဂှ် နကဵုတာလျိုၚ်ပြေတုဲအာသီုဖအိုတ်ရ။
“အ္စာဘာဒေါံဇူတအ်သီုဖအိုတ်ဂှ် ညးတအ်ယိုက်ဂၠေၚ်လဝ်တာလျိုၚ်ပြေတုဲအာသီုဖအိုတ်ရ၊ အ္စာတအ်ဂှ်တှေ် ဗွဲမဂၠိုၚ်ဂှ် ဒုၚ်သဇိုၚ်ကဵု စိုတ်ဓာတ်ပရေၚ်ဂကူတုဲ ယိုက်ဂၠေၚ်ကေတ်မံၚ်တာလျိုၚ် ဗ္တောန်မံၚ်လိက် နကဵုၚုဟ်ဩန်ဂိတုအောန်အောန်၊ ဆဂး ဒုၚ်သဇိုၚ်ကဵုစိုတ်ဓာတ်သၟး ပရေၚ်ဩန်ဂိတုဂှ် ယဝ်သၠုၚ်ပတိုန်ကဵုဟွံမာန် အာမံၚ်အကြာဆၜိုတ်ဏံရတှေ် ဗီုလဵုလေဝ် ဂွံထိၚ်အာ အ္စာဘာပိုဲတအ်ဂှ် ဟွံလောဲပုဟ်” သာ်ဝွံ ညးတာလျိုၚ်ဂကောံအ္စာဘာ ကဆံၚ်ပွိုၚ်ဍုၚ်တၞဟ်မွဲတၠပၠန်ဂှ် ထပ်ဟီုထ္ၜးရ။
ဘာကောန်ဂကူမန်ဂှ် ဒုၚ်သဇိုၚ်ကဵုဩန်တၠဒါန်တုဲ ဗ္ဂေတ်ဒၟံၚ်စက်ယန်လၟေၚ်ကမၠောန်ဘာ ပတိတ်ကဵုဒၟံၚ်ဩန်ထံက်ပၚ် ကုအ္စာဘာတအ် နကဵုၚုဟ်မးမွဲဂိတု သၟဝ်ၜါကိုဋ်ရ။
ဘာကောန်ဂကူမန်ဂှ် ဗွိုၚ်တိဍာ်ဗော်ဍုၚ်မန်တၟိကဵု ဗွိုၚ်အပ္ဍဲဍုၚ် သီုဖအိုတ်ဂှ် နွံ (၁၄၆) ဘာတုဲ အပ္ဍဲဂှ်မ္ဂး ဘာကဝ်လိက် (၁) ဘာ၊ ဘာတန်သၠုၚ် (၄) ဘာ၊ ဘာတန်လ္ဒောဝ်နွံ (၁၉) ဘာတုဲ သှေ်နူဂှ်မ္ဂး ကဆံၚ်တန်မူလကဵု တန်မူလလောန်ရ။ အပ္ဍဲဂှ်မ္ဂး လၟိဟ်အ္စာဘာဂှ် နွံဗၞတ် (၈၀၀) တၠတုဲ လၟိဟ်ကွးဘာ ဗၞတ် (၁၅၀၀၀) တၠနွံဂှ် ဂွံတီကေတ်ရ။
